Whẹpo wánvú de nado penugo bo zlọ̀n, hẹ́ nude kavi yọ́n nue to jijọ to lẹdo etọn mẹ lẹ, e dona tin to wiweji. Di apajlẹ, eyin nuhe taidi azò adidẹ́ de tọn lẹ kudiho, e ma na penugo nado yọ́n fie e gán gbọn lẹ, wanu dopọ hẹ adidẹ́ devo lẹ kavi sewán ganji. Abajọ, Alexander Hackmann he nọ basi dodinnanu gando kanlin lẹ go do dọ dọ, “a ma gán mọ wánvú dihónọ de pọ́n. Yé yọ́n lehe yé gán de dihó sẹ̀ sọn agbasa go do.”

Lẹnnupọndo ehe ji: Hackmann po hagbẹ etọn lẹ po basi dodinnanu gando ayiha he adidẹ́ charpentier (Camponotus rufifemur) nọ kàn nado hẹn nuhe taidi azò etọn lẹ do wiweji go. Yé mọdọ adidẹ́ lọ nọ de dihó lẹ sọn nudi azò etọn lẹ go gbọn afọ etọn lẹ hihá dali, bo nọ dọ̀n nudi azò lọ lẹ gbọn afọ hihá lọ mẹ. Ofún titli he to afọ hihá lọ go lẹ nọ gọalọ nado de dihó titli lẹ sẹ̀. Dihó pẹvi lẹ nọ yin didesẹ gbọn nuhe taidi davunnú de dali, ehe odò he to ṣẹnṣẹn na ẹn lẹ gblo sọ ofún he to nudi azò adidẹ́ lọ tọn go nkọ lẹ. Podọ dihó flinflin lẹ—he whè taun hú titli oda gbẹtọvi de tọn—nọ yin didesẹ gbọn ofún he tlẹ flin taun lẹ dali.

Pọ́n video lehe adidẹ́ he nọ yin charpentier to nudi azò etọn lẹ klọ do tọn

Hackmann po hagbẹ etọn lẹ po mọdọ azọ́nwhé lẹ sọgan mọ nude plọn sọn ayiha he adidẹ́ lẹ nọ kàn nado hẹn nudi azò etọn lẹ do wiweji mẹ. Di apajlẹ, ayiha mọnkọtọn sọgan yin kinkan nado nọ de dihó sẹ̀ to whenue yè to azọ́nwanu flinflin lẹtliki tọn lẹ basi, na dihó pẹvide sọgan zọ́n bọ nulọ lẹ ma na wazọ́n ganji.

Etẹ a lẹn? Be nugopipe adidẹ́ he nọ yin Charpentier tọn nado nọ hẹn nuhe taidi azò etọn lẹ do wiweji wá aimẹ na ede poun wẹ ya? Kavi e yin didá?