Nabatyagan mo na bala nga wala ka sing mahimo kon ang isa nga suod sa imo nagapangasubo bangod namatyan sia sang iya pinalangga? Kon kaisa indi kita sigurado kon ano ang aton ihambal ukon himuon—gani wala na kita sang nahambal ukon nahimo. Pero may mabulig kita.

Sa masami, ang imo presensia kag ang pagsiling nga “Ginakasubo ko ang natabo,” makalugpay na sa namatyan. Sa iban nga kultura, ang paghakos ukon pagpisga sing mahinay sa butkon isa ka paagi nga mapakita mo ang simpatiya. Kon gusto mag-istorya sang isa nga namatyan, pamatii sia sing maayo. Labaw sa tanan, buligi ang namatyan, ayhan paagi sa paghimo sang mga butang nga indi nila mahimo pareho sang pagluto, pag-atipan sang kabataan, ukon pagbulig sa mga kahimusan sa lubong kon kinahanglanon. Mas daku ang mabulig sini sangsa hambal.

Sa ulihi, mahimo ninyo istoryahan ang parte sa napatay, ayhan ang iya maayo nga mga kinaiya ukon makalilipay nga mga eksperiensia. Ini nga pag-istoryahanay mahimo makapayuhum sa isa nga namatyan. Halimbawa, si Pam—nga napatay ang bana nga si Ian anom ka tuig na ang nagligad—nagsiling: “Kon kaisa ginasugiran ako sang  iban sang maayo nga hinimuan ni Ian nga wala ko nabal-an, kag nalipay gid ako sa sini.”

Suno sa mga researcher madamo sang namatyan nga sang primero ginbuligan sang ila mga abyan pero sang ulihi napabay-an na sila kay masako na ang ila mga abyan. Gani, tinguhai nga makontak sing regular ang imo abyan nga namatyan. * Ginaapresyar gid ini sang madamo nga ginasubuan kay nakapahaganhagan ini sang kasubo nga madugay na nila nabatyagan.

Binagbinaga ang halimbawa ni Kaori, isa ka pamatan-on nga babayi nga taga-Japan nga nasubuan gid bangod napatay ang iya iloy kag pagligad lang sang 15 ka bulan napatay man ang iya magulang nga babayi. Maayo lang kay padayon sia nga ginabuligan sang iya mainunungon nga mga abyan. Ang isa sa ila amo si Ritsuko nga mas magulang kay Kaori nga nangin suod gid sa iya. “Ang matuod,” siling ni Kaori, “wala ako nalipay sa sini. Indi ko gusto nga may mabulos sa akon iloy, kag sa banta ko wala gid sing makabulos sa iya. Pero bangod sa pagpakig-angot sa akon ni Mama Ritsuko, nangin suod ako sa iya. Kada semana, updanay kami nga nagabantala kag nagatambong sa pagtilipon sang mga Cristiano. Madamo nga beses nga ginaagda niya ako nga mainom sang tsa, ginadal-an niya ako sing pagkaon, ginasulatan, kag ginapadal-an sang mga kard. Maayo ang impluwensia sa akon sang positibo nga panimuot ni Mama Ritsuko.”

Dose ka tuig na nga napatay ang iloy ni Kaori, kag sa karon sia kag ang iya bana bug-os tion nga mga ebanghelisador. “Si Mama Ritsuko,” siling ni Kaori, “padayon nga nagaulikid sa akon. Kon magpauli ako, ginabisitahan ko sia pirme kag napalig-on gid ako sa pagpakig-upod sa iya.”

Ang isa pa nga nakabenepisyo sa padayon nga pagbulig sa iya amo si Poli nga isa ka Saksi ni Jehova sa Cyprus. Mabuot ang bana ni Poli nga si Sozos, kag maayo sia nga halimbawa bilang isa ka Cristianong manugbantay. Pirme niya ginaagda ang mga ilo kag balo nga magkaon sa ila balay. (Santiago 1:27) Makapasubo nga sa edad nga 53 napatay si Sozos bangod sang tumor sa utok. “Napatay ang akon bana nga kaupod ko sing 33 ka tuig,” siling ni Poli.

Pagkatapos sang lubong, nagsaylo si Poli sa Canada upod ang iya 15 anyos nga kinagot nga bata nga si Daniel. Nakig-upod sila didto sa isa ka kongregasyon sang mga Saksi ni Jehova. “Ang mga abyan ko sa akon bag-o nga kongregasyon,” siling ni Poli, “wala makahibalo sang amon inagihan kag mabudlay nga kahimtangan. Pero ginapalapitan nila kami kag ginalugpayan paagi sa ila ginahambal kag pagbulig sa amon. Daku gid ini nga bulig, ilabi na sadtong tion nga kinahanglan gid sang akon anak ang iya amay! Ang mga nagapanguna sa kongregasyon nagpakita gid sing personal nga interes kay Daniel. Ginapat-od sang isa sa ila nga makaupod si Daniel kon maghampang sila sang bola.” Maayo na karon ang kahimtangan sang mag-iloy.

Maathag nga madamo sing paagi nga makabulig kita kag makalugpay sa mga nagalalaw. Ginalugpayan man kita sang Biblia paagi sa makalilipay nga paglaum sa palaabuton.