Ba runding nuan, baka ni gaya orang ke suah irau nya? a Nuan engka ngambarka, orang ke baka tu engka enda ulih ngereja sebarang pengawa, tusah tinduk, tauka seruran madahka pengirau diri.

 Amat bisi orang ke baka nya lebuh irau. Tang bala pemansik madah, ba sekeda orang, chara sida napi pengirau nya enda sama, kelebih agi sida ke lelaki. Siti riput madah, “Lebuh irau, lelaki deka agi ngirup ai bisa tauka makai sesiti ubat kena muai pengirau nya. Nyadi, lelaki ke gian ngirup ai bisa engka mayuh pengirau. Nambahka nya, lelaki ke selalu irau mega jampat mangah.”

 Tang, ukai semua lelaki baka nya. Chara tiap iku orang mutarka pengirau enda sama. Taja pia, enda ulih diseliahka, ba “hari ti penudi tu,” endang mayuh orang ke napi pengirau. (2 Timoti 3:1) Enti nuan benung napi penanggul tu, baka ni ajar Bup Kudus ulih nulung nuan?

 Ba Bup Kudus, ngembuan mayuh chara ke ulih dikena kitai mutarka pengirau. Peda tiga iti chunto tu:

1.  1. “Nya alai, anang irauka pasal pagila, laban pagila chukup pengirau ke diri empu. Penusah ke sehari tu chukup ke sehari tu.”—Matthew 6:34.

    Reti: Kitai enda ibuh kelalu irau pasal utai ke bedau nyadi, tauka ke engka deka nyadi. Suah iya, lain utai ke disangka, lain utai ke nyadi. Kekadang, utai ke nyadi nya manah ari ke disadang kitai.

    Uji tu: Kingatka baru, utai ke dikeirauka nuan enda nyadi. Perundingka, utai ke dikeirauka nuan diatu. Udah nya, uji peda ni pemesai peratus utai ke dikeirauka nuan nya ulih nyadi.

2.  2. “Orang belajar ari pangan diri nya baka besi ti ngansah besi.”—Jaku Dalam 27:17.

    Reti: Kitai ulih mutarka pengirau ari bantu orang bukai. Tang, kitai empu patut deka nerima tulung nya. Orang bukai engka madahka kitai chara bepelasarka peneleba sida empu. Tauka, abis enda pan sida engka nulung kitai ngembuan runding ti positif pasal penanggul ke benung ditapi.

    Uji tu: Perundingka, sapa ke engka kala napi penanggul ti sama baka nuan. Iya engka ulih meri lalau ti ngena. Uji tanya, baka ni iya mutarka pengirau nya?

3.  3. “Serahka semua pengirau kita ngagai Iya, laban Iya ngibun kita.”—1 Peter 5:7.

    Reti: Petara amat ibuhka orang ke benung merinsa. Iya mai kitai besampi ngagai Iya, lalu madahka pengirau diri.

    Uji tu: Tuliska utai ti ngirauka nuan. Udah nya, sebut nya maya nuan besampi ngagai Petara. Padahka tiap iti penanggul nya, lalu minta bantu ari Petara mutarka nya.

 Dalam Bup Kudus, ukai semina bisi lalau mutarka pengirau. Pia mega bisi madah pasal semaya jemah ila, iya nya semua pengirau kitai ke diatu, deka lesap belama iya. Baka ni?

 Perintah Petara deka munaska semua batang pengirau. (Pemandang 21:4) Maya Perintah nya merintah atas bumi, indah pengingat kitai pasal utai ke kala nyadi suba, ti ngasuh kitai irau tauka stres, badu agi ngasuh kitai tusah ati.—Isaiah 65:17.

 Tu meh semaya ke disebut ‘Petara ti pun pemaik.’ (Rome 16:20) Iya deka kitai andal: “Aku nemu pelan Aku ke kita, . . . kena meri kitai pengidup enggau pengadang ke jemah ila.”—Jeremiah 29:11.