Sang Abril 30, 2023, natapos na ang pag-renovate sa 30 ka tuig na nga residence building sa branch sa Korea. Gin-renovate ang dining room sa bethel kag ang 62 ka kuarto sa residence building. Bangod sa pag-renovate nakakinot sa enerhiya ang mga bilding kag mas nangin safe kag komportable ang pamilya bethel. Sa 170 ka kauturan nga nag-volunteer sa pag-renovate, 71 ang wala pa gid nakaalagad sa mga construction project sang aton organisasyon sadto. Pagkatapos nila makabaton sang training sa pag-renovate sang bethel sa Korea, sobra 40 ang nangin kalipikado nga magbulig sa mga construction project sang aton organisasyon sa iban nga pungsod.

Si Sister Kim Ha-yeon nagsiling: “Nagapasalamat gid ako sa organisado nga pag-training sa amon sa renovation project sa branch sa Korea. Nalipay ako nga gamiton ining mga natun-an ko sa construction project sa Indonesia.”

Si Brother Lee Myong-Hoon, nga nakabulig man sa pag-renovate sa branch sa Korea, nagsiling: “Nakatuon ako sang importante gid nga mga skill samtang nagaobra ako sa sini nga proyekto. Mabudlay gid ang akon asaynment, pero ang mga safety guideline kag ang paghanas sang organisasyon nakabulig gid para mangin mahapos ang akon obra.” Subong, si Brother Lee malipayon na nga nagabulig sa construction project sa Pilipinas.

Nalipay kita kay natapos na ang pag-renovate sa branch sa Korea. Kon dumdumon naton sing maayo ang pagpangabudlay sang tanan nga nagbulig sa sini nga renovation project, lakip na ang mga nagaalagad kay Jehova subong sa iban nga lugar, nagapasalamat gid kita sa ila ‘buhat sang pagtuo kag mahigugmaon nga pagpangabudlay.’—1 Tesalonica 1:3.