Eyin a do nutindo he họakuẹ de taidi owhé kavi mọto, a na nọ penukundego ganji. Nudopolọ wẹ nọ jọ gando họntọnjiji towe hẹ Jiwheyẹwhe go. Nawẹ a na wlebòna họntọnjiji enẹ to baptẹm towe godo gbọn?

To hosọ ehe mẹ

•  Nọ hia Ohó Jiwheyẹwhe tọn

•  Nọ hodẹ̀ hlan Jehovah

•  Nọ má nuyise towe hẹ mẹdevo lẹ

•  Nọ yì opli Klistiani tọn lẹ

 Pọ́n wefọ tangan ehe: “To sinsẹ́n detọ́n zọnmii to azọ́n dagbe lẹpo mẹ bo na to jijideji to oyọnẹn he pegan Jiwheyẹwhe tọn mẹ.”—Kolosinu lẹ 1:10.

 Nuhe e zẹẹmẹdo: To baptẹm towe godo, a dona nọ hia Biblu bosọ nọ lẹnayihamẹpọn do nuhe a plọn lẹ ji.—Salmu lẹ 25:4; 119:97.

 Nuhe a gán donukun: To whedelẹnu, nupinplọn gán nọma jlo we. A tlẹ gán lẹndọ emi ma yọ́n lehe yè nọ “plọnnu” do.

 Nuhe a gán wà: Plọnnu yinukọn dogọ gando hosọ Biblu tọn he mẹ a do ojlo te de go. Bayi tito nupinplọn tọn towe titi—dehe ma na vẹawuna we gbau nado hodo. Yanwle towe wẹ dona yindọ owanyi towe na Jehovah po Ohó etọn po ni jideji. Nupinplọn enẹ nkọ na hẹn ale wá na we bọ a nasọ mọ awuvivi to e mẹ.—Salmu lẹ 16:11.

 Ayinamẹ: Eyin a na duvivi nupinplọn towe tọn ganji, tẹnpọn bo dín fie to abọẹ bọ nudepope ma na fẹayihasẹna we te de.

 Be a do hudo alọgọ tọn dogọ wẹ ya?

•   Hia:

   “Nawẹ Biblu Sọgan Gọalọna Mi Gbọn?​—Adà 2tọ: Nọ Mọ Awuvivi to Biblu Hihia Towe Mẹ”

   “Nawẹ N’Gán Nọ Ze Ayiha Do Fidopo Gbọn?”

•   Pọ́n video lọ:

   Nuhe Ogbẹ́ Towe lẹ Nọ Dọ—Biblu Hihia

•   Mọ owe ehe yí:

   “Tito Biblu Hihia Tọn Lẹ”

 Pọ́n wefọ tangan ehe: “Mì yin magbọjẹnọ na nudepope blo, ṣigba to nulẹpo mẹ, mì nọ yí odẹ̀, ovẹ̀ po pẹdido po do hẹn obiọ mìtọn lẹ zun yinyọnẹn na Jiwheyẹwhe.”—Filipinu lẹ 4:6.

 Nuhe e zẹẹmẹdo: Aliho awe mẹ wẹ yè nọ dọho hẹ Jiwheyẹwhe te: A nọ dotoaina ẹn whenue a hia Ohó etọn, podọ a sọ nọ dọhona ẹn whenue a hodẹ̀ hlan ẹn. Eyin a to dẹ̀ho, a gán nọ biọ Jiwheyẹwhe nuhe yin hudo towe lẹ bosọ nọ dopẹna ẹn na dona he a mọyi lẹ.

 Nuhe a gán donukun: To whedelẹnu, odẹ̀ towe lẹ gán nọ taidi mọmọ tọn poun. A tlẹ gán nọ lẹndọ Jehovah ma to todoaina emi kavi dọ e ma jlo na sè nude sọn dewe.—Salmu lẹ 10:1.

 Nuhe a gán wà: To azán lọ blebu ji, nọ lẹnnupọndo nuhe ji a gán hodẹ̀ do lẹ ji. Eyin dọ ninọmẹ he mẹ a te zọ́n bọ a ma gán hodẹ̀ he dite, hẹn nuhe ji a na wá hodẹ̀ do lẹ do ayiha mẹ. Gbọnvona nuhe to ahunmẹduna we lẹ, lẹnnupọndo hudo mẹdevo lẹ tọn ji ga.—Filipinu lẹ 2:4.

 Ayinamẹ: Eyin odẹ̀ towe lẹ wá lẹzun mọmọ tọn, hodẹ̀ hlan Jehovah gandego. E jlo na sè nuhe to ahunmẹduna we lẹpo, kakajẹ dehe gando dẹ̀hiho go lẹ ji.—1 Johanu 5:14.

 Be a do hudo alọgọ tọn dogọ wẹ ya?

•   Hia:

   “Naegbọn N’Dona Nọ Hodẹ̀?”

•   Mọ owe ehe yí:

   “Lehe A Sọgan Hẹn Odẹ̀ Towe lẹ Pọnte Do”

 Pọ́n wefọ tangan ehe: “Nọ payi dewe po mẹpinplọn towe po go to whepoponu. . . . Na gbọn ehe wiwà dali, hiẹ na whlẹn dewe po mẹhe nọ dotoaina we lẹ po gán.”—1 Timoti 4:16.

 Nuhe e zẹẹmẹdo: Eyin a nọ dọho gando nuyise towe go na mẹdevo lẹ, yise hiẹ lọsu tọn na lodo. Enẹ na zọ́n bọ a gán whlẹn ogbẹ̀ mẹhe to todoaina we lẹ tọn po hiẹ lọsu tọn po.

 Nuhe a gán donukun: To whedelẹnu, e gán nọma jlo we nado má nuyise towe hẹ mẹdevo lẹ. Obu tlẹ gán nọ di we nado dọho gando nuyise towe go, titengbe to wehọmẹ.

 Nuhe a gán wà: Magbe ma nado dike linlẹn agọ̀ lẹ taidi obu ni duto jiwe bo wá yinuwado nudide towe lẹ ji. Apọsteli Paulu dọ dọ: “Eyin yẹn tlẹ [lá wẹndagbe lọ] jẹagọdo ojlo ṣie, yẹn gbẹsọ tindo họ̀nkọnsi-zọ́n de he ko yin zizedo alọmẹ na mi.”—1 Kọlintinu lẹ 9:16, 17.

 Ayinamẹ: Eyin mẹjitọ towe lẹ kẹalọyi, dín mẹde he a gán nọ hodo apajlẹ etọn—enẹ wẹ yisenọ hatọ apajlẹ dagbenọ de he nọ tọ́n na kunnudegbe ganji.—Howhinwhẹn lẹ 27:17.

 Be a do hudo alọgọ tọn dogọ wẹ ya?

•   Hia:

   “Pourquoi ai-je peur de défendre mes croyances ?”

 Pọ́n wefọ tangan ehe: “Mí ni nọ na ayidonugo ode awetọ nado nọ whàn mídelẹ hlan owanyi po azọ́n dagbe lẹ po kọ̀n, e ma yin nado nọ gbẹkọ pipli dopọ mítọn lẹ go.”—Heblu lẹ 10:24, 25.

 Nuhe e zẹẹmẹdo: Whẹwhinwhẹn tangan he wutu mí nọ yì opli wẹ nado sẹ̀n Jehovah. Amọ́, mí sọ nọ mọaleyi sọn opli lẹ mẹ to aliho awe devo mẹ. Tintan, yisenọ hatọ lẹ na na we tuli. Awetọ, hiẹ lọsu na na tuli yé eyin a nọ yì opli bo nọ do mahẹ to e mẹ.—Lomunu lẹ 1:11, 12.

 Nuhe a gán donukun: To whedelẹnu, e gán vẹawuna we nado ze ayiha do fidopo to opli ji, enẹ gán zọ́n bọ anademẹ nujọnu tọn lẹ na gbọ̀ gowe. Kavi a gán nọ gọ̀n opli lẹ, na a nọ ze ayiha do nudevo lẹ taidi wehọmẹ-zọ́n lẹ ji wutu.

 Nuhe a gán wà: Dile etlẹ yindọ a ma na dovọ́na wehọmẹ-zọ́n towe, magbe nado nọ yì opli lẹ to gbesisọ mẹ bosọ tẹnpọn nado nọ mọ nususu plọn to opli ji. Nọ na gblọndo to opli lẹ ji. Eyin opli fó, e whè gbau nọ na pipà mẹde na azọ́n he e wà kavi na gblọndo he e na.

 Ayinamẹ: Nọ wleawuna opli lẹ jẹnukọn. Yí aplikasiọn JW Library® do alokan kavi tablẹti towe ji bo hùn adà lọ “Réunions” (enẹ wẹ opli lẹ) nado nọ mọ nuhe ji mí na dọhodo to opli dopodopo ji.

 Be a do hudo alọgọ tọn dogọ wẹ ya?

•   Hia:

   “Pourquoi assister aux réunions chrétiennes ?”