Ovandu ovengi mbe ritja Ovakriste mouparanga wouye ve ungurisa otjikoroise momerikotameneno wawo. Nandarire kutja Ovahongonone va Jehova Ovakriste, eṱe katu ungurisa otjikoroise momerikotameneno wetu. Omena raye?

 Epu rimwe orondi rokutja Ombeibela kai tja Jesus wa paperwa kotjikoroise, posi ya i tja wa paperwa komuti. Embo rOtjigrike nda ungurisiwa mOmbeibela nda torokwa otja “otjikoroise” ri heya “otjihenḓe tji tja kurama ongarate, poo omuti.” (Oviungura 10:39) Ombeibela i rakiza oukahu kOvakriste okunakaura ‘omerikotameneno wovisenginina,’ nu pu mape hee kutja katu sokuungurisa otjikoroise momerikotameneno wetu.—1 Ovakorinte 10:14; 1 Johanes 5:21.

 Tara ku imbi Jesus mbya hungira, indu tja tja: “Tji mwa suverasana, indino avehe otji mave tjiwa kutja oweṋe ovahongewa vandje.” (Johanes 13:34, 35) Jesus wa kahurura oukahu kutja orusuvero ondu raisa Ovakriste vatjiri, nungwari katjikoroise poo otjiṋa tjarwe.