Enda ulih. Ari ukum ke diberi Petara ngagai bansa Israel, nitihka New Catholic Encyclopedia madahka, “Mayuh ayat Bup Kudus ke nunjukka bukti, sembah ti bendar enda begunaka patung.” Peratika beberapa iti ayat Bup Kudus tu:

•   ‘Anang ngaga engkeramba ke diri empu neladan gamal utai ti di langit, tauka utai ti ba tanah, tauka utai ti dalam ai, tauka utai ti di baruh tanah. Anang meremi ngagai engkeramba, tauka nyembah sida, laban Aku tu Jehovah Petara ti chemburu. Aku ngukum tiris pantis orang ngagai ketiga enggau keempat serak ketegal penyalah aki ini sida ke nulak Aku.’ (Pemansut 20:4, 5) Laban Petara nya Petara ti chemburu, Iya tentu enda rindu meda kitai nyembah tauka meremi ngagai patung, gambar, engkeramba, mensia, tanda, enggau mayuh agi.

•   “Aku enggai nejuka engkeramba bempu puji ti patut diberi ngagai Aku.” (Isaiah 42:8, Alkitab Versi Borneo) Petara nulak sembah ti ditujuka ngagai Iya tang nengah patung. Maya bansa Israel nyembah Petara ngena patung anak sapi emas, Petara ngumbai sida “udah bedosa lalu udah nulak” Iya.—Pemansut 32:7-9.

•   ‘Kitai tu anak Petara, kitai enda patut ngumbai Iya baka anak patung ti ditempa ari emas tauka ari pirak, tauka ari batu ulih pengelandik enggau penau mensia.’ (Kereja Rasul 17:29) Orang kapir tauka orang ke enda bepengarap selalu ngena patung ba sembah. Patung ke dikena sida nyembah nya digaga mensia. Iya ke bendar, orang Kristian “idup ngena pengarap, ukai ngena utai ti dipeda”, baka ke disebut dalam Bup Kudus.—2 Korint 5:7.

•   “Anak, kejangka diri jauh ari engkeramba!” (1 John 5:21) Enti nitihka semua pesan ke udah kala diberi ngagai bansa Israel enggau orang Kristian, Bup Kudus nadai kala nulis pasal Petara nerima tauka ngemendarka patung tauka tanda dikena ba sembah ngagai Iya.