1. Dahaka ita karaia neganai ita moale bada?

 IEHOVA ia ura ita moale. Unai ita diba, badina moale be iena lauma helaga ena huahua ta. (Gal. 5:22) Henia kara ena moale be bada bona abia kara ena moale be maragi dainai, mai goada ida haroro gaukara ita karaia bona dala idauidau ai tadikaka taihu ita durua neganai, ita moale bada.​—Kara 20:35.

2-3. (a) Galatia 6:4 hegeregerena, dahaka gaudia rua ese ita do ia durua Iehova ena hesiai gaukara ai ita moale noho totona? (b) Inai atikol ai dahaka do ita herevalaia?

² Galatia 6:4 hegeregerena, aposetolo Paulo ese gau rua ia herevalaia, unai ese ita ia durua ita moale totona. (Duahia.) Ginigunana be, Iehova totona ita gaukara goada be namo. Bema unai bamona ita karaia, do ita moale. (Mat. 22:36-38) Iharuana be, ma haida ida sibona ita hahegeregerea lasi be namo. Ena be iseda helt, ita abia treinini, eiava iseda diba dainai gaukara ita karaia namonamo, to Iehova ita hanamoa be namo, badina ita abia gaudia ibounai be Ia amo idia mai. Bema ma haida be edia hesiai gaukara idia karaia namonamo, idia dainai ita moale be namo, badina edia diba bona goada idia gaukaralaia Iehova idia hanamoa, to sibona edia namo idia tahua lasi. Unai dainai idia amo diba ita abia be namo, to idia ida ita kara helulu lasi.

³ Bema ita mamia iseda goada be hegeregere lasi hesiai gaukara ai gau ma haida ita karaia totona, inai atikol ese ita ia durua unai ita haheaukalaia dalana do ita itaia. Danu, iseda goada bona diba ita gaukaralaia dalana bona ma haida edia haheitalai amo diba ita abia dalana do ita herevalaia.

4. Dahaka dainai haida idia lalomanoka? Haheitalai gwauraia.

⁴ Iehova ena hesiai taudia haida be idia buruka eiava idia gorere dainai idia hegeregere lasi gau haida idia karaia totona, bona idia lalomanoka. Carol dekenai unai ia vara. Ia be guna pablisa momo lasi gabuna dekenai ia haroro. Unai nega ai, ia ese Baibel stadi 35 ia karaia bona haida ia durua edia mauri idia gwauhamatalaia bona bapatiso idia abia. Carol be ena haroro gaukara ai anina namona ia havaraia! Bena gorere badana ta ia abia, bona nega momo ruma dekenai ia noho. Carol ia gwau: “Lau gorere dainai lau be hegeregere lasi ma haida ese idia karaia gaudia lau karaia totona. Lau mamia lau be hesiai gaukara lau karaia namonamo lasi. Bona lau ura karaia gaudia ibounai lau karaia diba lasi dainai, lau lalomanoka.” Carol ia ura Iehova totona gau momo ia karaia. Momokani, unai be namo herea! Ita diba Carol ena kara namona dainai, hebogahisi Diravana ia hamoalea.

5. (a) Bema gau momo ita karaia diba lasi dainai ita lalomanoka, dahaka ita laloatao be namo? (b) Laulau hegeregerena, edena dala ai tadikaka be Iehova totona ia gaukara goada noho?

⁵ Bema emu goada be hegeregere lasi dainai nega haida oi lalomanoka, sibona oi nanadaia, ‘Iehova ia ura dahaka do lau karaia?’ Ia ura oi gaukara goada hari oi karaia diba gauna oi hagugurua totona. Mani inai ita laloa: Taihu ta ena mauri lagani be 40 neganai, gau momo ia karaia diba, to hari ena mauri lagani be 80 dainai, guna ia karaia gaudia haida ia karaia diba lasi bona ia lalomanoka. Hari ena goada hegeregerena Iehova ia hesiai henia noho, to ia laloa unai ese Iehova ia hamoalea lasi. Unai be momokani, a? Bema unai taihu ena mauri lagani be 40 lalonai ia gaukara goada, bona hari ena mauri lagani be 80, to unai bamona ia karaia noho, anina be Iehova totona ia do gaukara goada noho. Bema ita mamia ita karaia gaudia be hegeregere lasi Iehova ita hamoalea totona, namona be ita laloatao Iehova sibona ia diba dahaka gaudia ese ia idia hamoalea. Bema ita gaukara goada, Iehova do ia gwau: “Oi karaia gaukara be namo herea!”​—Mataio 25:20-23 hahegeregerea.

6. Maria ena haheitalai amo dahaka ita dibaia?

⁶ Ita karaia diba lasi gaudia ita laloa lasi, to ita karaia diba gaudia ita laloa, unai amo do ita moale. Mani taihu Maria ita laloa, ia be mai ena gorere dainai haroro gaukara ai gau momo ia karaia diba lasi. Unai dainai, matamanai ia lalometau bona ia laloa ia be anina lasi. To ena kongrigeisen ai taihu ta ia laloa, ia be mai ena gorere bona ruma dekenai ia hekure sibona, bona Maria ia ura unai taihu ia durua. Maria ia gwau: “Palani lau karaia ia ida telefon bona leta amo ai haroro totona. Nega ibounai ai gaukara hebou murinai, mai moale ida ruma dekenai lau giroa lou badina egu taihu lau durua diba.” Ita karaia diba lasi gaudia ita laloa lasi, to ita karaia diba gaudia ita laloa neganai, do ita moale danu. To bema iseda diba bona goada be hegeregere Iehova ena hesiai gaukara ita habadaia totona, dahaka ita karaia be namo?

7. Aposetolo Petero ese Keristani taudia dekenai dahaka sisiba namona ia henia?

⁷ Aposetolo Paulo ena revareva ginigunana ai ena tadikaka ia hamaoroa, edia diba bona goada idia gaukaralaia edia tadikaka taihu idia hagoadaia totona. Petero ia gwau: “Dirava ena hebogahisi hereadaena amo umui ta ta ese umui abia harihari gauna do umui  gaukaralaia, naria taudia namodia bamona ta ta umui hesiai henia totona.” (1 Pet. 4:10) Namona be Iehova ena hesiai gaukara idauidau lalonai iseda diba bona goada ita gaukaralaia, namo lasi ita laloa ma haida do idia mama eiava lalohisihisi. Bema unai bamona lalohadai ita abia, Iehova totona iseda goada ibounai do ita gaukaralaia lasi.

8. Korinto Ginigunana 4:6, 7 hegeregerena, dahaka dainai iseda diba bona goada dekenai ita hekokoroku lasi?

⁸ Namona be iseda diba bona goada ibounai ita gaukaralaia, to ita naria namonamo ita hekokoroku lasi totona. (1 Korinto 4:6, 7 duahia.) Hegeregere, oi be Baibel stadi hamatamaia dalana oi diba namonamo. Unai harihari gauna oi gaukaralaia be namo! To gau badana be ita hekokoroku lasi. Reana haroro gaukara ai, Baibel stadi ta oi hamatamaia bona mai moale ida oi ura emu haroro grup dekenai unai oi gwauraia. To grup ida oi hedavari neganai, taihu ta be magasin ia hariharilaia ena ekspiriens ia gwauraia noho. Ia ese magasin ia hariharilaia, bona oi ese Baibel stadi oi hamatamaia. Dahaka do oi karaia? Oi diba emu ekspiriens ese haroro grup do ia hagoadaia, to reana nega ma ta ai unai oi herevalaia be namo, badina oi ura lasi unai taihu do ia mamia ia oi hereaia. Oibe, unai be kara namona. To Baibel stadi hamatamaia karana oi hadokoa lasi. Unai be emu harihari gauna!

9. Dirava ese ia henia harihari gaudia be edena bamona ita gaukaralaia be namo?

⁹ Namona be ita laloatao, Dirava ese ita dekenai diba bona goada ia henia. Unai gaudia ita gaukaralaia kongrigeisen ita hagoadaia, to sibona iseda ladana ita abia isi lasi. (Fili. 2:3) Dirava ena ura ita karaia totona iseda diba bona goada ita gaukaralaia neganai, do ita moale, badina unai harihari gaudia ita gaukaralaia Iehova ita hanamoa, to ma haida ida ita hahegeregerea eiava idia ita hereaia totona lasi.

10. Dahaka dainai ma haida ida sibona ita hahegeregerea lasi be namo?

¹⁰ Bema ta ia naria namonamo lasi, ia karaia diba gaudia be ma ta ida ia hahegeregerea diba. Hegeregere, tadikaka ta be pablik tok namodia ia henia. Unai be ia karaia diba gauna. To reana do ia laloa, ena tok henia dalana ese tadikaka ma ta ena ia hereaia. Ena be unai tadikaka be tok henia dalana dekenai ia hekwarahi, to ia be dala ma haida ai kara namodia ia hahedinaraia, hegeregere ma haida ia abia dae, ena natudia ia treinia, eiava haroro gaukara ia goadalaia. Ita moale badina iseda tadikaka taihu edia diba bona goada be  idauidau, bona unai harihari gaudia idia gaukaralaia Iehova idia hesiai henia bona ma haida idia durua!

11. Dahaka dainai ita gaukara goada Iesu ena haheitalai ita tohotohoa totona?

¹¹ Ma haida ida sibona ita hahegeregerea lasi be namo, unai amo Iehova ena hesiai taudia amo gau momo do ita dibaia. Mani Iesu ita laloa, ena be ia be goevadae tauna, to ena kara namodia amo gau momo do ita dibaia. (1 Pet. 2:21) Ita gaukara goada Iesu ita tohotohoa neganai, Iehova ena hesiai tauna namona ai do ita lao bona haroro gaukara do ita karaia namonamo.

12-13. King Davida amo dahaka ita dibaia?

¹² Baibel ai idia noho abidadama tatau bona hahine edia haheitalai ita tohotohoa diba, ena be idia be goevadae lasi. (Heb. 6:12) Mani King Davida ita laloa, ia be Iehova ese ia gwauraia “egu kudouna ia hamoalea tauna.” (Kara 13:22) To, Davida be goevadae lasi tauna. Momokani, ia be kara dika badadia haida ia karaia. Ena be unai bamona ia karaia, to ita dekenai ia be haheitalai namona. Dahaka dainai? Badina ena kara dika idia hamaoromaoroa neganai, ekskius herevadia ia gwauraia lasi. Ia be sisiba ia abia dae, bona ena kara dika amo ia helalo-kerehai momokani. Unai dainai, Iehova ese ena dika ia gwauatao.​—Sal. 51:3, 4, 10-12.

¹³ Sibona dekenai inai henanadaia ita henia karana amo Davida dekenai gau haida do ita dibaia: ‘Sisiba lau abia neganai, lau badinaia, a? Egu kerere lau gwauraia hedinarai, eiava ekskius herevadia lau gwauraia, a? Ma haida dekenai bleim lau henia haraga, a? Lau hekwarahi kerere gunadia lau karaia lou lasi totona, a?’ Baibel ai abidadama tatau bona hahine edia sivarai oi duahia neganai, sibona dekenai unai bamona henanadai oi henia. Edia hekwakwanai be oi davaria hekwakwanai hegeregerena, a? Dahaka kara namodia idia hahedinaraia? Bena sibona oi nanadaia: ‘Edena dala ai unai abidadama taudia lau tohotohoa diba?’

14. Edena dala ai, tadikaka taihu edia haheitalai namona ita laloa karana ese ita do ia durua?

¹⁴ Tadikaka taihu matamatadia bona burukadia edia haheitalai ese ita idia durua danu. Hegeregere, emu kongrigeisen ai ta hebamo dikadia, famili ena dagedage karadia, eiava gorere badana ta ia haheaukalaia noho, a? Unai tadikaka eiava taihu ena kara namodia oi ura tohotohoa, a? Ena haheitalai namona  oi laloa karana ese oi do ia durua, sibona emu hekwakwanai haheaukalaia daladia do oi dibaia. Ita moale badina unai bamona tadikaka taihu ese abidadama karana dekenai haheitalai namona idia hahedinaraia!​—Heb. 13:7; Iam. 1:2, 3.

15. Aposetolo Paulo ese dahaka sisiba ia henia, bona edena dala ai unai ese ita ia durua, Iehova ena hesiai gaukara ita moalelaia noho totona?

¹⁵ Kongrigeisen ai maino bona lalotamona ia noho totona, ita ta ta ese iseda diba bona goada ita gaukaralaia be namo. Mani Keristani taudia ginigunadia ita laloa. Edia diba, goada bona idia karaia gaukaradia be idauidau. (1 Kor. 12:4, 7-11) To idia kara helulu lasi bona idia hepapahuahu lasi. Paulo ese idia ta ta ia hagoadaia idia gaukara goada “Keriso ena tauanina do idia haginia totona.” Paulo ese Efeso taudia ia tore henia, ia gwau: “Idia gaukara hebou bona edia gaukara ta ta idia karaia namonamo neganai, tauanina ibounai be lalokau dekena amo ia tubu daekau diba.” (Efe. 4:1-3, 11, 12, 16) Paulo ena hereva idia badinaia taudia ese maino bona lalotamona idia havaraia. Hari inai negai, iseda kongrigeisen lalonai unai bamona karadia ita itaia danu.

16. Iseda lalona ita hadaia dahaka ita karaia totona? (Heberu 6:10)

¹⁶ Ma haida ida sibona hahegeregerea karana oi dadaraia be gau badana. Bona Iesu amo diba oi abia bona oi hekwarahi ena kara namodia oi tohotohoa totona. Baibel ai idia noho abidadama taudia edia sivarai bona hari idia noho abidadama taudia edia haheitalai ese oi do ia durua. Bema emu diba bona goada oi gaukaralaia noho, namona be oi diba momokani Iehova ‘ena kara be ia gageva lasi, ia ese emu gaukara do ia laloaboio lasi.’ (Heberu 6:10 duahia.) Iehova hesiai henia karana oi moalelaia noho, bona laloatao mai goada ibounai ida unai oi karaia neganai, ia moale.