Enggau silik kami nitihka nama utai ke dipadah dalam Bup Kudus bekaul enggau Ngingatka Pemati Jesus. (1 Korint 11:20) Mayuh ari pengarap Kristian ke bukai, enda ngintu pengawa tu bepelasarka Bup Kudus.

 Tuju Ngingatka Pemati Jesus kena nunjukka kitai beterima kasih ke tebus iya. (Matthew 20:28; 1 Korint 11:24) Pengawa tu ukai kena ngulihka berekat Petara tauka ngampunka dosa. Nitihka ajar Bup Kudus, dosa kitai ulih diampunka enti kitai arapka Jesus, ukai semina pengawa ke dikereja kitai ba pengarap aja.—Rome 3:25; 1 John 2:1, 2.

 Jesus meri pesan ngagai bala murid iya ngambika Ngingatka Pemati iya, tang iya enda nyebut enggau nyemetak ni penyuah sida patut ngereja nya. (Luke 22:19) Sekeda orang ngasaika pengawa tu patut diintu ninting bulan, ninting minggu, ninting hari, beberapa kali dalam sehari, tauka nitihka penyuah dikedeka. a Tang, peratika pekara tu.

 Jesus madahka pasal Makai Malam Tuan ngagai orang Judah maya sida ngintu pengerami Paska, udah nya iya mati ba hari ti sama. (Matthew 26:1, 2) Tu enda nyadi pia aja. Ayat Bup Kudus mandingka tebus Jesus enggau anak domba pengerami Paska. (1 Korint 5:7, 8) Pengerami Paska diintu sekali setaun. (Pemansut 12:1-6; Adat Lewi 23:5) Pia mega, Ngingatka Hari Pemati Jesus diintu orang Kristian abad keterubah, lalu Saksi-Saksi Jehovah kemayaharitu nitihka teladan sida ngintu pengawa nya sekali setaun.

 Chara Jesus Ngingatka Hari Pemati iya ukai semina nulung kitai nemu penyuah pengawa tu diintu, tang mega nulung kitai nentuka haribulan enggau jam iya. Iya madah pengawa tu deka diintu pengudah mata panas padam kena 14 Nisan 33 Masihi, nitihka kalindar Bup Kudus. (Matthew 26:18-20, 26) Ninting taun, kami Ngingatka Hari Pemati Jesus kena haribulan tu, sebaka enggau orang Kristian ba abad keterubah.

 Taja pan 14 Nisan 33 Masihi nya kena Hari Lima, tang ukai reti iya haribulan tu chun-chun sama ninting taun. Kena nentuka hari nya sama enggau 14 Nisan ninting taun, kami ngira nitihka chara ti sama baka jeman Jesus, lalu ukai nitihka chara ke dikena kalindar orang Judah jeman moden. b

 Maya Makai Malam Tuan, Jesus ngena roti ti enda beragi enggau wain. (Matthew 26:26-28) Baka Jesus, kitai mega ngena roti ti enda beragi tauka roti ti enda dichampur enggau utai bukai. Kami mega ngena wain mirah ti tulin, ukai jus anggur tauka wain ke udah dichampur enggau utai bukai.

 Sekeda pengarap Kristian ngena roti ti udah dichampur enggau ragi tauka yis. Tang Bup Kudus madah, ragi tauka yis suah digambarka baka dosa. (Luke 12:1; 1 Korint 5:6-8; Galatia 5:7-9) Nyadi, semina roti ti enda dichampur enggau ragi tauka utai bukai ulih ngambarka tubuh Kristus ti enda bedosa. (1 Peter 2:22) Kelimpah ari nya, sekeda gerija mega ngena jus anggur ke enda diperam, tang ukai ngena wain. Tu ketegal gerija nagang ngirup ai bisa. Tang tagang tu enda bepelasarka Bup Kudus.—1 Timoti 5:23.

 Roti ti enda beragi enggau wain mirah ti dikena lebuh Ngingatka Pemati Jesus nya siti tanda, ti ngambarka tubuh enggau darah Jesus. Roti enggau wain enda nyengala betukar nyadi tubuh enggau darah Jesus, baka ke suah diperundingka sekeda orang. Peratika penerang ti bepelasarka Bup Kudus tu.

•   Enti Jesus ngasuh bala murid ngirup darah iya, reti nya, iya deka sida ngelanggar pesan Petara pasal makai darah. (Pemungkal 9:4; Surat Kereja Rasul 15:28, 29) Nadai patut Jesus deka bala murid iya ngelaban pesan Petara.—John 8:28, 29.

•   Bala rasul tentu enda ngirup darah Jesus. Tu ketegal Jesus empu madah darah iya deka “dituang.” Reti iya, maya nya Jesus bedau agi mati.—Matthew 26:28.

•   Jesus semina nyerahka diri “sekali aja.” (Hebrew 9:25, 26) Tang enti roti enggau wain betukar nyadi tubuh enggau darah Jesus lebuh Makai Malam Tuan ninting taun, reti nya Jesus patut mati ninting taun.

•   Jesus madah: “Kereja tu kena ngingatka aku,” ukai “kena nyerahka nyawa aku.”—1 Korint 11:24.

 Penemu pasal roti enggau wain ke betukar nyadi tubuh enggau darah Jesus nya nitihka chara beberapa iti ayat Bup Kudus ti udah disalin. Chunto iya, mayuh ari salin, jaku Jesus pasal wain disalin ngagai: “Tu darah aku.” (Matthew 26:28) Tang, mayuh pakar Bup Kudus setuju enggau leka jaku “tu” enda ngena kena ngambarka utai ke deka dikenataika Jesus. Chunto iya, nitihka Jacques Dupont, leka jaku ke ngena iya nya, “tu ngambarka” tauka “tu ngarika.” Nya alai, Jesus ke bendar iya benung ngajar ngena jaku silup.—Matthew 13:34, 35.

 Lebuh Saksi-Saksi Jehovah Ngingatka Hari Pemati Jesus, semina sekeda orang aja makai roti enggau ngirup wain. Nama kebuah?

 Darah Jesus nyadika “sempekat ti baru” kena nganti sempekat ti keterubah ba entara Jehovah enggau bansa Israel kelia. (Hebrew 8:10-13) Lebuh Ngingatka Pemati Jesus, semina sida ke layak ulih makai roti enggau ngirup wain, ukai semua orang Kristian. Reti nya, semina orang ke ‘dikangauka Petara’ lalu ngembuan kaul ti spesial enggau Iya. (Hebrew 9:15; Luke 22:20) Sida deka merintah ba serega enggau Kristus. Bup Kudus madahka, semina 144,000 iku orang ke deka nerima kangau tu.—Luke 22:28-30; Pemandang 5:9, 10; 14:1, 3.

 Taja pan semina raban ti mit deka merintah enggau Kristus, tang mayuh ari kami ngarapka diri nyadi sebagi ari “mayuh amat orang” ke deka idup belama-lama iya ba bumi. (Luke 12:32; Pemandang 7:9, 10) Taja pan kami enda makai roti enggau ngirup wain lebuh Ngingatka Pemati Jesus, kami tetap deka datai ngagai pengawa tu kena nunjukka terima kasih ke tebus Jesus.—1 John 2:2.