Peb niaj hnub tos Vajtswv lub Nceeg Vaj. Lub tseem fwv yuav kho kom tibneeg thoob ntiajteb muaj kev sib haum xeeb nyob tso siab plhuav. Ntawv Nkauj 72:7 cog tseg tias thaum ntawd “kev siab tus muaj nplua mias.” Ua li thaum twg lub Nceeg Vaj mam kav thoob ntiajteb? Yuav kav li cas? Thiab peb yuav tsum ua li cas peb thiaj ua tau pejxeem rau lub Nceeg Vaj ntawd?

Phau Vajlugkub qhia tseg tias yuav muaj tej xwm txheej tshwm sim ua pov thawj tias Vajtswv lub Nceeg Vaj yuav kav sai sai no. Yuav muaj kev tsov kev rog, kev tshaib kev nqhis, kab mob kev nkeeg, av qeeg ntau qhov thiab kev phem kev tsis leem cai txhua qhov. Tag nrho tej no ua “txujci” lossis ua ib lub cim rau sawvdaws pom.​—Mathai 24:3, 7, 12; Luka 21:11; Qhia Tshwm 6:2-8.

Muaj dua ib zaj lus faj lem ntxiv hais tias: “Koj yuav tsum nkag siab qhov no, tiam kawg yuav yog lub sijhawm txom nyem nyuaj siab kawg. Rau qhov neeg yuav xam pom lawv tus kheej xwb, ntshaw nyiaj txiag, . . . tsis mloog niam txiv lus, tsis nco luag txiaj ntsig, tsis yuav Vajtswv, tsis hlub luag, tsis zam txim, xyav luag moo, tsis tswj lub siab, ua neeg nyaum, ntxub qhov zoo, . . . tsab ua loj, nyiam kev lomzem heev dua li nyiam Vajtswv.” (2 Timaute 3:1-4) Ib txwm yeej muaj tej tug neeg uas coj cwj pwm li no. Tiamsis tamsim no coob leej ntau tus coj li ntawd lawm.

Pib muaj tshwm sim raws li cov lus faj lem ntawd xyoo 1914 los lawm. Cov neeg taug keeb kwm, tej nom tswv, thiab tej neeg sau ntaub sau ntawv yeej hais tias tom qab xyoo 1914 lub qab ntuj no hloov hlo lawm. Ib tug yawg taug keeb kwm hauv tebchaws Deemaj (Denmark) hu ua Petus Maw-tshe (Peter Munch) hais tias: “Txij ntsuj rog xyoo 1914 los, noob neej hloov kiag lawm. Tiam ntawd zoo li yuav vam meej zuj zus xwb, . . . tiamsis tib pliag ntshis xwb txawm muaj kev puas ntsoog, kev limhiam, kev ntxub ntxaug thiab kev txhawj ntshai txhua qhov.”

Tej kev phem no zoo ib yam li nthwv cua daj cua dub uas los ib vuag dhau plaws lawm ces lub ntuj rov kaj nrig zoo nkauj tuaj. Tej no ua cim qhia tias tshuav tsis ntev xwb Vajtswv lub Nceeg Vaj yuav kav thoob plaws lub ntiajteb no. Yexus kuj qhia tias tiam kawg, “txoj xov zoo uas hais txog Vajtswv lub tebchaws [Nceeg Vaj] yuav raug muab tshaj tawm thoob plaws lub ntiajteb ua timkhawv rau ib tsoom tebchaws, mas thaum ntawd lub sijhawm kawg yuav los txog.”​—Mathai 24:14.

Yehauvas Cov Timkhawv niaj hnub tshaj tawm txog Vajtswv lub Nceeg Vaj. Twb yog li ntawd, phau ntawv uas lawv luam tawm ntau tshaj thiaj hu ua, Phau Tsom Faj Tshaj Tawm Txog Yehauvas Lub Nceeg Vaj. Phau no qhia txog tej yam zoo kawg nkaus uas lub Nceeg Vaj yuav ua rau noob neej thiab ua los kho lub ntiajteb.

Thaum muaj raws li 4 lub ntsiab no ces lub Nceeg Vaj mam li kav:

1. Tej nom tswv hauv qab ntuj no yuav tsis muaj feem tuav ib txoj haujlwm twg hauv Vajtswv lub Nceeg Vaj.

2. Tej nom tswv yuav tsis kam txo lawv lub hwjchim thiab yuav sawv tawm tsam Vajtswv lub Nceeg Vaj.​—Ntawv Nkauj 2:2-9.

3. Lub Nceeg Vaj yuav muab tej tseem fwv uas tseem xav kav noob neej rhuav tshem tibsi. (Daniyee 2:44; Qhia Tshwm 19:17-21) Ntsuj rog kawg nkaus no, hu ua Amakedoo.​—Qhia Tshwm 16:14, 16.

4.   Txhua tus uas zwm rau Vajtswv lub Nceeg Vaj yuav dim Amakedoo. Lawv yuav tau nyob hauv lub ntiajteb tshiab uas muaj kev thaj yeeb nyab xeeb. Ntshe yuav muaj tsheej plhom leej dim. Lawv yog “pab neeg coob coob” uas phau Vajlugkub qhia txog.​—Qhia Tshwm 7:9, 10, 13, 14.

Yog peb xav ua pejxeem rau Vajtswv lub Nceeg Vaj peb yuav tsum xub muaj kev cob qhia. Yexus thov Vajtswv li no: “Txojsia ib txhis tsis kawg yog li no, yog qhov uas lawv paub koj uas yog tus Vajtswv tib leeg uas yog tus tseem Tswv thiab paub Yexus Khetos uas koj txib los.”​—Yauhas 17:3.

Thaum tibneeg kawm txog Vajtswv Yehauvas thiab nrog nws sib raug zoo lawm, pab tau lawv lub neej. Cia peb kawm txog 2 txojkev pab: (1) Lawv yuav muaj kev ntseeg ruaj khov rau Vajtswv. Lawv txojkev ntseeg yuav cog ruaj rau tej yam uas muaj tseeb tiag. Lawv thiaj paub tseeb tias Vajtswv lub Nceeg Vaj yuav kav thoob plaws ntiajteb sai sai no. (Henplais 11:1) (2) Lawv yuav muaj kev hlub rau Vajtswv thiab neeg zej zos. Lawv thiaj zoo siab hlo mloog Vajtswv lus. Lawv kuj xav coj raws li Yexus cov lus no: “Nej xav kom lwm tus ua li cas rau nej, nej cia li ua ib yam li ntawd rau lwm tus.”​—Luka 6:31.

Vajtswv yog ib leej txiv uas xav kom nws cov menyuam tau zoo xwb. Nws xav kom peb tau “txojsia uas tseeb,” lossis lub neej uas zoo tiag tiag. (1 Timaute 6:19) Tamsim no muaj tsheej plhom leej thoob ntiajteb ua neej nyuaj siab ntsuav. Lawv khwv ciaj khwv tuag kom nyob taus xwb. Lub neej tiag tiag uas Vajtswv lub Nceeg Vaj yuav pub rau peb zoo li cas xwb? Kawm ntxiv seb.