Kon natestingan mo na magpatay sang langaw, kabalo ka gid nga mabudlay ini himuon. Daw pareho kadasig sa kilat ini nga insekto, gani sa masami indi mo ini madakpan.

 Nadiskobrehan sang mga scientist nga may isa ka klase sang langaw, ang fruit fly, nga makasarang magbag-o sang direksion sini pareho sang mga fighter jet, sa kadasigon nga wala pa isa ka segundo. Sang ginboto ang mga fruit fly, “eksperto na ini maglupad,” siling ni Propesor Michael Dickinson. “Daw pareho lang nga ginbutang mo ang bag-ong bun-ag nga lapsag sa pulungkuan sang piloto sa isa ka fighter plane, kag kabalo na sia sang iya himuon.”

 Gin-video sang mga researcher ang paglupad sang isa ka fruit fly, kag nakita nila nga makapaykapay sini ang iya pakpak sing 200 ka beses kada segundo. Kag sa isa lang ka kapay sang iya pakpak, masarangan sini nga bag-uhon ang iya direksion para makalikaw sa peligro.

 Daw ano naman ini kadasig maghulag kon ara sa peligro? Nadiskobrehan sang mga researcher nga mas madasig ini sing 50 ka beses sangsa pagpamisok sang tawo. “Ini nga langaw madasig mamensar kag maayo gid magbanta kon diin ang peligro kag kon diin nga direksion ini malagyo,” paathag ni Dickinson.

 Ginatinguhaan gid sang mga researcher nga madiskobrehan kon paano ini mahimo sang gamay kaayo nga utok sang fruit fly.

 Ano sa banta mo? Ang abilidad bala sang fruit fly sa paglupad resulta sang ebolusyon? Ukon gindesinyo ini?