Mga apat ka gatos ka tuig sa tapos masulat ang pinakaulihi nga tulun-an sang Hebreo sa Biblia, natuman ang gintagna ni Miqueas parte sa Mesias: si Jesus nabun-ag sa Betlehem. Mga 30 ka tuig sang ulihi, sang 29 C.E., natuman ang una nga bahin sang tagna ni Daniel parte sa pag-abot sang Mesias. Ginbawtismuhan si Jesus kag ginhaplasan sia sang Dios sang balaan nga espiritu. Eksakto gid sa tion ang pag-abot sang madugay na nga ginapaabot nga Mesias, ang Binhi!

Ginsugdan dayon ni Jesus ang iya ministeryo, nga “nagapahayag sang maayong balita sang ginharian sang Dios.” (Lucas 8:1) Pareho sang gintagna, nangin mainayuhon sia, malulo, kag may pag-ulikid gid sa iban. Praktikal kag mapinalanggaon gid ang iya panudlo, kag gin-ayo niya ang “tanan nga sahi sang kasablagan sa lawas” sang mga tawo, kag ginapakita sini nga kaupod gid niya ang Dios. (Mateo 4:23) Nagkadto ang tanan nga sahi sang tawo sa iya kag nakahinakop: “Nakita namon ang Mesias”!—Juan 1:41.

Nagtagna si Jesus nga antes maggahom ang iya Ginharian, makaeksperiensia ang kalibutan sing mga inaway, linog, kag iban pa nga kabudlayan. Gani ginsilingan niya ang tanan nga ‘magpadayon sa pagbantay.’—Marcos 13:37.

Himpit nga tawo si Jesus nga nagpabilin nga matinumanon sa Dios, pero may mga kaaway sia nga nagpatay sa iya sang ulihi. Gani ang iya kamatayon nangin himpit nga halad para mapasag-uli ang nadula nanday Adan kag Eva, ang kahigayunan nga mabuhi sing wala katapusan sa Paraiso.

Natuman ang tagna sang napatay si Jesus kag sang ginbanhaw sia sang Dios subong gamhanan nga espiritu nga tinuga pagligad sang tatlo ka adlaw. Dayon nagpakita sia sa iya sobra 500 ka disipulo. Antes magkayab sa langit, ginsugo niya ang iya mga sumulunod nga isugid ang maayong balita parte sa iya kag sa iya Ginharian sa “mga tawo sang tanan nga pungsod.” (Mateo 28:19) Paano nila gintuman ina nga sugo?

—Base sa Mateo, Marcos, Lucas, Juan, 1 Corinto.