Roma mare a grai matsan nna bungli shaja galaw sha ai ni nga ai lawk hta ngai hpe shangai ai. Nye a prat gaw grai nan yak ai. Anu hpe kalang mung n mu ga ai. Awa hte mung kaja ai hku hkau lam n nga ai. Yakhkak nna, mazut ai grup-yin hta gara hku asak hkrung ra na lam sharin la let kaba wa ai.

Asak 10 ning daram hta lagu chye nga sai. Asak 12 ning hta nta kaw na shawng nnan lang hprawng ai. Pyada dap hta ngai hpe awa wa shaga ra ai mung chyahkring hkring sha re. Masha ni hte mung ngai ayan ga law hkat ai. Yawng hte n htuk ai. Asak 14 ning hta nta kaw na pru mat na bai n wa sai. Nanghpam tsi mung chye lang wa nna, lam ntsa kaw sha nga ai. Yup na shara n nga yang, masha ni a mawdaw chyinghka hpe n lu lu hkra hpaw nna n htoi garai n htoi shi ai aten du hkra shang yup ai. Dai hpang, hka nga ai shara hkan tam nna lagaw lata kashin, man myit ai.

Ngai gaw lagu ai, kashun kashe ai hta grai ram wa ai. Nhpye ni hpe kashun la ai, shana hta nta kata hkan shang lagu ai. Dai hku hte angwi ngwi n kaja ai mying nga wa ai. Mying kaba ai nchyun shanang hpung langai gaw, shanhte hte pawng na matu ngai hpe shaga ai. Shanhte hte pawng nna, gumhpraw dum ni hpe damya mya ai. Grai mazut ai sat lawat a majaw, dai hpung hta ngai hpe shara jaw ma ai. Sinat n lawm ai sha gara de mung ngai n sa ai. Yup yang pyi, sinat hpe bunghkum npu hta tawn na yup ai. Nchyun shanang ai, nanghpam tsi lang ai, lagu lagut ai, kashun kashe ai, matsa ai, akyang hten ai ni gaw nye a prat hkrun lam re. Pyada ni gaw, ngai hpe ayan hkan yu ai. Rim hkrum ai, htawng jahkrat hkrum ai mung chyahkring hkring re.

Htawng kaw na pru wa ai kalang mi hta gaw, nu bawk hpang de ngai sa chyai ai. Nu bawk hte shi kasha ni gaw, Yehowa Sakse byin nga ai hpe ngai n chye dat ai. Zuphpawng lung na matu shanhte ngai hpe saw shaga ai. Ngai mung, hpa re ai hpe chye mayu ai majaw shanhte hte hkan mat ai. Yehowa Sakse ni a nawku htingnu de du ai shaloi, chyinghka lam makau kaw dung nna kadai ni pru shang nga ai hpe azi yu ai. Shawoi zawn sha, ngai kaw sinat lawm ai.

Ndai zuphpawng a majaw nye prat galai shai wa ai. Zuphpawng hta dung nga ai shaloi, kaga mungkan de du nga ai zawn hkamsha wa ai hpe naw dum ai. Yehowa Sakse ni gaw ngai hpe, hku hku hkau hkau, mani sumsai hte wa shakram ai. Dingman nna tsawra myit rawng ai shanhte a myi ni hpe, yu du hkra naw dum ai. Ndai shara gaw ngai nga ai shara hte grai shai ai.

Dai majaw, Yehowa Sakse ni hte ngai Chyum Laika hkaja hpang ai. Hkaja nna chye wa magang, nye a prat hkrun lam hpe tsep kawp galai shai ra ai lam chye na wa magang re. Ga Shagawp 13:20 hta lawm ai hpaji jaw ga hpe ngai sadi hkrup ai. Dai hta: “Hpaji rawng ai ni hte kanawn ai wa hpaji rawng na ra ai; Angawk ai ni a manang ni chyawm gaw, hten byak hkrum na ra ai” ngu tsun da ai. Dai majaw nchyun shanang hpung hte tsan tsan nga ra na lam ngai chye na wa ai. Loi gaw n loi ai. Raitim, Yehowa a Karum shingtaw lam hte ngai galaw lu wa ai.

Tinang hkum tinang san san seng seng byin hkra galaw ai. Hkayawm hte nanghpam tsi hpe shakut nna dawn ai. Kara galu hpe mung zen kau ai. Na tan hpe mung raw kau ai. Matsat shabat ga ni hpe mung n tsun sai. Prat hta nye a lailen ni hpe hkang lu ai gaw, ndai gaw shawng nnan lang re.

Laika hti ai, hkaja ai hpe ngai tsep kawp myit n lawm ai. Dai majaw, Chyum Laika hkaja na matu tinang hkum tinang grai hkang wa ra ai. Ngai shakut ai hte maren, Yehowa hpe grau tsawra wa ai. Ngut nna, nye a myit nsam gaw ngai hpe sharu shatsang wa ai. ‘Ngai grai nhkru wa ai she rai nga ai. Ngai galaw wa ai lam ni hpe Yehowa Karai Kasang mara gaw raw ya na kun?’ ngu na myit hkrup ai aten ni nga ai. Dai aten ni hta, mara kaba galaw wa ai Israela hkawhkam Dawi hpe Yehowa Karai Kasang mara raw ya wa ai labau hpe hti dat ai shaloi, myit hkyem sa mat ai.​—⁠2 Samuela 11:1–12:13.

Nta langai hpang langai sa nna, tinang a makam masham lam hpe hkan tsun na matu mung, nye a matu grai yak ai lam re. (Mahte 28:19, 20) N tara ai hku ngai galaw wa ai ni, hkra machyi hkra ngai galaw wa ai ni langai ngai hte mi hkrum wa na kun? ngu na hkrit tsang ai. Raitim, dai hkrit tsang ai myit ni hpe angwi ngwi dang kau lu wa ai. Sumsing lamu hta nga nna, tsep kawp mara raw ya chye ai Kawa a lam kaga ni hpe hkan tsun ai hpe ngai grai ra ai.

Yehowa a lam chye wa ai gaw, nye asak hpe hkye dat ya ai re. Ya nga yang, moi na manang law malawng gaw n nga mat sai. Nkau gaw htawng rawng nga ai. Ngai chyawm gaw myit dik nna ngwi pyaw ai prat hte grai kaja ai myit mada lam hpe lu da ai. Shagrit shanem na matu, madat mara chye na matu hte masin pawt ai myit hpe hkang chye na matu ngai sharin la wa sai. Ya nga yang, masha ni hte atsawm sha tsun shaga chye nga sai. Madu jan Hkaman hte arau, masha ni hpe Chyum Laika lam angwi apyaw hte hkan tsun dan nga ai.

Tsun dan ra ai lam langai naw nga ai. Ya gaw ngai bungli shakut nna dingman ai hku sha galaw sha nga sai. Kalang marang, gumhpraw dum ni hta mung bungli sa galaw ra ai. Damya sa mya ai chyawm gaw n re. Jasan jaseng sa galaw ya ai she re.