Bup Kudus enda madah enggau nyemetak pasal bebuaika anak. Tang, bisi mayuh ayat ke nunjukka runding Petara pasal nyawa, nyengkaum anak ke agi mit ti bedau ada.

 Nyawa nya pemeri ari Petara. (Pemungkal 9:6; Masmur 36:9) Ba runding Petara, semua nyawa nya berega, nyengkaum anak mit ke agi dalam kandung. Nya kebuah, enti seseiku orang sengaja bebuaika anak, nya sama baka ke munuh.

 Ukum Moses madah, “Enti orang lelaki belaya, lalu ngemediska siku indu ke ngandung, lalu indu nya lenyau kandung, tang nadai pedis nama-nama kelimpah ari ke lenyau kandung, orang ke ngemediska iya enda tau enda diasuh mayar ukum nitihka pinta laki indu nya, sereta dikemendarka bala hakim. Tang enti indu nya bakal, ukum ti dikena nya: nyawa balas nyawa,”—Pemansut 21:22, 23. a

•  Kemaya nyawa nya berengkah?

•  Kati Petara ngampunka orang ke kala bebuai anak?

•  Kati ulih bebuai anak enti nya ngachau nyawa indai tauka anak ke dalam kandung?

 Ba runding Petara, nyawa nya berengkah pengudah indai nya ngandung. Nitihka Bup Kudus, Petara ngumbai anak mit ke dalam kandung nya udah dikira Iya seiku nyawa. Aram kitai meda beberapa ayat ke nunjukka runding Petara, nyawa anak mit ke bedau ada nya sama enggau nyawa anak mit ke udah ada.

•   Raja David madah, “Nuan endang udah meda aku sebedau aku ada.” (Masmur 139:16) Petara udah ngumbai David seiku mensia taja pan iya bedau ada.

•   Petara bejaku ngagai Jeremiah, “Sebedau Aku nempa nuan dalam kandung indai nuan, Aku endang udah ngelala nuan, lalu sebedau nuan ada, Aku endang udah milih nuan; Aku endang udah ngeletak nuan nyadi nabi ke semua bansa.” (Jeremiah 1:5) Petara udah netapka pengawa ke patut digaga Jeremiah indah sebedau iya ada.

•   Penulis Bup Kudus ke benama Luke, iya nya seiku lutur, ngena jaku Gerika kena nerangka, anak mit ke bedau ada dalam kandung sama enggau anak mit ke udah ada.—Luke 1:41; 2:12, 16.

 Taja pan seseiku orang engka kala bebuai anak, Petara deka ngampunka iya, enti iya amat udah nesal ati lalu ngembuan runding Petara pasal nyawa. (Masmur 86:5) Bup Kudus madahka, ‘Jehovah endang kasih sereta rindu . . . Baka timur ti jauh ari barat, baka nya meh penyauh Iya muai dosa kitai.’ b (Masmur 103:8-12) Nya kebuah, iya enda ulih terus ngukum diri ketegal penyalah ke suba, enti iya udah amat nesal ati.

 Nitihka ayat Bup Kudus ke disebut ba atas, bebuai anak nya endang enda dikemendarka, taja pan nyawa indai tauka anak ke bedau ada nya engka ulih pedis.

 Tang, baka ni enti bisi utai jai ke enda disadang nyadi maya beranak, lalu orang nya patut milih sekalika, milih nyawa indai tauka nyawa anak iya? Tu jarang nyadi, tang enti tu nyadi, sida ke bekaul enggau pekara tu patut ngaga pemutus kediri empu.