1. Vim li cas nyuaj tshaj tawm txoj xov zoo ua luaj?

THAUM Yehauvas cov tibneeg pib tshaj tawm txoj xov zoo 130 xyoo dhau los, muaj ntau yam tav lawv txoj hau kev. * (Saib cov lus hauv qab taw qhia.) Ib yam li cov Khixatia uas nyob thawj 100 xyoo, lawv tsawg heev thiab tibneeg tsis xav mloog txoj xov zoo. Ib txhia kuj xav tias cov kwvtij tsis tau kawm ntawv siab txaus. Tom qab no, thaum Xatas raug pov los rau hauv ntiajteb lawm cov kwvtij raug tsim txom hnyav heev. (Qhia Tshwm 12:12) Txawm tias lawv raug kev “txom nyem nyuaj siab” rau tiam kawg no los, lawv kub siab lug tshaj tawm txoj xov zoo los txog niaj hnub nimno.​—2 Timaute 3:1.

2. Yehauvas pab kom peb tshaj tawm txoj xov zoo li cas?

² Txawm tias muaj kev nyuaj siab los, Yehauvas yeej pab nws cov tibneeg tshaj tawm txoj xov zoo thoob lub ntiajteb. Nws yuav  tsis pub ib yam dabtsi los khuam cheem tes haujlwm no. Yav thaum ub, nws tso nws haiv neeg Yixayee tawm hauv Npanpiloo. Niaj hnub no los, Yehauvas kuj tso nws cov tibneeg tawm hauv “lub tuam ceeb Npanpiloo” uas yog kev ntseeg cuav. (Qhia Tshwm 18:1-4) Yehauvas tej lus cob qhia pab tau peb lub neej, kom peb sawvdaws nyob sib haum xeeb. Nws cob kom peb txawj qhia Vajlugkub, lwm tus thiaj los paub txog nws. (Nyeem Yaxaya 48:16-18.) Yehauvas yog tus coj peb tes haujlwm tshaj tawm txoj xov zoo. Tiamsis puas yog Yehauvas tsuas pom hloov tej xwm txheej hauv lub qab ntuj no kom peb thiaj qhia tau txoj xov zoo? Nws kuj tsis ua li ntawd thiab. Yeej muaj tej xwm txheej uas qheb kev rau peb tshaj tawm, tiamsis peb tseem raug kev tsim txom ntau yam los ntawm Xatas lub qab ntuj. Yuav kom peb tshaj tawm txoj xov zoo thoob ntiajteb, peb yuav tsum muaj Yehauvas ua tus pab peb xwb.​—Yaxaya 41:13; 1 Yauhas 5:19.

3. Puas muaj raws li Daniyee zaj lus faj lem?

³ Yehauvas tau tshoov kom Daniyee sau tseg tias nyob rau tiam kawg, coob leej ntau tus yuav los paub qhov tseeb txog phau Vajlugkub. (Nyeem Daniyee 12:4.) Puas muaj raws li zaj lus faj lem ntawd? Yeej muaj tiag! Niaj hnub no, twb muaj txog li 8 plhom leej thoob ntiajteb uas kawm tau qhov tseeb hauv phau Vajlugkub. Lawv twb tso kev ntseeg cuav tseg lawm. Lawv tseem pab ua timkhawv rau cov tibneeg nyob puag ncig lawv thiab. Ua cas txoj xov zoo thiaj nrov ncha deb ua luaj li lawm?

4. Thaum txog xyoo 1900, tau muab phau Vajlugkub txhais ua pes tsawg yam lus lawm?

⁴ Yoojyim tshaj tawm txoj xov zoo vim niaj hnub no coob leej ntau tus nyias muaj nyias ib phau Vajlugkub. Tiamsis yav thaum ub tsis zoo li ntawd. Cov Khixatia cuav txwv tsis pub leejtwg nyeem phau Vajlugkub li. Cov uas nyiag nyeem phau Vajlugkub raug kev tsim txom heev. Cov uas nyiag txhais phau Vajlugkub tseem raug tua pov tseg thiab. Pib xyoo 1800 los, muaj tej lub koom haum mam li pab txhais thiab luam phau Vajlugkub ua 400 yam lus. Thaum txog xyoo 1900, coob leej ntau tus thiaj tau ib phau Vajlugkub ua lawv ntiag tug. Txawm tias sawvdaws muaj Vajlugkub lawm los, lawv tsis to taub tej uas phau Vajlugkub qhia.

5. Yehauvas Cov Timkhawv pab txhais phau Vajlugkub li cas?

⁵ Coob leej tau muab phau Vajlugkub txhais tawm ua lwm yam lus. Yehauvas Cov Timkhawv pab luam thiab tseb cov Vajlugkub ntawd, kom sawvdaws tau hnov txoj xov zoo. Tiamsis thaum txog xyoo 1950, lawv pib luam phau Vajlugkub Askiv New World Translation of the Holy Scriptures. Lawv tau muab phau Vajlugkub no txhais ua 120 yam lus, tej yam lus txhais txhij lawm tiamsis tej yam lus txhais txog nrab xwb. Tom qab no lawv pom tias yuav tsum kho cov ntawv Askiv kom yoojyim nkag siab rau tiam no. Yog li ntawd, xyoo 2013 lawv thiaj luam ib phau New World Translation tshiab kom yoojyim to taub thiab hajyam yoojyim txhais. Phau Vajlugkub no yoojyim nkag siab heev thiaj pab tau lwm tus los paub qhov tseeb.

6, 7. (1) Tau 100 xyoo tas los no, muaj kev tsov kev rog zoo li cas xwb? (2) Vim muaj tej lub tebchaws nyob sib haum xeeb, txoj xov zoo nrov ncha deb npaum li cas lawm?

⁶ Tau 100 xyoo tas los no, tsuas pom ib sij muaj kev tsov kev rog xwb. Twb muaj 2 ntsuj rog thoob qab ntuj thiab muaj ntau  ntsuj rog me lawm. Ntau plhom leej raug kev ploj kev tuag. Ua cas thiaj hais tau tias tebchaws nyob tiaj tus? Thiab kev thaj yeeb pab cov Timkhawv tshaj tawm txoj xov zoo li cas xwb? Lub sijhawm uas muaj Ntsuj Rog Thoob Qab Ntuj Zaum 2, tus kwvtij uas pab coj Yehauvas Cov Timkhawv yog Nathan Knorr. Xyoo 1942, nws tau cev ib zaj lus qhia hu ua “Puas Yuav Muaj Kev Thaj Yeeb Mus Li?” (“Peace​—Can It Last?”) Kwvtij Knorr piav tias raws li Qhia Tshwm tshooj 17, tom qab Ntsuj Rog Thooj Qab Ntuj Zaum 2 yuav muaj kev thaj yeeb ib nyuag ntu. Amakedoo yuav tsis tau los rau thaum ntawd.​—Qhia Tshwm 17:3, 11.

⁷ Tom qab Ntsuj Rog Thoob Qab Ntuj Zaum 2, puas yog txhua lub tebchaws nyob sib haum xeeb? Tsis yog. Txij ntsuj rog ntawd los tseem muaj tsheej plhom leej tuag rau kev tsov kev rog. Tiamsis kuj muaj ntau lub tebchaws nyob sib haum xeeb tiag. Txojkev thaj yeeb ntawd qheb kev rau Yehauvas cov tibneeg tshaj tawm txoj xov zoo. Txoj xov zoo nrov ncha mus deb li cas xwb? Thaum Ntsuj Rog Thoob Qab Ntuj Zaum 2 yuav xaus, tsuas muaj 110,000 tus Timkhawv xwb. Tiamsis tamsim no muaj txog li 8 plhom tus Timkhawv lawm! (Nyeem Yaxaya 60:22.) Yog li ntawd, vim tej lub tebchaws nyob sib haum xeeb, coob leej ntau tus thiaj tau los paub qhov tseeb.

8, 9. (1) Ua cas niaj hnub no yoojyim ncig tebchaws ua luaj li? (2) Qhov ntawd pab kom txoj xov zoo nrov ncha li cas?

⁸ Thaum Yehauvas cov tibneeg nyuam qhuav pib tshaj tawm hauv tebchaws U.S.A., tsis yoojyim rau lawv ncig tebchaws qhia Vajlugkub. Thaum xyoo 1900, uas yog 21 xyoos tom qab lawv pib luam Phau Tsom Faj (The Watch Tower), tsuas muaj 8,000 lub tsheb hauv U.S.A., thiab luag nyuam qhuav pib luam kev rau tibneeg tsav tsheb xwb. Tiamsis tamsim no zoo li cas lawm xwb? Muaj tshaj li 1.5 billion lub tsheb thoob qab ntuj, thiab luag luam tau tej kev zoo  heev rau sawvdaws dhia mus mus los los. Txawm tias muaj tej tsev uas nyob twj cuab xwb los, peb yeej tsav tau tsheb mus txog tibsi. Cov kwvtij uas tseem nyob rau tej koog uas nyuaj ncig tebchaws los, yeej mob siab mus qhia txoj xov zoo rau txhua tus uas lawv ntsib.​—Mathai 28:19, 20.

⁹ Yehauvas cov tibneeg kuj siv nkoj thiab tsheb nqaj xa ntaub ntawv Vajlugkub mus rau cov kwvtij nkauj muam, tsis hais nyob deb nyob ze tibsi. Cov kwvtij uas ncig xyuas cov koom txoos, cov kwvtij uas saib xyuas tej ceg, cov tubtxib tshaj tawm txawv tebchaws puavleej caij dav hlau mus pab tej koom txoos uas nyob lwm qhov. Thaum muaj rooj sib txoos 3 hnub lawv kuj pab cev lus qhuab qhia thiab. Pab Uas Ntaus Thawj thiab cov kwvtij uas sawv cev rau Npe-ee kuj caij dav hlau mus txhawb cov kwvtij nkauj muam nyob txawv tebchaws. Tag nrho tej no pab kom Yehauvas cov tibneeg koom tau ib lub siab tiag.​—Ntawv Nkauj 133:1-3.

10. Tibneeg coob npaum li cas paub hais lus Askiv?

¹⁰ Nyob thawj 100 xyoo, Loos tej laj mej pejxeem feem coob puavleej hais lus Kili. Ua li niaj hnub no feem coob hais yam lus twg? Luag tshawb pom tias feem coob paub lus Askiv. Phau ntawv English as a Global Language hais tias cov neeg hauv lub qab ntuj no, 1 feem 4 to taub lossis txawj hais lus Askiv. Coob leej ntau tus kawm lus Askiv rau qhov tej tub lag tub luam, tej nom tswv thiab cov uas kawm txujci siab, puavleej paub lus Askiv.

11. Lus Askiv pab kom txoj xov zoo nrov ncha li cas?

¹¹ Lus Askiv pab kom txoj xov zoo nrov ncha mus rau txhua qhov. Thaum ntej peb luam peb tej ntaub ntawv Vajlugkub ua lus Askiv kom feem coob thiaj paub nyeem. Yehauvas Cov Timkhawv lub hauv paus koom haum loj kuj hais lus Askiv ntau xwb. Thaum cov kwvtij nkauj muam txawv tebchaws tuaj kawm ntawv hauv Patterson, New York, lawv kuj kawm Vajlugkub ua lus Askiv thiab.

12. (1) Peb txhais peb tej ntaub ntawv ua pes tsawg yam lus? (2) Tej twj koos pis tawj pab tau tes haujlwm txhais lus li cas?

¹² Tiamsis peb yuav tsum tshaj tawm txoj xov zoo rau txhua haiv neeg thoob ntiajteb. Twb yog vim li ntawd, peb thiaj txhais peb tej ntaub ntawv Vajlugkub ua 700 yam lus. Ua cas thiaj ua tau li ntawd? Cov kwvtij siv  koos piv tawj thiab tej twj hu ua MEPS los pab kom cov txhais lus ua tau lawv tes haujlwm. Vim tau muab txoj xov zoo txhais ua ntau yam lus, Yehauvas Cov Timkhawv thoob ntiajteb thiaj kawm tau tib co ntsiab lus tseeb hauv phau Vajlugkub. Lawv thiaj tau “tus nplaig dawb nplaig huv” ib yam.​—Nyeem Xefaniya 3:9.

13, 14. Tej kevcai lij choj tso kev rau txoj xov zoo nrov ncha li cas?

¹³ Yav thaum ub, Loos tej kevcai lij choj tso kev rau cov Khixatia uas nyob thawj 100 xyoo tshaj tawm txoj xov zoo. Niaj hnub no los kuj muaj tej kevcai lij choj uas tso kev rau peb tshaj tawm txoj xov zoo thiab. Xws li hauv tebchaws U.S.A., cov nom tswv tso cai rau laj mej pej xeem nyias coj nyias kevcai thiab kev ntseeg. Sawvdaws muaj cai tshaj tawm txog lawv txojkev ntseeg thiab sib txoos ywj siab. Tamsim no Yehauvas Cov Timkhawv lub hauv paus koom haum loj nyob hauv lub tebchaws no, thiaj tsis nyuaj saib xyuas tes haujlwm tshaj tawm txoj xov zoo thoob qab ntuj. Yav tas los, kuj muaj cov uas txwv tsis pub peb tshaj tawm hauv U.S.A. thiab. Tiamsis peb cov kwvtij tau pab daws peb zaj hauv tej tsev tu plaub. (Filipi 1:7) Thaum tej tsev tu plaub me txwv peb tes haujlwm, peb mam li mus hais plaub ntawm rooj txiav txim loj tshaj hauv tebchaws U.S.A. Ntau zaus thaum peb mus cuag rooj txiav txim loj tshaj, lawv kuj tso kev rau peb tshaj tawm txoj xov zoo thiab.

¹⁴ Thaum lwm tebchaws txwv peb tes haujlwm, peb kuj tau mus hais plaub daws peb zaj hauv tej tebchaws ntawd thiab. Thaum peb hais tsis yeej lawv, peb mam li mus cuag cov rooj txiav txim loj uas tu plaub ntug rau ntau lub tebchaws. Yav tas los peb mus cuag rooj tu plaub uas nyob sab Yus Lus hu ua European Court of Human Rights. Thaum lub rooj tu plaub ntawd txiav txim li cas, ces tag nrho cov tebchaws uas nyob sab Yus Lus yuav tsum ua raws li ntawd. Txij lub 6 Hli xyoo 2014 los, peb twb yeej txog li 57 tshaj plaub lawm. Yog li, txawm tias “ib tsoom tebchaws . . . ntxub” peb los, tej kevcai lij choj kuj tso kev rau peb pe hawm Yehauvas ywj siab.​—Mathai 24:9.

15. (1) Niaj hnub no muaj tej tshuab luam ntawv zoo li cas? (2) Thiab tej tshuab ntawd pab peb tshaj tawm txoj xov zoo li cas?

¹⁵ Cov tshuab luam ntawv uas tibneeg tau tsim pab peb tshaj tawm txoj xov zoo. Tau ntau pua xyoo, tibneeg nyiam siv lub tshuab luam ntawv uas tus yawg Johannes Gutenberg tsim xyoo 1450. Tiamsis tau 200 xyoo no, tibneeg tsim tau cov tshuab luam ntawv tshiab uas zoo tshaj ntawd lawm. Cov tshuab tshiab no loj dua, luam ceev dua thiab pheej yig dua. Vim muaj tej  tshuab zoo li ntawd, thiaj luam tau ntau txhiab ntau vam phau ntawv Vajlugkub mus tshaj txoj xov zoo. Xyoo 1879, cov kwvtij luam thawj Phau Tsom Faj (Watch Tower) ua lus Askiv xwb. Phau Tsom Faj ntawd tsis muaj duab thiab lawv luam tau 6,000 phau coj mus tseb. Niaj hnub no, tau muab Phau Tsom Faj txhais ua 200 tawm yam lus. Muaj duab zoo nkauj heev thiab txhua txhua phau luam tshaj li 50,000,000 phau coj mus tseb.

16. Peb siv cov twj zoo li cas los pab peb tshaj tawm txoj xov zoo thoob ntiajteb? (Saib daim duab ntawm sab 26.)

¹⁶ Tej tshuab thiab tej twj uas tibneeg tsim tau 200 xyoo dhau los no pab tau Yehauvas cov tibneeg tshaj tawm txoj xov zoo. Tibneeg tsim tau dabtsi xwb? Lawv tsim tej tsheb kauj vab, tej tshuab ntaus ntawv, tej tshuab ntaus ntawv rau cov uas tsis pom kev xuas tes nyeem (Braille), tej tshuab xa xov los yog lub xaim, tej xov tooj, tej twj kaw suab, xov tooj cua, tej koob yees duab, this vis, tej yeeb yaj kiab, tej koos pis tawj, thiab lub Is Taws Nej. Txawm tias Yehauvas cov tibneeg tsis yog cov tsim tej no los, lawv siv tej twj no los txhais thiab luam ntaub ntawv Vajlugkub ua ntau yam lus, xwv neeg thoob ntiajteb thiaj hnov txoj xov zoo. Muaj tseeb raws li phau Vajlugkub tau hais, Vajtswv cov tibneeg “tau ntxais ib tsoom tebchaws li kua mis.”​—Nyeem Yaxaya 60:16.

17. (1) Leejtwg yog tus uas coj tes haujlwm tshaj tawm txoj xov zoo? (2) Vim li cas Yehauvas xav kom peb nrog nws koom tes ua haujlwm?

¹⁷ Tes haujlwm tshaj tawm txoj xov zoo yeej yog Vajtswv Yehauvas ua tus coj tiag! Puas yog nws txib peb rau qhov nws ua tsis tau tes haujlwm no? Yeej tsis yog. Nws pub tes haujlwm no rau peb ua rau qhov nws hlub peb thiab nws xav kom peb nrog nws koom tes ua haujlwm. Thaum peb tshaj tawm txoj xov zoo twb yog peb qhia tias peb hlub Yehauvas thiab hlub peb cov kwvtij zej zog. (Malakau 12:28-31; 1 Khaulee 3:9) Peb zoo siab uas Yehauvas pab peb tshaj tawm txoj xov zoo thoob lub ntiajteb. Cia peb sawvdaws mob siab tshaj tawm txog Yehauvas thiab nws lub Nceeg Vaj rau txhua lub sijhawm!