Au. Bup Kudus ulih nulung kitai mutarka asai ati ti besalah. (Masmur 32:1-5) Enti kitai kala ngereja penyalah, lalu amat-amat udah nesal ati, Petara deka ngampun lalu nulung kitai berubah. (Masmur 86:5) Dalam Bup Kudus ngajar, kekadang asai ati ti besalah bisi pemanah. Chunto iya, asai ati ti besalah ngasuh kitai ngemetulka penyalah diri, lalu bebendar enggai ngulang penyalah ti sama. (Masmur 51:17; Jaku Dalam 14:9) Taja pia, dalam Bup Kudus pan ngelalau kitai, anang kelalu balat ngukum diri, laban tu ngujungka kitai ngasaika nadai agi pengadang tauka ngumbai diri enda beguna ba mata Petara. Enti kitai ngembuan asai ati ke baka nya, kitai engka “enda ulih natka penusah ati diri.”—2 Korint 2:7.

•  Nama kebuah kitai berasai besalah?

•  Baka ni chara aku mutarka asai ati ti besalah tu?

•  Sekeda ayat Bup Kudus pasal asai ati ti besalah enggau pengampun ke diterima

 Bisi beberapa iti kebuah kitai berasai besalah. Kitai engka nemu diri udah ngemediska ati orang ti dikesayauka kitai, tauka kitai engka ngasaika diri patut ngereja sesiti pengawa tang enda ulih ngereja nya. Kekadang, kitai engka berasai besalah taja pan kitai enda besalah. Chunto, enti kitai netapka standard tauka juluk ati ti tinggi ngagai diri empu, kitai engka berasai besalah tiap kali enda ulih nyapai juluk ati nya. Nya kebuah Bup Kudus, meransang kitai ngembuan runding ti betul pasal tatak diri empu.—Pengajar 7:16.

 Ari ke majak dilamun asai ati ti besalah, enggau naka ulih meh ngemetulka penyalah nuan. Chara iya:

•   Ngaku penyalah diri. Besampi meh, minta ampun ngagai Jehovah. a (Masmur 38:18; Luke 11:4) Enti nuan nesal ati, lalu bebendar enda ngulang penyalah ti sama, nuan ulih andal Jehovah deka ningaka sampi nuan. (2 Ban. 33:13; Mas. 34:18) Petara ulih meda utai ke enda ulih dipeda mensia, iya nya ati enggau runding mensia ti dalam. Lebuh Iya meda kitai bebendar ngelengkaka jalai ti salah, Iya “deka ngampun kitai ari dosa kitai, lalu nuchi kitai ari semua penyai.”—1 John 1:9; Jaku Dalam 28:13.

   Amat, enti nuan ngereja penyalah ngagai seseiku orang, nuan patut minta ampun ngagai orang nya. Tang tu enda sesenang jaku. Tu begunaka pemerani sereta pemaruh ati. Tang, enti nuan minta ampun ari ati, nuan deka bulih dua iti penguntung ti besai, iya nya: Nuan deka berasai lantang agi, lalu ulih bebaik enggau orang nya.—Matthew 3:8; 5:23, 24.

•   Belematika ayat Bup Kudus pasal pengasih Petara. Chunto iya, ba 1 John 3:19, 20, Bup Kudus madahka, “ati kitai besalahka kitai.” Reti iya, kitai engka kelalu ngukum diri empu, lalu ngasaika diri enda layak nerima pengasih Petara. Tang ba ayat nya tadi pan bisi nyebut, ‘Petara besai agi ari ati kitai.’ Nama reti tu? Reti iya, Petara nemu agi semua utai pasal kitai, lalu faham pasal asai ati sereta pengelemi kitai. Iya mega nemu, kitai tu enda sempurna sereta ulih ngereja penyalah. b (Masmur 51:5) Nya kebuah, Petara enda nulak orang ke amat-amat udah nesal ati.—Masmur 32:5.

•   Anang majak betatika penyalah ke udah lepas. Dalam Bup Kudus, ngembuan mayuh cherita lelaki enggau indu ke kala ngereja penyai, tang udah nya berubah. Seiku ari nya, Saul ke asal ari Tarsus, udah nya dikelala enggau nama Rasul Paul. Lebuh iya agi nyadi orang Parisi, iya kala ngereja penyai ngagai murid Jesus. (Surat Kereja Rasul 8:3; 9:1, 2, 11) Tang pengudah iya nemu diri ngelaban Petara sereta Messiah, tauka Kristus, iya nesal ati, berubah, lalu nyadi orang Kristian ke ulih diteladan kitai. Paul sigi nesal ati enggau ulah iya ke suba, tang iya enda majak betatika penyalah ke udah lepas. Laban Paul nemu pasal pengasih Petara. Nya alai, Paul nyadi seiku penginjil ti ransing amat, lalu iya seruran fokus ngagai pengidup belama iya jemah ila.—Pilipi 3:13, 14.

 Jeremiah 31:34: “Aku deka ngampun dosa sida, lalu Aku enda agi ingatka penyalah sida.”

 Reti: Pengudah Petara ngampunka dosa kitai, Iya enda ingatka penyalah nya agi. Iya nuchi lengis dosa kitai.