“Kabay pa nga ang Dios nga nagahatag sing paglaum maghatag sa inyo sing kalipay kag paghidait bangod sang inyo pagtuo sa iya, agod mapabakod pa ang inyo paglaum paagi sa gahom sang balaan nga espiritu.”—Roma 15:13, Bag-ong Kalibutan nga Badbad.

 “Kabay nga ang Dios nga ginagikanan sang paglaom, magpuno sa inyo sang bug-os nga kalipay kag paghidait paagi sa inyo pagtuo sa iya, agod nga ang inyo paglaom magpadayon sa pagtubo paagi sa gahom sang Espiritu Santo.”—Roma 15:13, Maayong Balita nga Biblia.

 Paagi sa sini nga mga pinamulong, ginpabutyag ni apostol Pablo ang iya handum nga pun-on sang Dios ang iya mga masigkatumuluo sing “kalipay kag paghidait.” Ining maayo nga mga kinaiya naangot sa paglaum nga ginahatag sang Dios kag sa gahom sang balaan nga espiritu.

 Natun-an naton ang paglaum nga ginahatag sang Dios sa iya nasulat nga Pulong, ang Biblia. Suno sa Roma 15:4, “ang tanan nga butang nga ginsulat sadto [sa Biblia] ginsulat sa pagtudlo sa aton. Nagahatag ini sa aton sing paglaum bangod ining Kasulatan nagabulig sa aton sa pagbatas kag nagapabakod sa aton.” Ginpakita sa Biblia nga nagsaad ang Dios nga solbaron niya ang mga problema nga nagapabudlay sang aton kabuhi subong, pareho sang kapigaduhon, inhustisya, balatian, kag kamatayon. (Bugna 21:4) Gamiton sang Dios si Jesucristo para tumanon ang iya mga saad, amo nga makasalig kita nga may maayo kita nga palaabuton.—Roma 15:12.

 ‘Magabakod’ ukon ‘magaawas’ ang paglaum nga ginhatag sang Dios sa aton kon magsalig kita sa iya. Samtang nagatuon pa gid kita sing dugang parte sa iya, mas sigurado kita nga masaligan gid sia. (Isaias 46:10; Tito 1:2) Bangod sa masaligan nga paglaum nga ginahatag sang Dios, ang isa puede mangin malipayon kag may paghidait, bisan pa nagaatubang sia sang mga kabudlayan.—Roma 12:12.

 Ang paghidait, kalipay, kag paglaum naangot man sa “balaan nga espiritu,” nga amo ang gahom sang Dios nga nagapanghikot. a Ginagamit sang Dios ang Balaan nga Espiritu para tumanon ang iya mga saad, kag ini nagahatag sa aton sang paglaum. Ini nga espiritu nagabulig sa mga tawo para mapalambo ang maayo nga mga kinaiya pareho sang kalipay kag paghidait.—Galacia 5:22.

 Ang libro sang Roma isa ka sulat para sa mga Cristiano nga nagaistar sa siudad sang Roma. Ang pila sa sini nga mga Cristiano halin sa Judiyo nga mga pamilya, samtang ang iban indi. Ginpalig-on sila ni Pablo nga manikasog para mahiusa sila sa panghunahuna kag buhat bisan pa lainlain ang ila ginhalinan kag kultura.—Roma 15:6.

 Ginpahanumdom ni Pablo ang mga Cristiano sa Roma nga madugay na gintagna sang Dios ang tion nga ang mga tawo sang tanan nga pungsod mahiusa sa pagdayaw sa Iya. Para pamatud-an ini nga kamatuoran, apat ka beses nga nagkutlo si Pablo halin sa Hebreong Kasulatan. b (Roma 15:9-12) Amo ini ang iya punto: Upod sa mga Judiyo, ang mga tawo sa tanan nga pungsod makabenepisyo sa ministeryo sang Cristo. Pareho nga paglaum ang ginahatag sang Dios sa mga Judiyo kag indi Judiyo. Gani, bisan pa lainlain ang ila ginhalinan, ang tanan sa kongregasyon sa Roma, dapat nila ‘abiabihon ang isa kag isa,’ buot silingon, batunon nila ang kada isa sing mainayuhon.—Roma 15:7.