Si Irma, nga taga-Germany, halos 90 anyos na. Duha ka beses sia nga naaksidente sing grabe kag pila ka beses na nga naoperahan, amo nga indi na sia makapamalaybalay pareho sang ginahimo niya sadto. Gani ginasugid ni Irma sa iban ang iya mga ginapatihan paagi sa paghimo sing sulat para sa iya mga paryente kag mga kakilala. Ang mga sulat ni Irma para pabakuron ang iban ukon paumpawan ang mga namatyan ginaapresyar gid sang iya mga ginapadal-an amo nga ginatawgan nila sia kon san-o naman sia mapadala liwat sing sulat sa ila. Madamo man sia sing nabaton nga mga sulat sang pagpasalamat, nga nagapangabay sa iya nga magsulat liwat. Si Irma nagsiling, “Nagapahalipay gid ini sa akon kag paagi sa sini padayon ako nga makabantala.”

 Nagapadala man si Irma sing mga sulat sa mga tigulang nga ara sa mga nursing home. Nagsiling sia: “Gintawgan ako sang isa ka tigulang nga babayi nga nagsiling nga ang akon mga sulat nagpaumpaw gid sa iya sang napatay ang iya bana. Ginbutang niya ang akon sulat sa iya Biblia kag pirme niya ini ginabasa kon gab-i. Ang isa pa ka babayi, nga bag-o lang napatyan sing bana, nagsiling nga mas daku ang nabulig sa iya sang akon sulat sangsa sermon sang pari. Madamo sia sing pamangkot kag namangkot man sia kon puede niya ako mabisitahan.”

 Ang isa ka kilala ni Irma nga indi Saksi nga nagsaylo sa malayo nga lugar nagpangabay nga sulatan sia ni Irma. “Gintago sini nga babayi ang tanan ko nga sulat,” siling ni Irma. “Sang napatay sia, gintawgan ako sang iya bata nga babayi. Nagsiling sia nga ginbasa niya ang tanan ko nga sulat sa iya nanay kag namangkot sia kon bala puede ko man sia sulatan parte sa Biblia.”

 Nalipay gid si Irma sa iya ministeryo. “Ginapangabay ko si Jehova nga padayon ako nga hatagan sing kusog nga maalagad sia,” siling niya. “Bisan pa indi na ako makapamalaybalay, ginahimo ko ang akon masarangan.”