EPU ROKOMBANDA | OMBEIBELA EMBO NDA TUURUNGA
Omomuano uṋe omatjangwa wOmbeibela omakuru mu ye ha kurupire?
OMATOKERO: Ovatjange vOmbeibela na imba mbaave i tjangurura aave ungurisa o-Papyrus nopergament. * (2 Timoteus 4:13) Omatjangwa nga tjangerwe pozombapira nḓo ya tuurunga vi omatokero?
O-papyrus i tauka, i pita motjivara nu i rira ombepu tjimanga. Richard Parkinson na Stephen Quirke, ovanaunongo movize vyomehi vya Engipte va tja: “Ombapira korusenina i kanyanyauka ngandu tji ya karira oruuma uriri. Ombapira tji ya mangwa nai paterwa motjiṋa pe ya ai hara ombundu poo ai woro mena routarazu, nu ai riwa i yomapuku poo ozohowa indu tji ya sirwa mehi.” Ozombapira nḓa o-papyrus, tji za za nokumunika za tuwa pomutenya poo poṋa pu pe noutarazu ouingi mbwa tjita kutja ze hakahane okukurupa.
Opergament i kara orure po-papyrus, posi yokutja, tji i ha ṱizirwe nawa i hakahana okukurupa indu tji ya tuwa poruveze pu pe noutarazu poo oupyu ouingi. * Opergament wina i yenena okuriwa i youpuka. Ku nao, embo ndi Everyday Writing in the Graeco-Roman East, ra tja omatjangwa omakuru “kaaruhe tji ye tuurunga.” Andakuzu omatjangwa wOmbeibela kaye hupire ombuze yayo wina atja i zenga.
OMUANO OMBEIBELA MU YA TUURUNGA: Omatwako wa Moses ya rakiza ozombara azehe ‘okutjangurura membo inga omatwako wa Ndjambi,’ momambo yetano omatenga wOmbeibela. (Deuteronomium 17:18) Kombanda yanao, ovanaunongo va tjangurura omatjangwa omengi meserewondo etenga O.Z., nga tjita kutja ye yenene okumunika mozondjuwo zomaworonganeno wombongo moIsrael atjihe na kotukondwa two kokure moMakedonie. (Lukas 4:16, 17; Oviungura 17:11) Omomuano uṋe omatjangwa omakuru mu ya tuurunga nga ku ndino?
Omatjangwa nge tjiukwa otja o-Dead Sea Scrolls ya tuurunga oure wozombura ozengi movitjuma vyomunoko mbya ri motupoko motukondwa tu tu ha munu ombura nawa
Philip W. Comfort, omunaunongo mEtestamente Epe wa tja: “Ovajuda aave tjiukirwa kokuṱizira omambo womatjangwa movitjuma kutja aye ha kurupa tjimanga.” Ovakriste wina va kayenda komurungu okutjita nao. Ku nao, omatjangwa tjiva wOmbeibela omakuru ya munika movitjuma mbya ungurirwe pomunoko motupoko twonḓorera na motukondwa tu tu ha rokwa nawa.
KWA KONGORERA TJIKE?: Otupa otuingi twomatjangwa wOmbeibela tu twa kara kombanda yozombura 2 000 twa tuurunga nga ku ndino. Kape nembo rarwe ekuru, ndi nomatjangwa omengi omakuru nao.
^ par. 3 O-papyrus ombapira ndja ungurwa pomuti mbwi o-papyrus mbu hapa meṋe yomeva. Opergament ya ungurwa pomikova vyovipuka.
^ par. 5 Otjotjihorera, ombapira ndja tuwa omunwe kembo kotjiveta yo-U.S. Declaration of Independence ya tjangerwe popergament. Nu kombunda yozombura nḓe ri kehi yo-250, ombapira ndjo ya kurupa nga indu tji i ha yenene okulesewa.
