ANG emperor penguin mahimo makalangoy sa tubig kag makalumpat sa yelo sing tuman kadasig. Paano?

Binagbinaga: Ginatipon sang emperor penguin ang hangin sa iya mga bulbol. Wala lamang ini nagapainit sa pispis kon tuman ka tugnaw kundi nagapadasig man ini sa iya sing duha ukon tatlo ka beses. Paano? Ginasiling sang mga marine biologist nga ginahimo niya ini paagi sa pagpagua sang magagmay nga bukal sang hangin halin sa mga bulbol sini. Samtang nagagua ini nga mga bukal, nagadanlog pa gid ang bulbol sang penguin, amo nga nagadasig ini.

Ginatun-an sang mga engineer kon paano magdasig ang mga barko paagi sa paggamit sang bukal agod magdanlog ang kasko sini. Pero ginabaton sang mga researcher nga mabudlay ang pagtuon sini kay “komplikado katama ang pagkahuman sang bulbol sang penguin kag nabudlayan sila nga ilugon ini.”

Ano sa banta mo? Ang bulbol bala sang penguin resulta sang ebolusyon? Ukon gindesinyo ini?