U Tienu n tagi bonla kuli. Waa pia cilima, waa go pia juodima mo ba. (Pisoma 90:2) U Tienu cedi ke bi diani labaaliŋamu yaaba n ye Bibili nni. (Timote Tikpiali 1:11) Wani n tie ti miali diedo yeni, wani bebe ke ti jaandi ki go kpiagidi.—Cogi mani Mi Doagidima 4:11.

Nilo o ba kuli kan fidi le U Tienu leni nunbu ba, kelima O ye tanpoli. Bi ninsaaliba mo kan fidi le yaaba n ye tanpoli yeni ba. (Jan 1:18; Bi Badiba Jama Tilieli 6:27) Ama U Tienu n tagi yaala kuli yeni todi ti, tin bandi wan tie yaa nilo buolu. Ti ba fidi ki maali: i tiidi leni li bonluonkaala buoli kuli li wangi-ti ke U Tienu tie buama, ki go tie yanfuodaano. Tanpoli leni ki tinga n yabi maanma yeni wangi-ti ke O tie o paaciamu kuli daano.—Cogi mani Loma Yaaba 1:20.

Ti yaa cogi Bibili yeni, ti ba bandi U Tienu ki puguni. Bibili waani U Tienu n bua yaala leni wan kaa bua yaala. O go waani U Tienu n kubi bi nisaaliba maanma, leni wani n tiendi yaala o tuona kuli nni.—Cogi mani Pisoma 103:7-10.

Jesu den yedi: “Ti baa yua n ye tanpoli, a yeli n baa mi gagidima.” (Matiyu 6:9) U Tienu pia a baliyela boncianla, ama O pia O yelicele. Ban yii laa yeli mabuoli bonconcianla nni maanma naa ta-ta ba. Mi gulimancema nni, bi yi o “Jeova.” Bibili waani ke yaa Tienu yeli n yi “Jeova” n tie tanpoli badiciamo ki tinga kuli po. (Pisoma 83:18, MN) Mi Doagidima 19:6 yedi “Aleluya!” Li bua yedi, pagi mani YAH bi Jeova.

 Bibili boncianla nni, bi duuni ñani U Tienu yelicele yeni ki tieni “li miali diedo” bi “U Tienu.” Ama ban den cili ki diani Bibili yeni yaa yogunu ke U Tienu yelicele den ye o ni nni taalima 7 000. Jesu n den bangidi bi niba yaa yogunu, o den waani U Tienu yelicele.—Cogi mani Jan 17:26.

Fala n gbie maanma yeni wangi ke U Tienu gba ti niñima bi? Bi tianba tua ke U Tienu n cedi ke ti laadi fala, kelima o tulini ti. Laa maama tie faama.—Cogi mani Jaka 1:13.

U Tienu tagi o ninsaalo ke wani o ba baa fidi ki ta li jagili leni o yama, ki tieni wan bua yaala. Wani n kaa bua tin nõadi O leni tiladi yeni la mani yi pala? (Josue 24:15) Bi niba boncianla yama buadi mi biadima ki cedi ke bi niba laadi fala. Laa janbi biidi Jeova pali.—Cogi mani Mi Cilima 6:5, 6.

Jeova U Tienu gba ti niñima. O bua ti yema n yaa pia li pamanli. Ne leni waamu o ba bolini a nibiada ki gbeni fala yeni. U Tienu n ŋa ke fala baa ye yeni pia li fuuli. Ti ba le lani li cagili 8 nni.—Cogi mani Pieli Tilieli 2:9; 3:7, 13.

Ti yaa jaani Jeova ki togidi o yaala n ye te pala nni, ti ba tua o danli. O gba bi niba kuli niñima. (Pisoma 65:3, 145:18) O go puuni-ti sugili ki nua tin dugi o po maanma baa li tianla tin yen gbali yeni. Baa tin tie tuonbiadidamba yeni ti ba fidi ki tua U Tienu danli.—Cogi mani Pisoma 103:12-14; Jaka 4:8.

Jeova n tie ti miali diedo yeni, li tie tiladi tin bua O. (Maka 12:30) Ti yaa bandi O ki pugudi, ki go tiendi wan bua yaala, ti wangi ke ti bua o. Lani kuli ba todi ti, tin tua o danli.—Cogi mani Timote Tikpiali 2:4; Jan Tikpiali 5:3.