Jijọho ma na wá aihọn mẹ gbọn vivẹnudido gbẹtọvi lẹ tọn dali gba, ṣigba gbọn Ahọluduta Jiwheyẹwhe tọn he yin gandudu olọn mẹ tọn de he Klisti Jesu na deanana gblamẹ. Doayi nuhe Biblu plọn mí dogbọn todido jiawu enẹ dali go.

1.   Jiwheyẹwhe na hẹn “awhàn gbọ kakajẹ pòdo aigba [tọn],” sọgbe hẹ opagbe etọn nado hẹn “jijọho [wá] to gbẹtọ mẹhe mẹ ewọ yin homẹhunnọ te lẹ ṣẹnṣẹn!”​—Psalm 46:9; Luku 2:14, Biblu Wiwe lọ​—Gun Alada.

2.   Ahọluduta Jiwheyẹwhe tọn na dugán sọn olọn mẹ do aigba lọ blebu ji. (Daniẹli 7:14) Gandudu ehe na de owanyi akọta tọn sẹ̀, na walọ ehe wẹ yin adọ̀ na awhàn susu.

3.   Jesu he yin Gandutọ Ahọluduta Jiwheyẹwhe tọn bosọ nọ yin yiylọdọ “Ahọvi Jijọho tọn,” na hẹn ẹn diun dọ “jijọho ma na ponu.”​—Isaia 9:6, 7.

4.   Mẹhe ma jlo na jo danuwiwa do lẹ ma na nọ Ahọluduta lọ glọ, na “mẹhe yiwanna [danuwiwa] ayiha [Jiwheyẹwhe tọn] gbẹwanna.”​—Psalm 11:5; Howhinwhẹn lẹ 2:22.

5.   Jiwheyẹwhe to mẹjidugando etọn lẹ plọn gando lehe yé na nọ jijọho mẹ hẹ mẹdevo lẹ do go. Biblu basi zẹẹmẹ ale he mẹpinplọn ehe nọ hẹnwa lẹ tọn dọmọ: “Yé nasọ yí ohí yetọn do tùn agbogọdọẹ: akọta ma to na ze ohí do akọta ji ba, mọ yé ma to na plọn awhànfunfun ba.”​—Isaia 2:3, 4.

 To alọnu din, Kunnudetọ Jehovah tọn livi susu lẹ lẹdo aihọn pé wẹ to nuplọn sọn Jiwheyẹwhe dè gando lehe yè nọ nọ̀ jijọho mẹ mẹdevo hẹ lẹ do go. (Matiu 5:9) Nugbo wẹ dọ mí wá sọn akọ̀ voovo lẹ mẹ bo tin to nuhe hugan otò 230 mẹ, etomọṣo mí ko gbẹ́ nado ze awhànfunnu sọta gbẹtọvi hatọ mítọn lẹ.