Kena Mac 2019, Kot Besai ba Bulgaria mansutka pemutus ti manah pasal tiga iti kes ke bekaul enggau bala menyadi Kristian kitai. Pemutus tu meri hak ngagai bala menyadi Kristian kitai bejalaika pengarap ba menua nya.

Dua iti kes tu bekaul enggau jaku petenah ke datai ari media. Kena taun 2012, surat kabar Vseki Den, ngeluarka artikel ti betenah pengarap kitai. Pia mega, kena taun 2014, stesen TV SKAT mansutka riput ti pelesu pasal gerempung kitai. Kedua-dua media nya, enggai ngaku ngagai orang mayuh pasal riput sida ti salah. Pengudah suah mai kes tu ngagai kot lalu ngapil, pengujung iya kes tu datai ba Kot Besai. Kena 18  Mac 2019, Kot Besai mutuska utai ke udah digaga stesen TV SKAT salah ba undang-undang. Kena 26 Mac, Kot Besai mega mutuska surat kabar Vseki Den salah ba undang-undang, laban surat kabar nya madahka utai ti bula sereta jaku ti begedi.

Kes ti ketiga bekaul enggau bala menyadi kitai ke diperinsa raban politik ke dikumbai VMRO-Bulgarian National Movement. Kena 17 April 2011, bala menyadi kitai ngintu pengawa Ngingatka Pemati Jesus. Enggau enda disadang bisi 60 iku orang ke diuluka tuai politik VMRO, iya nya Georgi Drakaliev, nyerang bala menyadi kitai nyentukka sida bakal. Bala menyadi kitai mai kes tu ngagai kot, lalu nyau kelama kes tu datai ba Kot Besai. Kena 20 Mac 2019, Kot Besai ngukum Drakaliev lalu ngasuh iya mayar ganti rugi ngagai bala menyadi kitai.

Kitai gaga ati laban kitai menang ba tiga iti kes tu. Pemutus ke datai ari kes tu ulih dikena kitai nyaga bala menyadi kitai ngambika ‘diau likun dalam pemaik, nangi sereta bebasaka Petara.’—1 Timoti 2:2.