Sa Georgia, nagpalapit ang isa ka tawo sa cart sang literatura, kag nagsinggit: “Indi ko kamo pagpasugtan nga magbantala diri! Cristiano nga Orthodox ang pungsod sang Georgia.” Mainayuhon nga ginpamangkot sang brother sa tupad sang cart ini nga tawo kon bala nakabasa na sia sang aton literatura. Nagsabat ang tawo, “Wala pa.” Mataktikanhon nga nagsiling ang brother nga basahon  niya anay ini. Bangod makatarunganon ang pagpakig-istorya sa iya, nagkalma sia kag nagkuha sing mga literatura. Pila ka adlaw sang ulihi, nagbalik ang tawo kag nangayo sing pasaylo. Nagsiling sia nga ginbasa niya ang aton magasin sa iya bulag nga iloy. Nanamian gid sila kag gusto nila magbasa sang iban pa. Regular na sia karon nga nagabisita sa aton cart kag nagakuha sang pinakabag-o nga magasin.

Sa Azerbaijan, nagapakigbahin sa ministeryo ang duha naton ka brother sang ginpanaksihan nila ang isa ka bataon nga lalaki nga nagatindog sa atubangan sang bilding. Nagsabat ang lalaki, “Indi ako mamati sa inyo kay isa ini ka sala.” Dayon, naggabot sia sang kutsilyo sa iya bulsa sa likod kag nagsiling, “Indi husto ang pagtratar sa akon, kag gamiton ko ini nga kutsilyo para makuha ang hustisya.”

Nakibot ang mga brother, pero nagsiling sila, “Sala ang magpatay.”

Nagsiling ang lalaki, “Ano ang himuon ko?” Ginbasa nila sa iya ang Roma 12:17-21 kag ginpaathag nga ang Dios ang magatimalos kag indi kita dapat ‘magpadaug sa malaut, kundi padayon nga daugon ang malaut paagi sa maayo.’ Ginsilingan nila sia parte sa gahom sang malulo nga hambal kag kon halitan ukon patyon niya ang isa ka tawo, konsiensiahon gid sia. Nagdayaw gid sia sa iya nabatian, kag dayon naglakat.

Pagligad sang mga isa ka oras, nakita liwat sang lalaki ang mga brother kag nagsiling: “Halin ako sa tawo nga luyag ko patyon. Wala ko sia ginhalitan, sa baylo ginhusay ko ang problema. Salamat gid kay nalikaw ninyo ako sa  paghimo sang gamo.” Ginpaathag sang mga brother nga si Jehova amo ang nagbulig sa iya.

Sang nagligad nga tinuig, isa ka sister sa Norway ang napahilayo sa kamatuoran. Sang gingamit na ang mga cart sa pagpanaksi sa publiko, pirme niya ini malabayan kon nagapamalaklon sia.

Wala gid sia magpalapit sa mga Saksi sa cart, pero natalupangdan niya ang makagalanyat nga mga poster kag matahom nga mga literatura, subong man ang mainabyanon nga hitsura kag maugdang nga pamustura sang mga Saksi. Ini tanan nagpahulag sa iya nga magbalik kay Jehova kag sa iya katawhan.

Natalupangdan man niya ang logo sang aton website nga jw.org, gani ginbuksan niya ini. Nagdayaw gid sia nga mahapos lang pangitaon ang adres sang pinakamalapit nga Kingdom Hall kag ang iskedyul sang mga miting. Nag-download sia sing pila ka publikasyon kag nagkadto sa Kingdom Hall bisan pa nakulbaan kag nabalaka. Gin-abiabi gid sia, kag naghimo sang kahimusan ang mga gulang agod tun-an sia sa Biblia sang isa ka sister. Wala magdugay, may mga abyan na sia sa kongregasyon kag napasag-uli ang iya espirituwal nga rutina. Subong, regular na sia nga nagapakigbahin sa mga miting kag sa ministeryo, kag malipayon nga nangin suod sia liwat kay Jehova.

Sa isa ka school bus sa Norway, ang 15 anyos nga si Ronja kag ang iya tatlo ka klasmeyt nga lalaki nagdiskusyon parte sa ebolusyon. Wala nila gintahod ang iya ginapatihan, gani nahuy-an ang aton sister. Nagbatyag sia nga  wala sia makapangapin kay madugay na nga wala sia makaistorya parte sa sini nga topiko, gani nagpabulig sia sa iya iloy sa pagpangita sang makapakumbinsi nga mga argumento nga may Manunuga.

Sa school bus pagkasunod nga adlaw, gingamit ni Ronja ang nahanda niya nga mga argumento. Pero ginyaguta lang nila ang iya pagpati kay Jehova. Nagsinggit ang isa sa ila: “Wala sing nagapati kay Jehova sa sini nga bus! Sige, alsa ang kamot. Sin-o ang nagapati sa ebolusyon, kag sin-o naman ang nagapati kay Jehova?” Nakibot si Ronja sang ang 12 anyos nga lalaki nga nagapungko malapit sa iya nag-alsa sang kamot kag nagsiling, “Nagapati ako kay Jehova!” Ang duha pa ka bata nagsiling, “Ako man!” Nabatian sang iban nga estudyante ang diskusyon nanday Ronja kag sang iya mga klasmeyt, kag ang pila sa ila nakumbinsi sa iya mga argumento!

Isa ka hapon, duha ka lalaki nga taga-Syria nga nagahambal sing Arabic ang nagkadto sa sanga talatapan sa Denmark. Ginhambalan nila ang mga sister sa reception desk nga ginapangita nila ang mga Saksi ni Jehova. Nalipay gid ining mga lalaki sang nahibaluan nila nga husto ang ila ginkadtuan. Paano nila ini natultulan? Ginpakita nila sa nagaobra sa pangpubliko nga librarya ang piktyur nga kuha sang ila cellphone. Piktyur ini sang pahina sang mga manugbalhag sang libro nga Ano Gid ang Ginatudlo sang Biblia? sa Arabic. Dayon ginhatag sang nagaobra sa librarya ang adres sang sanga talatapan.

Nabudlayan makig-istorya sa Danish ining duha ka lalaki. Gani ginpakadto sa reception area ang isa ka brother nga nagahambal sing Arabic. Nabal-an sang kauturan nga ang isa sa mga lalaki interesado nga madugangan ang iya nahibaluan sa Biblia. Ginpangayo sang brother ang iya impormasyon para makontak sia kag nagpromisa nga duawon sia dayon upod sa isa ka brother nga nagahambal man sing Arabic.

Sang nagbisita ang mga brother sa iya balay, nabal-an nila nga wala pa gid sia maduaw sang mga Saksi ni Jehova. Gin-istorya niya nga nakita niya ang libro sa iya mailbox, bisan wala sing palatandaan sa mailbox nga nagahambal sing Arabic ang tag-iya sini. Bangod indi sia makahibalo magbasa, ginpangabay niya ang isa sa iya mga abyan nga basahon ang libro sa iya kag natapos nila ini sa tatlo ka adlaw. Kumbinsido gid sia sa iya nabatian nga nasapwan niya ang kamatuoran.

Mabudlay gid para sa iya nga mapahilayo sa iya pamilya bilang isa ka refugee, pero nalugpayan gid sia sang Biblia. Sa una nga pagbisita sang mga brother, namangkot sia:  “Ngaa wala ninyo ako mabisitahan sang una? Kinahanglan ko gid ini.” Padayon sia nga nagatuon sa Biblia upod sa mga brother kag nalipay gid sia sa iya mga natun-an.

Si Dmitry isa ka manedyer sa isa ka kompanya sang tabako sa Ukraine, pero sang nangin mas maathag sa iya ang malain nga epekto sang pagpanigarilyo sa lawas, naghalin sia sa iya obra bisan pa daku ang sueldo. Wala madugay, napatay ang iya iloy kag ugangan nga babayi sa sulod lang sang tatlo ka bulan. Naglalain gid sia sang napatay ang iya mga pinalangga. Naglaum sia nga makabaton sing lugpay kag sabat sa iya mga pamangkot halin sa ila simbahan, pero wala gid niya ini mabaton. Ginsilingan sia sang iya abyan nga kon Cristiano nga Orthodox ka, “nagakulintas ka sing krus pero wala ka sing nahibaluan parte sa Dios.” Amo gid sini ang ginbatyag ni Dmitry. Narealisar niya nga wala sia sing nahibaluan parte sa Dios ukon sa Biblia. Halos wala na sia sing paglaum, gani nangamuyo sia agod mangayo sing bulig. Dayon, nadumduman niya ang parte sa mga Saksi ni Jehova. Ginpangita niya ang aton website sa Internet kag nagdayaw gid sia kay nagaunod ini sing madamo nga impormasyon parte sa Biblia. Ginpangita niya dayon ang pinakamalapit nga Kingdom Hall. Pag-abot niya sa parkingan, gin-abiabi sia sang atendant kag ginpamangkot kon paano sia mabuligan. Nagsiling si Dmitry, “Kinahanglan ko magtuon sa Biblia.” Sa karon, anom ka bulan na sia nga nagatuon sa Biblia kag regular nga nagatambong kag nagapakigbahin sa mga miting.

Sanday Paul kag Faith nga taga-Britain nagpakig-istorya sa isa ka babayi nga si Susan kag nagsugtanay sila nga  duawon sia liwat. Pagbalik nila, wala si Susan sa iya balay. Ginsunod nanday Paul kag Faith ang panugda sa Nobiembre 2014 nga Ang Aton Ministeryo sa Ginharian parte sa mga nota, gani nagbilin sila sang nota nga nagasiling nga mabalik sila buas. Pagbalik nila, nakibot sila nga may ginbilin si Susan nga nota sa puertahan para sa ila. Ginpaathag niya nga namalaklon sia para sa kasal sang iya bata nga babayi. Nagbilin liwat sing nota sanday Paul kag Faith nga nagasiling nga mabalik sila liwat sa masunod nga semana. Sa sini nga tion, naghulat si Susan sa ila kag nasugdan ang pagtuon sa Ginatudlo sang Biblia nga libro.

Bangod kalaslon ang iya bata, nangabay si Susan nga indi lang sila anay magkadto sa masunod nga iskedyul sang pagtuon. Pagbisita liwat nanday Paul kag Faith, wala sing nagasabat, gani nagbilin sila sing nota nga may numero sang ila cellphone. Nalipay gid sila sang nag-text si  Susan kag nangayo sing pasensia nga wala niya sila mabatian kay sadto nga tion nagaistorya sia sa iya kaingod sa iya hardin. Sugod sadto regular na nga nagatuon sa Biblia si Susan, kag sining karon lang nagtambong sia sa miting sa una nga tion.

Nanamian gid sanday Paul kag Faith nga magbilin sing mga nota para matatap ang mga interesado. “Madamo pa sa amon ginduaw liwat ang nakabasa sing mga nota nga amon ginbilin. Epektibo gid ini!”

Sang Agosto 2014, naospital ang isa ka brother sa Hungary bangod sang pulmonary embolism. Makapasubo nga wala magdugay ang iya kabuhi. Nagsulat ang asawa sang brother parte sa nars nga si Tünde nga daku gid ang nabulig sa ila:

“Sang tig-ilinit sang 2015, nagtambong kami sang akon bata nga lalaki sa ‘Iluga si Jesus!’ Rehiyonal nga Kombension. Sang manugpauli na kami sang ikatlo nga adlaw, sa parkingan, may isa ka babayi nga nagpundo sa akon atubangan, dayon ginbuy-an niya ang iya mga dala, tapos ginhakos ako, kag naghibi. Amo ini ang nars nga nag-atipan sa akon bana sa intensive care unit (ICU) halos isa na ka tuig ang nagligad. Ginpaathag niya nga sa kada sugod sang ila obra, ginaasayn ang isa ka nars nga mag-atipan sa isa ka pasyente. Pirme gid niya ginapangamuyo nga tani maasayn sia sa akon bana. Kag amo gid sini ang pirme nagakatabo!

“Suno kay Tünde, ang maayo nga paggawi sang akon bana bangod sang iya ginatuuhan kag ang pirme niya nga pag-istorya parte sa iya paglaum amo ang nagpahulag sa iya nga kinahanglan niya tun-an sing maayo ang Biblia upod sa mga Saksi ni Jehova.

 “Sa karon, nagatuon na sa Biblia si Tünde kag nalangkag sia sa tion nga makita niya liwat ang akon bana. Gusto niya isugid sa akon bana nga bangod sang iya paggawi kag mabakod nga pagtuo, nabuligan sia nga makilala si Jehova kag mahibaluan ang Iya matahom nga mga saad.”

Bangod sang mga protesta kag barikada, kon kaisa sirado ang pila ka checkpoint sa dulunan sang Greece kag Bulgaria, gani grabe kalaba ang pila sang salakyan. Ginhingalitan ini sang isa ka kongregasyon sa Bulgaria nga malapit sa lugar kag nagpahamtang sing literatura sa Biblia sa mga nagapila. Nagdala ang kauturan sing mga literatura sa 12 ka lenguahe. Madamo sa mga drayber sang trak ang kapoy kag nalugaw-an, pero luyag gihapon nila makig-istorya. Ginpamatian gid sila sang kauturan, dayon ginpaambit sa ila ang paglaum halin sa Biblia kag ginpalig-on sila. Namangkot ang isa ka drayber, “Mga Saksi ni Jehova kamo?” Sang nabal-an niya nga mga Saksi gid man, nagsiling pa sia, “Siling ko gid! Kay mga Saksi ni Jehova lang ang nagabantala pareho sang ginahimo ninyo.” Ang isa ka Austrian nga drayber nagsiling: “Indi man kami makapalagyo sa inyo ba! Maayo gid! Palihug indi kamo mag-untat sa paglugpay kag paghatag sing paglaum sa mga tawo.” May isa pa nga nagsiling: “Wala gid ako gana magbasa sang inyo literatura. Pero subong, basahon ko gid ini.” Naghibi naman ang isa ka drayber sang ginbantalaan sia sang isa ka brother. Nagsiling sia nga Saksi sia sang una. Ginpalig-on sia sang kauturan nga basahon ang literatura kag makig-angot sa isa ka kongregasyon.