Mga Panudlo nga Nagahatag sing Paglaum
May ginpromisa ang Dios nga himuon niya sa indi na lang madugay. Tapuson niya ang pag-antos, kag ang mga pamilya sa duta magakabuhi na sing malipayon. (Salmo 37:11) Ngaa masaligan naton ini nga promisa? Bangod “ang Dios indi isa ka tawo nga nagabinutig.” (Numeros 23:19) Hibaluon naton ang pila sa maayo nga mga butang nga himuon sang aton Manunuga.
Dulaon sang Dios ang Malain nga mga Tawo
“Kon ang malauton magtubo kaangay sang mga gamhon kag ang tanan nga makasasala maglambo, ini agod pagalaglagon sila sing dayon.”—SALMO 92:7.
Natun-an naton sa nagligad nga artikulo nga madamo na gid ang malain nga nagakatabo subong. Indi na kita dapat matingala sa sini. Gintagna sa Biblia sa 2 Timoteo 3:1-5 nga “sa katapusan nga mga adlaw” mangin malain gid ang mga tawo. Katapusan nga mga adlaw sang ano? Sang kalibutan sang mga tawo nga wala nagatuman sa Dios. Sa indi na lang madugay, laglagon ukon dulaon sang Dios ang mga tawo nga indi gusto magbag-o. Ang mabilin na lang diri sa duta amo ang maayo nga mga tawo nga nagatuman sa Dios. “Ang mga matarong magapanubli sang duta, kag magapuyo sila sa sini sa wala sing katubtuban.”—Salmo 37:29.
Dulaon sang Dios si Satanas
“Ang Dios nga nagahatag sing paghidait magadugmok kay Satanas.”—ROMA 16:20.
Kon wala na ang mga malain, lakip si Satanas kag ang mga demonyo, may paghidait na sa bilog nga duta. Ang aton Manunuga nagapromisa: “Wala sing magapahadlok sa [imo].”—Miqueas 4:4.
Dulaon sang Dios ang Balatian kag Kamatayon
“Ang tolda sang Dios yara sa mga tawo . . . Kag pahiran niya ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa.”—BUGNA 21:3, 4.
Kay-uhon sang Dios ang halit nga epekto sang ginhimo ni Satanas, ni Adan, kag ni Eva, kag pati man ang halit nga epekto sa aton bangod indi kita perpekto. Madula na ang pag-antos kag balatian kag “wala na sing kamatayon.” Ang mga tawo nga nagapalangga kag nagatuman sa Manunuga magakabuhi sing wala katapusan. Pero diin sila magaistar?
Himuon sang Aton Manunuga nga Paraiso ang Duta
“Ang kamingawan kag ang kigas nga duta magahugyaw, kag ang desyerto nga kapatagan magakalipay kag mapuno sing mga bulak.”—ISAIAS 35:1.
Kon laglagon na sang Dios ang tanan nga malain, mangin paraiso na ang duta! Bisan diin ka, may matahom na nga mga park kag mga garden, kag ang duta magapatubas na sang madamo nga pagkaon. (Salmo 72:16) Mangin matinlo na ang mga dagat, ang mga linaw, kag ang mga suba kag mapuno na ini sang kabuhi. Bisan gani ang tinaga nga “polusyon” mahimo indi mo na mabatian! Ang mga tawo may ilistaran na kay magapatindog sila sang ila kaugalingon nga mga balay, kag wala na sing ginagutom ukon pigado.—Isaias 65:21, 22.
Buhion Liwat sang Dios ang mga Patay
“May pagkabanhaw.”—BINUHATAN 24:15.
Gusto mo bala makita liwat ang imo napatay nga mga pinalangga? Buhion sila liwat ukon banhawon sang labing gamhanan nga Dios sa Paraiso nga duta. Makilala mo sila kag makilala ka man nila. Sigurado nga malipay ka gid upod sa ginbanhaw mo nga mga pinalangga! Ngaa masaligan gid naton ini nga paglaum? Bangod mabasa naton sa Biblia ang parte sa ginbanhaw nga mga tawo kag kabataan, kag nakaupod nila liwat ang ila pamilya. Dugang pa, sa kada may ginbanhaw si Jesus, madamo nga tawo ang nakakita sini.—Lucas 8:49-56; Juan 11:11-14, 38-44.
Basi Manamian Ka Man
MAGMATA!
Nagalala nga Sitwasyon sa Kalibutan—Proteksioni ang Imo Paglaum
Ginabuligan kita sang Biblia nga atubangon ang mga problema sa kabuhi kag nagahatag man ini sing paglaum sa palaabuton.
SABAT SA MGA PAMANGKOT SA BIBLIA
Paghidait sa Duta—Paano?
Hibalua ang promisa sang Dios nga paghidait sa kalibutan paagi sa iya Ginharian.
