Mikaẹli, he sinsẹ̀n delẹ nọ ylọdọ “Saint Michel” wẹ yin yinkọ Jesu tọn whẹpo e do wá aigba ji podọ whenue e lẹkọyi olọn mẹ godo. a Mikaẹli dọnnu hẹ Satani gando oṣiọ Mose tọn go, bosọ gọalọna angẹli de nado dowẹ̀n Jiwheyẹwhe tọn na yẹwhegán Daniẹli. (Daniẹli 10:13, 21; Juda 9) Mikaẹli nọ yinuwa sọgbe hẹ zẹẹmẹ yinkọ etọn tọn, enẹ wẹ—“Mẹnu Wẹ Taidi Jiwheyẹwhe?”—gbọn avùnlọyiyina gandudu Jiwheyẹwhe tọn po avùnhiho sọta kẹntọ Jiwheyẹwhe tọn lẹ po dali.—Daniẹli 12:1; Osọhia 12:7.

 Pọ́n nuewutu e sọgbe nado nọ wá gbèta lọ kọ̀n dọ Jesu wẹ yin Mikaẹli angẹligán lọ.

•   Mikaẹli wẹ yin “angẹligán lọ.” (Juda 9) Tẹnmẹ-yinkọ lọ “angẹligán,” he zẹẹmẹdo “ogàn angẹli lẹ tọn,” sọawuhia to wefọ Biblu tọn awe gee mẹ. To ninọmẹ awe lẹpo mẹ, omẹ dopo janwẹ e nọ dlẹnalọdo, ehe dohia dọ angẹli dopo gee wẹ tẹnmẹ-yinkọ lọ yin yiyizan na. Dopo to wefọ ehelẹ mẹ dọ dọ Oklunọ Jesu he ko fọnsọnku lọ “na jẹte sọn olọn mẹ po awhá gbedide tọn de po, po ogbè angẹligán tọn de po.” (1 Tẹsalonikanu lẹ 4:16) Jesu tindo “ogbè angẹligán tọn de” na ewọ wẹ yin angẹligán lọ, yèdọ Mikaẹli wutu.

•   Mikaẹli nọ deanana awhànpa angẹli lẹ tọn de. “Mikaẹli po angẹli etọn lẹ po funawhàn hẹ dlagọni lọ,” he yin Satani. (Osọhia 12:7) Mikaẹli tindo aṣẹpipa daho de to agblò gbigbọ tọn lẹ mẹ, na e yin yiylọdọ “dopo to ahọvi he yin tọ́ntlọ́ngbọ́n lẹ mẹ” podọ “ahọvi daho” lọ. (Daniẹli 10:13, 21; 12:1) Mẹdaho David E. Aune he yin Weyọnẹntọ Alẹnu Yọyọ lọ tọn de dọ dọ tẹnmẹ-yinkọ enẹlẹ nọ do Mikaẹli hia taidi “awhàngán daho pete awhànpa angẹli lẹ tọn.”

   Biblu sọ zan yinkọ devo nado do mẹhe tindo aṣẹpipa do awhànpa angẹli lẹ tọn de ji hia. E basi zẹẹmẹ “osọhia Oklunọ Jesu tọn sọn olọn mẹ po angẹli huhlọnnọ etọn lẹ po tọn . . . to miyọ́n he to jiji de mẹ, dile ewọ na hẹn ahọsuyi wá.” (2 Tẹsalonikanu lẹ 1:7, 8; Matiu 16:27) Jesu “ko yì olọn mẹ, podọ angẹli lẹ, aṣẹpipa lẹ po huhlọn lẹ po ko yin hinhẹn zun mẹmẹglọ hlan ẹn.” (1 Pita 3:21, 22) E ma na sọgbe hẹ lẹnpọn dagbe dọ Jiwheyẹwhe ni de Jesu gọna mẹdevo he yin Mikaẹli bọ yé omẹ awe lẹ na nọ deanana pipli angẹli wiwe lẹ tọn zẹnzẹn. Kakatimọ, nue sọgbe wẹ nado wá tadona lọ kọ̀n dọ Jesu wẹ sọ nọ yin yiylọdọ Mikaẹli.

•   Mikaẹli “na fọ́n” to “ojlẹ ayimajai tọn” he nkọ ma ko tin pọ́n de mẹ. (Daniẹli 12:1) To owe Daniẹli tọn mẹ, hogbe lọ “fọ́n” nọ saba yin yiyizan nado dohia dọ ahọlu de wleawufo nado yinuwa to aliho vonọtaun de mẹ. (Daniẹli 11:2-4, 21) Jesu Klisti he yin alọdlẹndo di “Ohó Jiwheyẹwhe tọn,” na yinuwa to aliho vonọtaun mẹ taidi “Ahọlu ahọlu lẹ tọn” nado sukúndona kẹntọ Jiwheyẹwhe tọn lẹ bo basi hihọ́na omẹ Jiwheyẹwhe tọn lẹ. (Osọhia 19:11-16) E na wà ehe to ojlẹ “nukunbibia daho . . . ehe nkọ ma ko jọ pọ́n sọn bẹjẹeji aihọn tọn gbọ́n kakajẹ din” lọ whenu.—Matiu 24:21, 42.