Kena 24 Februari 2021, Nury Turkel ke Pesuruhjaya USCIRF a madahka iya deka nguji nulung Menyadi Shamil Khakimov, ke beumur 70 taun, dilepaska ari jil. USCIRF nya numbuhka siti projek kena nulung orang ke benung dijil ketegal pengarap sida. Pesuruhjaya Turkel nerangka: “Kenyau ari taun 2019, orang lelaki ke tuai sereta sakit tu amat merinsa dalam rumah jil ti balat sekut enggau mensia ketegal iya diberi ukum jil ti enda lurus enggau pengelama tujuh taun setengah. Orang tu dijil taja pan iya nadai bepenyalah, iya semina besembah nitihka adat Saksi-Saksi Jehovah lalu enda ngachau orang bukai. Tang ukum jil tu nyangka deka nabanka nyawa iya.”

Menyadi Shamil udah balu. Iya seiku ari 24 iku Saksi-Saksi Jehovah ba Tajikistan utara ke ditasat bala pegawai ari Department of Organized Crime Control (DOCC) kena bulan Januari enggau Februari 2019. DOCC nya nangkap Menyadi Shamil, lalu nasatka iya pasal atur gerempung Saksi-Saksi Jehovah sereta baka ni ku jalai iya empu nyadi Saksi.

Menyadi Shamil ditan pengelama lapan jam. Ketegal iya baru udah beputung, iya patut berubat Tang maya nya iya nadai nerima tulung ke diguna iya. Nambahka nya, iya pan napi penyakit darah tinggi. Nyau kelama iya dipulaika baru ngagai rumah iya, tang dia bala polis ngerampas perengka elektronik, Bup Kudus, litaricha sereta pasport iya. Ketegal pasport iya dirampas, Menyadi Shamil enda ulih ngambi duit pinchin iya kena mayar bil lutur ngambika terus berubat pengudah beputung.

Kena 28 Februari 2019, seiku hakim ari Kot Nengeri Khujand mutuska Menyadi Shamil deka ditan nyentukka kes iya dipechara. Timpuh nya dipanjaika tiga kali. Sekumbang kes iya diperesa sereta dipechara ba kot, iya mengkang ditan dia.

Kena 10 September 2019, iya dikumbai besalah sereta diukum jil pengelama tujuh taun setengah. Taja pia, kena 4 Julai 2020, pegawai rumah jil madahka Menyadi Shamil, ukum iya deka dikurangka. Iya deka dilepaska dua taun, tiga bulan enggau sepuluh hari tumu agi ari ke disangka ketegal siti undang-undang ba Tajikistan. Diatu, iya dijangka pansut ari rumah jil kena 16 Mei 2024.

Kitai andalka Jehovah deka terus nulung bala menyadi kitai ngambika sida ulih betan enggau ati ti liat sereta gaga.—Masmur 20:2.