“Alibeenu nya iJihova á kaa kpahị ju angịnyị kem ka, ma ị kaa kpahị ju ebwu nyam ịnyịnyị. Ẹnẹhẹ, Elaine kọ dayị ba ịCart ba, ya ịkama ha ebwu nyam imiiye ri. Nyọlẹ ká ahyẹẹnụ ọwẹ kam kpá, ụka myị́ ụka kam jẹ ju ịCart nyaa chwẹ, ebwu nyam kaa tụ ba Alibeenu nya iJihova ịwẹ nyọka ri ịkama myịmyị.

“Ọya ịmanyị-manyị chịpwụrụ. Ọ kaa kpụ ebwu nyam ịpyọ la ọ-ka ri ịkama ịịwa, oja ọlẹ kam bala Alibeenu ịwẹ kaa ja tị kaa kpụm ịpyọ ịnyịnyị. Ma ḿ tị kaa tịtọ nyọka ya ẹla balaa lụmẹ ka. M̀ gu ẹka kpoye nya 70 lẹ, ḿ tị jẹ́ ẹla ọlẹ ká Alibeenu nya iJihova myị la gbuu ka. Chajị nyọlẹ ká ala ịchọọchị dam chọpyị wẹẹ, m̀ hwoo nyori ọ ka há gụ nyọka jẹ́ ịBayịbụụ la ịlọm kem lẹ.

“Lụka ọwẹ, m̀ kaa yẹ Alibeenu ịkịla ụpa ọkịla nya epweji ọwẹ kị kaa dayị ba ịCart nyaa ba ịnyịnyị. Ịwa ịnyịnyị ri angịnyị ịnyịịla. Ị kaa kpa ịBayịbụụ wẹ ịtọ ẹla ọnyị myị́ ọnyị kam tọ, ọọwa tị dudu kam dahịhilaa gụ olene.

“Ẹnẹhẹ, Elaine tọm wo yẹkẹẹ, ‘À jẹ́ nyori iyo ileji ri āhị bwu ẹga nya Ohe?’ M̀ wẹ nyị ‘Ịnọọ, m̀ jẹ́ ịnyị!’ Ọọwa lẹ, Elaine à wa Ayịsaya 11:6-9 jem lẹlẹ. Bwu ụka ọwẹ lẹ, m tịtọ nyọka jẹ́ ang bwu ịBayịbụụ lẹ, ma ḿ tị tịtọ nyọka ye apwụ bwu ẹga nya Alibeenu nya iJihova kpa ka wa ka.

“Ahyẹẹnụ ịmanyị tị́ kịlahị nya ọọwa, am bala Elaine bala Brent ọrụmwụ kaa ja oja kpii-kpii bwu ịBayịbụụ, ọ tị kaa kpịpyọ yẹẹyẹẹ. Ị ya irya ham nyọka wa ụpwụ nya ịMatiyu kele ka ụpwụ nya Ụkụrwọ nya Alẹrụ, nyọka jẹ́ etu nya ọngịnyị nya ịKịrayịsị oriri. Lẹ m̀ họ ịnyị. Ọ́ tata kaka lẹ, m myị ká Brent bala Elaine ka jẹ́ ịBayịbụụ balam lẹlẹ. Ụka ọwẹ ri arịrị nya 2016.

“M̀ kaa ya ẹhị rịrị gbe ang ọjẹ́jẹ nyam epwihi ọnyị myị́ ọnyị bala ọjịra-jịra ọ-ka ka Ube nya Ịpyị-Adịrahụ. O ri āhị ọwawa bala ọkẹkẹnị nyọlẹ kam wẹẹ jẹ́ ẹla ọlẹ ká ịBayịbụụ mẹjẹ kpangga. Nyọlẹ kọ kpoye nya ẹka pyịnyẹng lẹ, m hu enyi Ohe lala ọngọhẹ nya Alibeenu nya iJihova lẹlẹ. M̀ gu ẹka 79 lẹẹlẹẹ lẹ, m̀ tị chị ọkẹkẹnị nyori m̀ ye ịgba ọgbagba nya ịlẹhị lẹ. IJihova wahị kụrụm bwula ọ-dam ụbwọ nyọka ri ọngọhẹ ẹ-ẹpwụ nya ugbiyegu nyamwụ ọla odehe wuu.”