“Ācɛ Ocijali Ku Ujehofa a i gbonɛnɛ lɛ ācɛ foofunu nóó, amáŋ é gbonɛnɛ lɛ aewo ku um duu. Ɛ̄cī éyi, Elaine nōo mahayi pi ucarti a lɛ ubiscuit ōhī je lɛ aewo ku um. Igbihi ɔɔma, eko duuma nɛ alɔ le ba ɛgiyi ucarti a, aewo a gē dɔka ō gā ɛgiyi Ācɛ Ocijali Ku Ujehofa a cɛɛ kéē miyɛ ubiscuit néē gē je lɛ uwa eko doodu a.

“Aɔya ōhī gáā le gla. Aewo a gē jɔɔnyɛ aubiscuit néē gē je lɛ uwa a, ami a kē i jɔɔnyɛ ɔka ō ka kpii nɛ Ācɛ Ocijali a gē ka mɛmla um a. Amáŋ ń dɔka ō kɛla mla uwa nwune ŋ. N le fiyɛ ihayi ofu ɛta ce igwo (70) ɛ, ń kē jé ɔdā nɛ Ācɛ Ocijali Ku Ujehofa a kpɔtuce kpɔcii a ŋ. Abɔ alɛwa ku ɔwɛ ō gba ɛ̄gbā lɛ um abɔ gaajɛ ɛ ma, n gbɛla ka ó géē lɔhi fiyɛ ɔdaŋ ku um gē jé Ubáyíbu abɔyi um.

“Ɛpleeko ɔɔma, n má Ācɛ Ocijali Ku Ujehofa ɛga ɛyɛɛyɛyi ɔhá ipu igeli a gē mahayi pi ucarti ku uwa. Uwa a wɛ ācɛ olɔhi duu. É gē cila ohi ku ɔka ku um ŋma ipu Ubáyíbu eko doodu, ɔɔma kē ya ku um kpɔtuce uwa fiyɛ.

“Ɛ̄cī éyi, Elaine da um ɔka kahinii: ‘A cɛ ku aɛ́bɛ́ wɛ ɛhi ŋma ɛgiyi Ujehofa?’ N ta ɔ ohi kahinii: ‘Ii, n cɛ gboo!’ Elaine gáā lɛ ɔkpá ku Ayisáya 11:6-9 jé gā um. Oŋma eko ɔɔma gɔbu a, n dɔka ō nwu ɛlā lɛyikwu Ubáyíbu, amáŋ ń dɔka ō miyɛ ɔdā duuma ŋma ɛgiyi Ācɛ Ocijali Ku Ujehofa ku um jé ŋ kpɔ.

“Ɛ̄cī ōhī nōo gboce ɔ a, n jɔɔnyɛ ɛnɛɛnɛ ɔka nōo le kpii mla Elaine mla ɔba nu Brent. É le da um ku um lɛ ɔkpá ku Umátiyu gáā tu ɔkpá ku Úklɔ́ kú Ācotɛhɔ̄ jé, cɛɛ ku um jé ɔdā nōó wɛ ō gbla Ukraist ya a. N kē le ya lɛ. Ó gboji lɛ a ŋ, n cɛ ku Brent mla Elaine kéē gbɔɔ ō klɔcɛ ku Ubáyíbu mɛmla um. Ɔɔma wɛ ɔtahɛ ku ihayi ku 2016.

“N gē leyice ō ya oklɔcɛ ku Ubáyíbu ku um alaadi doodu mla ō gā ōjila ipu Agbla ku Ajɔɔcɛ. N gweeye nɛhi ō bēē nwu ɔdā nɛ Ubáyíbu ka ɔkwɔɔkwɛyi a. Ó gboji lɛ a ŋ abɔ ihayi éyi le gla, n gáā lɛ ubatisim ya. N wɛ ihayi ofu ɛta ce igwo ahaanɛ (79) babanya, ó kē wɛ ɔdā nōo jɛ um eyī nɛhi ku um lɛ ɔwɛ ku ɛ̄gbā ō gba ɔkwɛyi a má ɛ. Ujehofa lɛ ɔhā hɛ ce um ŋma lɛ ō jɛga gā um ō gáā wɛ ipu apɔlɛ ku nu nōo yɔ ipu oduudu ɛcɛ a.”