POU MOUN MARYE
4: Padone
SA SA VLE DI
Padone vle di pase sou yon bagay yo fè w epi pa kenbe moun nan sou kè pou sa l te fè w la. Padone pa vle di pou n fè kòmsi nou pa wè mal yo fè nou an oswa pran pòz pa t gen anyen ki te pase.
PRENSIP BIBLIK: “Menmsi yon moun gen dekwa pou l plenyen kont yon lòt, se pou youn kontinye sipòte lòt e se pou youn kontinye padone lòt ak tout kè nou.” — Kolosyen 3:13.
“Lè w renmen yon moun, ou pa konsantre w sou defo l. Olye de sa, wè efò l ap fè pou l vin yon pi bon moun.” — Aaron.
REZON KI FÈ SA ENPÒTAN
Si w kenbe moun sou kè, sa ka fè w ditò ni nan domèn fizik ni nan domèn afektif, e sa ka kraze maryaj ou tou.
“Yon lè, mari m te mande m padon pou yon bagay li te fè m ki te fè m mal anpil. Li te difisil pou m padone l. Finalman, mwen te padone l, men mwen regrèt mwen pa t fè sa pi bonè. Paske, sa te lakòz yon tansyon nan maryaj nou ki pa t oblije la.” — Julia.
SA W KA FÈ
EGZAMINE TÈT OU
Pwochen fwa moun ou marye avè l la di w oswa fè w yon bagay ki fè w mal, mande tèt ou:
-
‘Èske nenpòt ti bagay moun di m oswa fè m deranje m?’
-
‘Èske sa l fè m nan grav anpil opwen mwen bezwen pou l mande m padon, oswa m ka annik pase sou sa?’
POU W PALE AK MOUN OU MARYE A
-
Nòmalman, konbyen tan nou konn pran pou nou padone youn lòt?
-
Ki sa nou ka fè pou nou youn padone lòt pi fasil?
IDE
-
Lè moun ou marye avè l la di w oswa fè w yon bagay ki fè w mal, pa panse se espre li fè.
-
Eseye konprann rezon ki fè li aji konsa, toutpandan w sonje “nou tout nou bite tanzantan”. — Jak 3:2.
“Li fasil pou padone lè se nou toule de ki antò, men li pi difisil lè sanble se youn nan nou ki antò. Sa mande anpil imilite pou nou aksepte eskiz e pou nou padone.” — Kimberly.
PRENSIP BIBLIK: “Regle bagay yo byen vit.” — Matye 5:25.
Si w kenbe moun sou kè, sa ka fè w ditò ni nan domèn fizik ni nan domèn afektif, e sa ka kraze maryaj ou tou.
