Kemayaharitu, majak mayuh bala anak mit ngembuan handphone diri empu, lalu sida mega ulih muka internet lebuh sida kediri aja dalam bilik. a Nama asil iya enti anak nuan bisi handphone? Ninting hari, ni pengelama sida ulih ngena handphone?

•  Utai ke patut ditemu nuan

•  Utai ke ulih diperundingka nuan

•  Tanya meh diri empu enti nuan udah sedia

 Asil Iya

•   Anak likun, apai indai lantang ati. Bethany, ke ngembuan dua iku anak ke bebelas taun madahka: “Dunya kemayaharitu mayuh penyai. Bala anak patut bisi chara ngiga apai indai sida.”

   Seiku indai ke benama Catherine madah: Nengah handphone, bisi aplikasi ke ulih nemu dini endur anak nuan. Indah lebuh iya benung deriba, nuan pan ulih nemu pengelaju kerita nya dibai iya.”

•   Kena ngaga kereja sekula. “Bala anak ulih bulih kereja sekula nengah email tauka mesej. Sida mega ulih ngiga pengajar sida enggau senang,” ku seiku indai ke benama Marie.

 Empas Iya

•   Handphone ngambi mayuh awak. Orang biak senang ngabiska mayuh jam ngena handphone sida. Iya ke amat, penyampau jam ke dikena apai indai bejaku enggau anak sida, sama penyampau enggau jam ke dikena sida ngena handphone. Nya kebuah, seiku kauselor madah, mayuh ruang bilik nyau baka seraban orang ke enda ngelala pangan diri, tang semina fokus ngagai handphone sida aja. b

•   Pornografi. Nitihka siti pansik, lebih ari setengah bala nembiak ngiga pornografi ninting bulan. Tu enda ngenyitka kitai, laban kelalu senang sida bulih pornografi nengah handphone. William, seiku apai ke ngembuan dua iku anak ke agi nembiak madah: “Lebuh apai indai meri anak sida handphone, nya baka ke muka jalai ngagai bala anak, tama ngagai kedai pornografi sebarang maya sida ka.”

•   Enda ulih idup enti nadai handphone. Mayuh orang gian enggau handphone. Enti handphone sida lenyau, sida enda ulih berunding, tusah ati, indah bisi nya nyau sakit. Bisi apai indai ngasaika, lebuh anak sida bisi handphone, ulah anak sida majak enda mereti. Carmen madah: “Lebuh aku deka berandau enggau anak lelaki aku, iya nyeling aku, lalu nyaut enggau kasar laban iya enggai dikachau maya iya meda handphone.”

•   Empas ke bukai. Sida ke ngena handphone, engka senang agi dikachau tauka nerima gambar sereta video ti kamah. Nambahka nya, pengerai sida mega engka dikachau, laban chara sida duduk enda betul tauka enda chukup tinduk. Bisi bala nembiak ngena “ghost app,” iya nya siti aplikasi ke baka kalkulator, tang iya ke amat nya aplikasi ke bukai. Sida ngena tu, ngambika apai indai enda nemu nama pengawa sida.

   Daniel, seiku apai ti ngembuan anak ke agi nembiak madah: “Handphone ngenyenangka anak nuan ngiga sebarang utai ba internet, enda ngira manah tauka jai.”

•   ‘Kati anak aku amat begunaka handphone.’

   Ajar Bup Kudus: “Orang ke pintar deka nyingkang enggau bejimat.” (Jaku Dalam 14:15) Nya alai, tanya diri empu:

   ‘Kati tuju aku meri anak aku handphone, ketegal aku deka nyaga pengelikun iya tauka bisi kebuah bukai? Kati udah aku berundingka asil sereta empas nya ngagai anak aku? Kati aku patut meri iya handphone ke bisi internet, tauka handphone ke ulih kena call aja?’

   Seiku apai ke benama Todd madah: Nuan ulih meli handphone ke biasa aja ngagai anak nuan. Enggau chara nya, iya agi ulih talipun tauka nganjung mesej ngagai nuan. Tu pan ulih ngelimat duit.”

•   ‘Kati anak aku ngena handphone enggau chara ti betul?’

   Ajar Bup Kudus: “Orang ke bepenemu-dalam endang seruran ngereja utai ti ngena.” (Pengajar 10:2) Nya alai, tanya diri empu:

   ‘Kati anak aku ulih dipechaya? Kati iya ka madahka aku ba semua utai ke digaga iya? Kati iya enda bula, kelebih agi pasal enggau sapa iya begulai? Kati iya nemu nagang diri lebuh iya meda TV, main tablet, tauka komputer?’ Seiku indai ke benama Serena madah: “Handphone enda bula beguna, tang pan bahaya. Enti nuan meri handphone ngagai anak mit, kati iya ngena nya enggau chara ti betul?”

•   ‘Kati aku sedia megai tanggung pengawa tu?’

   Ajar Bup Kudus: “Ajar anak mit jalai idup.” (Jaku Dalam 22:6) Nya alai, tanya diri empu:

   ‘Kati aku empu nemu chara nyeliahka bahaya maya ngena handphone, ngambi ulih ngajar anak aku? Kati aku nemu ngena chara, ngaduka setting ba handphone anak aku, ngambika aku ulih nyaga iya? Baka ni aku ngajar anak, ngambika iya ngena handphone enggau chara ti betul? Daniel, apai ke disebut tadi madah: “Aku meda, apai indai meri handphone ngagai anak sida, tang sida enda meresa baka ni anak sida ngena handphone nya.”

 Kitai ulih nyimpulka: Bala anak patut diajar ngena handphone sida enggau chara ti betul. Bup Indistractable madahka: “Mayuh ari bala anak ngena mayuh jam enggau handphone sida, kelebih agi enti apai indai enda ngemataka sida.”