1, 2. (a) Ngaa indi kita dapat matingala kon magkabalaka kita? (Tan-awa ang piktyur sa umpisa sini nga artikulo.) (b) Ano ang binagbinagon sa sini nga artikulo?

NAGAKABUHI kita sa pinakamabudlay nga tion. Naakig gid si Satanas nga Yawa kag “nagaluyong [sia] subong sang nagangurob nga leon, nga nagapangita sing tulukbon.” (1 Ped. 5:8; Bug. 12:17) Gani, indi katingalahan nga kon kaisa, bisan kita nga mga alagad sang Dios magakabalaka. Bisan gani ang mga alagad ni Jehova sang una, pareho ni Hari David, ‘nagakabalaka’ kon kaisa. (Sal. 13:2) Dumduma man nga si apostol Pablo “nagakabalaka sa tanan nga kongregasyon.” (2 Cor. 11:28) Pero ano ang himuon naton kon grabe ang aton kabalaka?

² Ang aton mahigugmaon nga Amay sa langit nagbulig sa iya mga alagad sang una, kag buligan man niya kita nga maghaganhagan ang aton kabudlayan ukon kabalaka. Ginapalig-on kita sang Biblia: “[Itugyan] ninyo sa iya ang tanan ninyo nga kabalaka, kay nagaulikid sia sa inyo.” (1 Ped. 5:7) Pero paano naton mahimo ina? Binagbinagon naton ang apat ka paagi nga mahimo ini—paagi sa hanuot nga pangamuyo, paagi sa pagbasa sang Pulong sang Dios kag pagpamalandong sa sini, paagi sa pagtigayon sang  balaan nga espiritu ni Jehova, kag paagi sa pagsugid sang imo ginabatyag sa imo ginasaligan. Samtang ginabinagbinag naton ining apat, talupangda kon ano nga praktikal nga mga panugda ang imo sundon.

3. Paano mo ‘matugyan ang imo lulan kay Jehova’ paagi sa pangamuyo?

³ Ang una nga himuon naton amo ang pagpangamuyo sing hanuot kay Jehova. Kon may mga kahimtangan nga nagapakulba sa aton, indi kita mapahamtang, ukon nagakabalaka kita, mangamuyo sing hanuot sa aton mahigugmaon nga Amay sa langit. Si salmista David nagpakitluoy kay Jehova: “O Dios ko, pamatii ang akon pangamuyo.” Nagsiling pa sia: “Itugyan ang imo lulan kay Jehova, kag sia magaalay-ay sa imo.” (Sal. 55:1, 22) Daku gid ang mabulig sang pangamuyo ilabi na kon ginhimo mo na ang imo bug-os nga masarangan sa paglubad sang problema. Pero paano makabulig sa imo ang pangamuyo para indi ka masobrahan sa pagkabalaka?—Sal. 94:18, 19.

4. Ngaa importante gid ang pagpangamuyo kon nabalaka kita?

⁴ Basaha ang Filipos 4:6, 7. Paano sabton ni Jehova ang aton hanuot kag padayon nga pagpangamuyo? Paagi sa pagbulig sa aton nga mangin kalmado kag malikawan naton ang negatibo nga mga panghunahuna kag balatyagon. Madamo ang nakaeksperiensia sini. Ginbuligan sila sang Dios nga mangin kalmado sang nabalaka gid sila, kag amo ini ang pinakamalinong nga balatyagon nga matigayon sang isa. Pero maeksperiensiahan mo man ini. Gani ang “paghidait sang Dios” makabulig sa imo nga malandas ang ano man nga pagtilaw. Makasalig ka sa mahigugmaon nga saad ni Jehova: “Indi ka magkabalaka, kay ako imo Dios. Pabaskugon ko ikaw, huo, buligan ko ikaw.”—Isa. 41:10.

5. Paano ang Pulong sang Dios makahatag sa aton sing kalinong sang hunahuna?

⁵ Ang ikaduha nga himuon naton para may kalinong kita sa hunahuna amo ang pagbasa sang mga teksto sa Biblia kag pamalandungan ini. Ngaa importante ini? May praktikal nga mga panuytoy ang Biblia halin sa Dios nga makabulig sa imo nga malikawan, mapahaganhagan, ukon maatubang ang kabalaka. Indi pagkalimti nga makabulig kag makapaumpaw ang Pulong sang Dios bangod nagaunod ini sang kaalam halin sa aton Manunuga. Samtang ginapamalandungan mo kada adlaw ang panghunahuna sang Dios kag ginabinagbinag kon paano gamiton ang praktikal nga panuytoy sang Biblia, magabakod ka pa gid. Maathag nga ginpakita ni Jehova nga may koneksion ang pagbasa sang iya Pulong sa ‘kaisog kag kabakod’ kag sa ‘indi pagkahadlok.’—Jos. 1:7-9.

6. Ano ang maayo nga epekto sa imo sang mga pinamulong ni Jesus?

⁶ Masapwan naton sa Pulong sang Dios ang makapaumpaw nga mga pinamulong ni Jesus. Napalig-on ang iya mga tagpalamati sa iya ginahambal kag ginatudlo. Madamo ang nagpalapit sa iya kay ginapaumpawan niya ang mga nagakasubo, ginapabakod niya ang mga maluya, kag ginalugpayan niya ang mga ginapung-awan. (Basaha ang Mateo 11:28-30.) Nagaulikid sia sa mga kinahanglanon sang iban sa espirituwal, sa emosyon, kag sa pisikal. (Mar. 6:30-32) Ang saad ni Jesus nga magsakdag padayon asta subong. Pareho man ang himuon ni Jesus sa imo sa iya ginhimo sa mga kaupod niya nga apostoles. Indi kinahanglan nga upod mo gid si Jesus para makabenepisyo sa sini. Bilang Hari sa langit, padayon nga nagapakita sang pag-ulikid si Jesus. Gani kon nabalaka ka, may kaluoy nga ‘buligan ka niya’ sa ‘tion nga nagakinahanglan ka sang bulig.’ Huo, makabulig  si Jesus sa imo nga maatubang ang problema, kag mapabakod niya ang imo paglaum kag kaisog.—Heb. 2:17, 18; 4:16.

7. Ano ang resulta kon hatagan ka sang Dios sang balaan nga espiritu?

⁷ Nagsaad si Jesus nga ang aton Amay sa langit pirme magahatag sang balaan nga espiritu sa mga nagapangayo sa Iya. (Luc. 11:10-13) Ang mga kinaiya nga ginapatubas sang espiritu sang Dios amo ang ikatlo kag gamhanan nga bulig sa pagpahaganhagan sang imo kabalaka. Ginapakita sini ang mga kinaiya sang labing gamhanan nga Dios. (Basaha ang Galacia 5:22, 23; Col. 3:10) Samtang ginapalambo mo ang mga kinaiya nga ginapatubas sang espiritu, magauswag ang imo kaangtanan sa iban. Gani malikawan mo ang mga kahimtangan nga mahimo ka mabalaka. Binagbinaga kon paano makabulig sa imo ang mga kinaiya nga ginapatubas sang espiritu.

8-12. Paano ang mga kinaiya nga ginapatubas sang balaan nga espiritu sang Dios makabulig sa imo nga maatubang ukon malikawan ang mabudlay nga mga kahimtangan?

⁸ “Gugma, kalipay, paghidait.” Kon ginatinguhaan mo nga makig-angot sing matinahuron sa mga tawo, magabuhin ang imo kabalaka. Paano? Kon ipakita mo ang utudnon nga gugma, kag kon palanggaon mo kag padunggan ang mga tawo, malikawan mo ang mga kahimtangan nga makatuga sing kabalaka.—Roma 12:10.

⁹ “Pagkamapinasensiahon, maayo nga kabubut-on, kaayo.” Mangin mahidaiton ka sa iban kon sundon mo ini nga laygay: “Mangin mainayuhon kamo sa isa kag isa, mangin maluluy-on, nga nagapatawad sing kinabubut-on sa isa kag isa.” (Efe. 4:32) Malikawan mo ang mga kahimtangan nga tunaan sang kabalaka. Mahapos mo man maatubang ang mga kahimtangan nga resulta sang indi kahimpitan.

¹⁰ “Pagtuo.” Ang kalabanan subong nga ginatunaan sang kabalaka amo ang kuarta kag mga pagkabutang. (Hulu. 18:11) Ang makabulig sa imo nga maatubang ini amo ang imo malig-on nga pagtuo nga atipanon ka ni Jehova. Paano? Malikawan mo ang madamo nga kabalaka kon sundon mo ang inspirado nga laygay ni apostol Pablo nga dapat “mangin kontento kamo sa mga butang nga yara sa inyo.” Nagdugang sia: “Kay ang Dios nagsiling: ‘Indi ko gid kamo pagbayaan, kag indi ko gid kamo pagpabay-an.’ Gani, makasiling kita nga may pagsalig: ‘Si Jehova ang akon manugbulig; indi ako magkahadlok. Ano ang mahimo sang tawo sa akon?’”—Heb. 13:5, 6.

¹¹ “Kalulo, pagpugong sa kaugalingon.” Praktikal gid kag mapuslanon kon ipakita mo ini nga mga kinaiya. Malikawan mo ang mga buhat nga mahimo magtuga sa imo sing kabalaka, kag mangin maayo ang imo kahimtangan kon likawan mo ang “dumot, kaakig, kasingkal, sininggitanay, [kag] masakit nga hambal.”—Efe. 4:31.

¹² Kinahanglan mo magpaubos para makasalig ka sa “gamhanan nga kamot sang Dios” kag para ‘matugyan mo sa iya ang tanan mo nga kabalaka.’ (1 Ped. 5:6, 7) Pero samtang ginatinguhaan mo nga mangin mapainubuson, kahamut-an ka kag suportahan sang Dios. (Miq. 6:8) Kon batunon mo ang imo mga limitasyon, mahimo nga indi ka madaug sang kabalaka kay magasalig ka pa gid sa Dios.

13. Ano ang buot silingon ni Jesus sang magsiling sia: ‘Indi gid magkabalaka’?

¹³ Sa Mateo 6:34 (basaha), may ginlaygay si Jesus: ‘Indi gid magkabalaka.’ Pero daw kabudlay sini sundon. Ano ang buot silingon ni Jesus sang magsiling sia: ‘Indi gid magkabalaka’? Maathag nga indi buot  silingon ni Jesus nga ang alagad sang Dios indi gid makaeksperiensia sing kabalaka; nahibaluan na naton ang ginsiling nanday David kag Pablo parte sa sini. Pero luyag pahangpon ni Jesus ang iya mga disipulo nga indi makalubad sing mga problema ang indi nagakaigo, ukon sobra nga kabalaka. Kada adlaw may mga problema, gani indi dapat pag-ilakip sang mga Cristiano sa ila ginakabalak-an subong ang nagligad ukon ang mga problema sa palaabuton. Paano mo sundon ang laygay ni Jesus para mabuhinan ang imo mga ginakabalak-an?

14. Ano ang imo himuon kon ginakabalak-an mo ang imo nagligad nga mga buhat?

¹⁴ Ang pila nga ginakabalak-an sang isa mahimo amo ang iya mga buhat ukon sala sang una. Mahimo ginakonsiensia sia sang iya ginhimo sadto, bisan pila na ka tuig ang nagligad. Si Hari David nagbatyag kon kaisa nga ang iya “mga sala tagalumapaw.” Gin-aku niya: “Nag-ugayong ako bangod sang kalisod sang akon tagipusuon.” (Sal. 38:3, 4, 8, 18) Ano ang maayo nga himuon ni David sa sini nga kahimtangan? Ano ang iya ginhimo? Nagsalig sia nga kaluy-an kag patawaron ni Jehova. Nalipay sia nga nagsiling: “Malipayon ang isa nga ang iya paglapas ginpatawad.”—Basaha ang Salmo 32:1-3, 5.

15. (a) Ngaa indi ka dapat magkabalaka sa nagakatabo subong? (b) Anong praktikal nga mga paagi ang mahimo mo para mabuhinan ang imo kabalaka? (Tan-awa ang kahon nga “ Pila ka Praktikal nga Paagi nga Mabuhinan ang Kabalaka.”)

¹⁵ Kon kaisa, mahimo mabalaka ka sa nagakatabo subong. Halimbawa, sang ginsulat ni David ang Salmo 55, nahadlok sia nga patyon. (Sal. 55:2-5) Pero wala madula sang kabalaka ang iya pagsalig kay Jehova. Ginpangamuyo ni David ang iya mga problema, pero naghimo man sia sing praktikal nga mga paagi para madula ang iya ginakabalak-an. (2 Sam. 15:30-34) May matun-an kita kay David. Sa baylo nga magpadaug sa kabalaka, himua ang imo masarangan sa paglubad sang problema, kag magsalig kay Jehova nga atipanon ka niya.

16. Paano mapabakod ang imo pagtuo sang kahulugan sang ngalan sang Dios?

¹⁶ Kon kaisa mahimo mabalaka ang isa ka Cristiano parte sa posible nga mga problema sa palaabuton. Pero indi ka dapat magkabalaka sa mga butang nga wala pa matabo. Ngaa? Kay sa masami wala nagakatabo ang aton ginakabalak-an. Dugang pa, wala sing kahimtangan nga indi makontrol sang Dios. Ang iya mismo ngalan nagakahulugan sing “Ginapahanabo Niya nga Mangin Amo.” (Ex. 3:14) Gani indi kita dapat mahadlok sa palaabuton kay ginapakita sang ngalan sang Dios nga matuman ang tanan niya nga katuyuan para sa iya mga alagad. Makasalig ka nga pakamaayuhon sang Dios ang mga matutom sa iya kag buligan niya sila nga mabuhinan ang ila ginakabalak-an parte sa nagligad, subong, kag sa palaabuton.

17, 18. Paano makabulig ang maayo nga komunikasyon kon nagakabalaka ka?

¹⁷ Ang ikap-at nga imo himuon para mabuhinan ang imo kabalaka amo ang maayo nga  komunikasyon, ang pagsugid sang imo ginabatyag sa imo ginasaligan. Mahimo makabulig sa imo ang imo tiayon, suod nga abyan, ukon gulang sa kongregasyon para mahangpan mo ang imo kahimtangan. “Ang kabalaka sa tagipusuon sang tawo nagapabug-at sini, apang ang maayo nga pulong nagapasadya sa iya.” (Hulu. 12:25) Daku ang mabulig sang prangka kag maayo nga komunikasyon para mahangpan mo kag maatubang ang imo mga ginakabalak-an. Ang Biblia nagasiling: “Mapaslawan ang mga plano kon wala sing paghambalanay, apang magamadinalag-on ini kon may madamo nga manuglaygay.”—Hulu. 15:22.

¹⁸ Ginabuligan man ni Jehova ang mga Cristiano para maatubang nila ang ila mga ginakabalak-an paagi sa mga miting sang kongregasyon kada semana. Mangin kaupod mo ang imo mga masigkatumuluo nga nagakabalaka sa imo kag luyag magpalig-unay sa isa kag isa. (Heb. 10:24, 25) Ini nga ‘pagpalig-unay’ makapalig-on sa imo kag magapahapos para malandas mo ang bisan ano nga imo ginakabalak-an.—Roma 1:12.

19. Ngaa makasalig ka nga kon may maayo ka nga kaangtanan sa Dios, palig-unon ka sini?

¹⁹ Natun-an sang isa ka gulang sa Canada kon daw ano ka importante nga itugyan ang iya kabalaka kay Jehova. Mabudlay ang iya trabaho bilang manunudlo kag counselor, kag may balatian sia nga ginahalinan sang iya kabalaka. Ano ang nakabulig sa sini nga utod? Nagpaathag sia: “Gintinguhaan ko gid nga palig-unon ang akon kaangtanan kay Jehova kay amo ini ang nagapabakod gid sa akon sa pag-atubang sang akon mga problema. Nakabulig man sa akon ang matuod nga mga abyan kag ang akon espirituwal nga mga kauturan. Ginasugid ko sa akon asawa ang akon tanan nga ginabatyag. Ginbuligan ako sang masigkagulang kag sang amon manugtatap sang sirkito nga tamdon sing husto ang akon kahimtangan. Nagpadoktor man ako, ginpasibu ko ang akon tion, kag naghinguyang ako sang tion sa pagrelaks kag pag-ehersisyo. Sang ulihi, nakontrol ko na ang akon ginabatyag. Kon may mga butang nga indi ko makontrol, ginatugyan ko ini kay Jehova.”

20. (a) Paano naton matugyan sa Dios ang aton kabalaka? (b) Ano ang binagbinagon naton sa masunod nga artikulo?

²⁰ Sa sini nga artikulo, natun-an naton kon daw ano ka importante ang pagtugyan sang aton kabalaka sa Dios paagi sa hanuot nga pangamuyo kag paagi sa pagbasa sang iya Pulong kag pagpamalandong sa sini. Natun-an man naton kon daw ano ka importante nga pauswagon ang mga kinaiya nga ginapatubas sang iya espiritu, ang pagsugid sang aton ginabatyag sa aton ginasaligan, kag ang pagtigayon sang kusog gikan sa makapalig-on nga pagpakig-upod sa mga kauturan. Binagbinagon sa masunod nga artikulo kon paano kita ginabuligan ni Jehova paagi sa paglaum nga padyaan niya kita.—Heb. 11:6.