Sivarai Iharuana 10:1-19
-
Israela be Rehoboama dekenai idia gwau-edeede (1-19)
10 Rehoboama be Sekema dekenai ia lao,+ badina unai gabu dekenai Israela taudia ibounai idia haboua, ia be king ai idia halaoa totona.+
2 Bona Nebata ena natuna Ieroboama+ ese Aigupito ai unai ia kamonai (badina King Solomona amo ia heau bona unuseni ia lao),+ bona maoromaoro Aigupito amo ia giroa mai.
3 Vadaeni idia be ia totona hereva idia siaia, bona Ieroboama bona Israela taudia ibounai be Rehoboama dekenai idia mai bona idia gwau:
4 “Emu tamana ese emai maduna ia hametaua.+ To bema emu tamana ese ai dekenai ia henia gaukara metauna oi hamaragia bona unai maduna oi hametaua lasi, ai ese oi do ai hesiai henia.”
5 Unai neganai idia dekenai ia gwau: “Dina toi murinai lau dekenai umui giroa mai.” Vadaeni taunimanima idia lao.+
6 King Rehoboama be tau badadia ida ia herevahereva, idia be iena tamana Solomona ia do mauri lalonai idia hesiai henia tau badadia. Bona idia dekenai ia gwau: “Lau dekenai dahaka sisiba do umui henia, inai taudia lau haere henia totona?”
7 Ia idia haere henia, idia gwau: “Bema oi be inai taunimanima dekenai kara namo oi hahedinaraia bona idia oi hamoalea bona haere namona oi henidia, idia be nega ibounai oi do idia hesiai henia.”
8 To, tau badadia ese ia dekenai idia henia sisiba ia dadaraia, bona ia ida idia tubu hebou bona hari ena hesiai gaukara idia karaia tatau matamatadia ida ia herevahereva.+
9 Idia ia nanadaia: “Emui sisiba be dahaka? Inai taunimanima be edena bamona do ita haere henia? Idia be lau dekenai idia gwau, ‘Emu tamana ese ai dekenai ia atoa maduna ena metau oi hamaragia.’”
10 Ia ida idia tubu hebou tatau matamatadia be ia dekenai idia gwau: “Oi dekenai idia gwau, ‘Emu tamana ese emai maduna ia hametaua, to oi ese ai totona inai maduna ena metau do oi hamaragia,’ to unai taudia dekenai inai bamona do oi gwau, ‘Lau ese emui maduna do lau hametaua momokani, egu tamana ena do ia hereaia.*
11 Egu tamana ese umui latanai maduna metauna ia atoa, to lau ese emui maduna metauna do lau habadaia. Egu tamana ese kwadia gauna amo umui ia panisia, to lau ese kwadia gauna mai edia ginigini amo umui do lau panisia.’”
12 Ieroboama bona Israela taudia ibounai be dina ihatoina ai Rehoboama dekenai idia mai, king ena hereva hegeregerena, ia gwau: “Dina ihatoina ai lau dekenai do umui giroa mai.”+
13 To King Rehoboama ese idia ia hereva auka henia. Unai kara amo tau badadia edia sisiba ia badinaia lasi.
14 Ia ese tatau matamatadia amo ia abia sisiba hereva hegeregerena idia ia hereva henia, ia gwau: “Lau ese emui maduna metauna do lau habadaia. Egu tamana ese kwadia gauna amo umui ia panisia, to lau ese kwadia gauna mai edia ginigini amo umui do lau panisia.”
15 Vadaeni king ese taunimanima ia kamonai henia lasi, badina idia vara gaudia be Dirava momokanina ese ia havaraia,+ unai amo Iehova ena hereva ia guguru diba, ia ese unai hereva be Silo tauna Ahaisa+ amo Nebata ena natuna, Ieroboama, dekenai ia gwauraia.
16 Israela taudia idia itaia king ese idia ia kamonai henia lasi neganai, idia be king dekenai idia gwau: “Davida amo ai be ahuna ta lasi!” Iese ena natuna amo gau namona ta do ai abia lasi. Israela taudia e, umui giroa lou bona emui dirava umui tomadiho henidia. Umui Davida ena bese taudia e, umui sibona umui naria!”+ Bena Israela taudia be edia ruma* dekenai idia giroa lou.+
17 To Rehoboama be Iuda ena siti ai idia noho Israela taudia ia lohiadia noho.+
18 King Rehoboama ese Hadorama ia siaia,+ ia be king ese ia oda henia ia totona do idia gaukara taudia ia naria, to Israela taudia ese ia be nadi amo idia hodoa mase. To King Rehoboama be ena kariota dekenai ia guia bona Ierusalema dekenai ia heau lao.+
19 Bona Israela taudia idia ura lasi Davida ena bese taudia henunai idia noho ema bona hari.
Futnout
^ Heb., “Egu ima kwakikwaki maragina ena bada ese egu tamana ena gabana ena bada ia hereaia.”
^ Heb., “palai rumadia.”
