Kako. Ombeibela kai tja ovimariva oviṋa ovivi nu wina kai raisa kutja ovimariva ombya etisa ouvi auhe. Ovandu tjiva ve tja Ombeibela i tja “ovimariva omuze wourunde auhe,” posi yokutja Ombeibela kai tja nao. Oyo i tja: “Okusuvera ovimariva omuze wourunde auhe.” a—1 Timoteus 6:10, King James Version.

•  Ombeibela i tja vi ohunga novimariva?

•  Ongwaye Ombeibela tji rakiza ohunga nokusuvera ovimariva?

•  Omomuano uṋe mu matu yenene okumuna ouwa okuza kondunge yOmbeibela ohunga novimariva?

•  Omazeva wOmbeibela ohunga novimariva

 Ombeibela i tja indu ovimariva tji vya ungurisiwa nawa nounongo vi yenene okurira “ondjamo.” (Omuzuvarise 7:12) Wina, Ombeibela i hungira oviṋa oviwa ohunga na imba mbe raisa ouharupu ku varwe.—Omiano 11:25.

 Posi yokutja, Ombeibela i tu rakiza kutja atu ha vara otjimariva otjotjiṋa otjinanḓengu mehupo. Oyo i tja: “Ongarero yeṋu ai rire oyokusuvera ovimariva, nu kareye nohange na imbi mbi mu na vyo.” (Ovaheberi 13:5, ONT) Mezeva ndi, matu rihongo kutja matu sokuungurisa ovimariva nawa nokuhinokupaha okutumba. Nungwari eṱe matu sokukowa moviṋa mbi matu hepa tjiri, tjimuna ovikurya, ozombanda, nopoṋa okukara.—1 Timoteus 6:8.

 Ovandu vominenetima kamaave munu omuinyo waaruhe. (Ovaefese 5:5) Mena rokutja, omunenetima wa sana nokukarera ovisenginina poo omerikotameneno woposyo. (Ovakolose 3:5) Nu wina mongondjero yawo yokupaha imbi mbi mave vanga, omunenetima potuingi u tjita kutja ve ise okuhupa otja komirari omiwa. Omiano 28:20 ri tja: “Ingwi ngu kondja okutumba tjimanga, tjiri, ma verwa.” Owo mape ya ave rorwa okukara norupa momateyero woveta, tjimuna okutjita omatiku, okupunda ovimariva, okuuma, okumbenḓoroha poo okuzepa.

 Okusuvera ovimariva maku yenene okutuetera omihihamo nandarire kutja okwo kaku tu hingi okutjita ozongaro ozombi. Ombeibela i tja: “Ovandu imba mbe vanga okutumba ve wira momarorero na mongwehe yozonḓuma ozengi zouyova nozonḓepe.”—1 Timoteus 6:9.

 Indu tji tu hi nokuyandjera ovimariva okututjita kutja atu ha kara nonḓuviro ku Mukuru, eṱe matu yenene okukara noumune ouwa, nu Mukuru ma kara nonyuṋe mweṱe nu me tu vatere. Ku imba mbe kondja okutjata ku Mukuru, eye wa kwizika kutja: “Ami himee ku esa ko; nu himee ku imbirahi ko!” (Ovaheberi 13:5, 6) Eye wina wa kwizika kutja “omundu omuṱakame u serwa ondaya onyingi.”—Omiano 28:20.