FAMILI DURUA TOTONA
Edena Dala ai Natuna Oi Durua Maka Namona Ia Abia Totona
Toana be emu natuna be sikuli ia laloa bada lasi, bona iena stadi bona homwok ia karaia lasi. Dahaka do idia vara? Sikuli ai maka namona ia abia lasi, danu iena kara be do ia dika. Edena dala ai emu natuna oi durua diba sikuli ai maka namona ia abia lou totona?
Dahaka oi diba be namo
Doria karana ese hekwakwanai ia habadaia. Natuna doria karana ese lalohekwarahi ia havaraia, sikuli ai bona ruma dekenai danu! Unai bamona lalohekwarahi hamaragia totona, reana do ia hereva koikoi, sikuli ai ia abia maka do ia hunia, emu ladana ai sain koikoina do ia atoa ena ripoti kadi dekenai, o sikuli do ia reaia. Unai ese hekwakwanai do ia habadaia sibona.
Ahuna be lasi, lalohisihisi ia vara diba. Tama ta ladana Andrew ia gwau “Emai natuna kekeni ai hagoadaia toho, ia abia maka namona dainai ia dekenai ahuna namona do ai henia, to ahuna sibona ia laloa bada. Bena sikuli ai maka namona ia abia lasi neganai, ia lalohisihisi bada badina ia dekenai ahuna ai henia lasi.”
Tisa dekenai kerere atoa karana ese natuna do ia durua lasi. Reana emu natuna do ia laloa, anina namona abia totona oi hekwarahi be gau badana lasi. Reana inai karadia do ia manadalaia danu, haida dekenai kerere do ia atoa, bona do ia laloa haida ese ia totona hekwakwanai do idia hamaoromaoroa. Eiava ita gwau diba, natuna ia tubu bona taunimanima badana ai ia lao neganai, mauri lalonai mai anina bada gaudia dibaia karana do ia reaia diba—do ia abia dae iena kara dainai idia vara gaudia be iena maduna.
Dahaka oi karaia diba
Emu hemami biagua. Bema oi mamia oi badu, badina emu natuna be sikuli ai maka namona ia abia lasi, unai gaudia be nega ma ta ai umui herevalaia. Tama ta ladana, Brett be mai ena natudia memero rua edia mauri lagani be 10 bona 3 bona kekeni ena mauri lagani 8, ia gwau: “Lau bona egu hahine be ai badu lasi bona ai hebogahisi heheni dainai, anina namona idia vara.”
Baibel ena hakaua herevadia: “Kamonai haraga, to do idia hereva haraga lasi, bona do idia badu haraga lasi.”—Iamesi 1:19.
Hekwakwanai ena badina korikori tahua. Sikuli ai maka namona abia lasi ena badina haida be, turadia edia hauraia karana, sikuli haidaua karana, eksam lalohekwarahilaia karana, mahuta namonamo lasi, sediual namona lasi, bona gau idaudia lalohadailaia karana. Namo lasi oi laloa emu natuna be ia lahedo.
Baibel ena hakaua hereva: “Ia laloa namonamo tauna ese namo do ia davaria.”—Aonega Herevadia 16:20.
Natuna ena stadi totona. Natuna totona sediual ta karaia iena homwak bona stadi totona. Emu natuna be ena homwak ia karaia neganai, (televisen bona mobael fon) bona gau ma haida ese ena laloa karana ia hadikaia lasi be namo. Emu natuna durua totona homwak oi haria bona hakwadogia, Germany amo tama ta ladana Hector, ia gwau, “Bema natuna be sikuli test ta do ia karaia, dina ta ta ai riviu ai karaia, to test do ia karaia dinana ai naria lasi.”
Baibel ena hakaua hereva: “Gau ibounai be mai edia nega korikori.”—Hadibaia Tauna 3:1.
Diba ia abia totona oi hagoadaia. Emu natuna ese sikuli ai diba abia karana ena namo be hari ia lalopararalaia be namo, unai amo diba abia karana dekenai iena ura do ia habadaia. Haheitalai, namba duahia karana (Math) ese ia do ia durua ena poket moni ia gaukaralaia namonamo totona.
Baibel ena hakaua hereva: “Aonega bona laloparara oi abia noho. . . . Oi ura henia bada.”—Aonega Herevadia 4:5, 8.
Heduru hereva: Natuna ida homwak umui karaia, to ia totona oi karaia lasi. Andrew ia gwau, “Emai natuna kekeni be emai diba dekenai ia tabekau, to iena diba ia gaukaralaia lasi.” Emu natuna ese sibona ena homwak ia karaia dalana oi hadibaia.