Bag-o lang natapos ang daku gid nga renovation project sa mga pasilidad sa branch sa Colombia. Nag-umpisa ini sang Pebrero 2019 kag natapos sang Marso 2023. Sobra 200 ka kauturan, lakip na ang mga volunteer halin sa Australia, Canada, Chile, Dominican Republic, England, kag United States, ang nagbulig sa pag-renovate.

Umpisa sang Hunyo 1, 2023, naka-tour na ang mga bisita sa bag-o gin-renovate nga mga pasilidad sa una nga tion. Si Brother John Rodriguez, nga nabawtismuhan sa tion sang COVID-19 nga pandemic, wala pa gid nakakadto sa branch office. Nagsiling sia: “Ang ginahimo diri nagapakita gid sang gugma kag gahom ni Jehova. Nalipay ako kag nagapasalamat nga bahin ako sining matahom nga organisasyon.” Ang isa pa ka brother nagsiling: “Nagdayaw gid ako kon paano gingamit sang mga utod ang pinakabag-o nga mga teknolohiya kag kagamitan. Ini nga renovation nagapakita nga nagauswag gid ang organisasyon ni Jehova.”

Ang branch office, nga makita 42 ka kilometro sa northeast sang Bogotá, Colombia, amo ang naga-organisar sang mga hilikuton sa Bolivia kag Colombia. Ang branch ang nagaimprinta sang mga publikasyon para sa sini nga mga pungsod pati man sa Ecuador, Peru, kag Venezuela. Makabulig gid ining bag-o nga renovation project sa pag-uswag sang hilikuton sa sini nga mga lugar. Sa kabilugan, sobra 350 ka kuarto kag mga opisina ang gin-renovate kag may 156 ka bag-o nga mga opisina ang ginhimo. Dugang pa, naghimo man sang bag-o nga mga classroom kag mga conference room gani naglawig pa gid ang ruta sang tour.

Si Brother Tait Boulais, ang coordinator sang construction committee, nagsiling: “Bisan pa may mga kabudlayan bangod sa COVID-19, ginpakamaayo gid ni Jehova ang hilikuton. Daku ang nabuhin sa mga personnel sa construction, pero nalipay gid ang mga volunteer nga magbulig sa mga trabaho nga gamay lang ukon wala gid sila sing eksperiensia. Pareho sa matutom nga mga alagad sang Dios sang una, nakita gid namon kon paano sila ginbuligan sang espiritu ni Jehova nga mangin eksperto sa ila mga trabaho.”

Nagasalig kita nga ining bag-o gin-renovate nga mga pasilidad sa branch makabulig sa mga kauturan kag sa madamo nga mga interesado nga nagatuon sang kamatuoran sa Biblia sa sining bahin sang kalibutan.—Binuhatan 1:8.