Ũtangĩĩo Nĩ Kyaũ?
Ũndũ Mbivilia ĩsũngĩĩte
Ndeto “kutangĩĩa” na “ũtangĩĩo” mavinda amwe nitũmĩĩtwe nĩ aandĩki ma Mbivilia kwonanyʼa mũndũ ũkwovowʼa kuma mũisyonĩ kana wanangĩkonĩ. (Kuma 14:13, 14; Meko ma Atũmwa 27:20) Ĩndĩ o na kau nitũmĩĩtwe ũu, kaingĩ ndeto isu syonanasya kũtangĩĩa kuma naĩnĩ. (Mathayo 1:21) Nũndũ naĩ nĩyo ĩetae kĩkwʼũ, andũ ala matangĩĩawa kuma naĩnĩ methĩawa na wĩkwatyo wa kwĩkala tene na tene.—Yoana 3:16, 17. a
Mũndũ aĩlĩte kwĩka ata nĩ kana atangĩĩwe?
Nĩ kana ũtangĩĩwe, no nginya ũmũĩkĩĩe Yesũ na ũyonanyʼa mũĩkĩĩo waku kwa kũatĩĩa mĩao yake.—Meko ma Atũmwa 4:10, 12; Alomi 10:9, 10; Aevelania 5:9.
Mbivilia yonanĩtye kana no nginya wĩthĩwe na meko maseo mekwonanyʼa kana mũĩkĩĩo waku ti mũkwʼũ. (Yakovo 2:24, 26) Ĩndĩ ti lasima twĩtangĩĩwa nĩ kwĩthĩwa atĩ twĩ na meko maseo. Ũtangĩĩo nĩ “mũthĩnzĩo wa Ngai” ũtũnengae nũndũ wa “ũseo mwingĩ,” kana ‘mũmo’ wake.—Aeveso 2:8, 9; The Holy Bible in Current Kikamba Language.
Nĩvatonyeka ũkasya ũtangĩĩo waku?
Ĩĩ. O tondũ mũndũ wamina kũtangĩĩwa kuma kĩwʼũnĩ ndakanywʼe ũtonya kũvota vo ĩngĩ kana akeyĩkya vo ĩngĩ, nowʼo vethĩawa vailye kwa mũndũ ũla ũminĩte kũtangĩĩwa kuma naĩnĩ. Nĩvatonyeka akasya ũtangĩĩo wake ethĩwa ndelũmya mũĩkĩĩo wake. Na nũndũ wa ũu, Mbivilia nĩthuthasya Aklĩsto ala maminĩte kũtangĩĩwa “mokitĩe mũĩkĩĩo.” (Yuta 3) O na ĩngĩ, Mbivilia nĩyĩkĩĩte vinya ala maminĩte kũtangĩĩwa ĩkamea: “Endeeai kwĩkĩa kĩthito kwondũ wa ũtangĩĩo wenyu na mũyĩka ũu mwĩ na wia na kũtetema.”—Avilivi 2:12.
Mũtangĩĩi nũũ? Nĩ Ngai kana nĩ Yesũ?
Mbivilia nĩyonanĩtye kana Ngai nĩwe umanaa na ũtangĩĩo, na mavinda maingĩ ĩmwĩtaa ‘Mũtangĩĩi.’ (1 Samueli 10:19; Isaia 43:11; Tito 2:10; Yuta 25) O na ĩngĩ, Ngai nĩwatũmĩie aũme me kĩvathũkanyʼo kũtangĩĩa mbaĩ ya Isilaeli, na Mbivilia ĩmetaa “atangĩĩi.” (Neemia 9:27; Asili 3:9, 15; 2 Asumbĩ 13:5) b Nũndũ Ngai atũtangĩaa kuma naĩnĩ kwĩsĩla nthembo ya wovosyo ya Yesũ Klĩsto, Mbivilia ĩmwĩtaa Yesũ “Mũtangĩĩi.”—Meko ma Atũmwa 5:31; Tito 1:4. c
Nĩ kĩla mũndũ ũkatangĩĩwa?
Aiee, andũ amwe maikatangĩĩwa. (2 Athesalonika 1:9) Yĩla Yesũ wakũlilwe: “Andũ ala makatangĩĩwa makethĩwa me anini?” asũngĩie asya: “Ĩkĩai kĩthito kingĩ mũlikĩle mũomonĩ ũla mũtheke, nũndũ nĩngũmũtavya, aingĩ makatata kũlika ĩndĩ maikatonya.”—Luka 13:23, 24.
Momanyĩsyo ma ũvũngũ ĩũlũ wa ũtangĩĩo wa andũ onthe
Ũmanyĩsyo wa ũvũngũ: Andũ maasya ĩandĩko ya 1 Akolintho 15:22 yĩmanyĩasya andũ onthe makatangĩĩwa nũndũ yaĩtye kana “onthe makeethĩwa thayũ nũndũ wa Klĩsto.”
Kĩla Mbivilia ĩmanyĩasya: Maandĩko ala mathyũlũlũkĩte ĩandĩko yĩĩ maneeneete ũthayũũkyo. (1 Akolintho 15:12, 13, 20, 21, 35) Kwoou ndeto “onthe makeethĩwa thayũ nũndũ wa Klĩsto” syonanasya kana onthe ala makathayũũka makakwata ũathimo ũsu kwĩsĩla Yesũ Klĩsto.—Yoana 11:25.
Ũmanyĩsyo wa ũvũngũ: Andũ maasya ĩandĩko ya Tito 2:11 yĩmanyĩasya andũ onthe makatangĩĩwa nũndũ yaĩtye kana Ngai akaetee “andũ onthe ũtangĩĩo.”—The Bible in Kikamba, 1974.
Kĩla Mbivilia ĩmanyĩasya: Ndeto ya Kĩkiliki ĩla ĩalyũlĩtwe “onthe” mũsoanĩ ũsu no ĩtũmĩwe kũweta “mĩthemba yonthe.” d Kwoou ũmanyĩsyo wa wʼo ĩũlũ wa Tito 2:11 nĩ kana Ngai nũvingũĩe andũ ma mĩthemba yonthe nzĩa ya kũkwata ũtangĩĩo. No twasye asu nĩ andũ “kuma mbaĩnĩ syonthe na ngo na andũ na ithyomo.”—Ũvuanyʼo 7:9, 10.
Ũmanyĩsyo wa ũvũngũ: Andũ maasya ĩandĩko ya 2 Vetelo 3:9 yĩmanyĩasya andũ onthe makatangĩĩwa nũndũ yaĩtye kana Ngai ‘ndendaa o na ũmwe witũ anangwe.’
Kĩla Mbivilia ĩmanyĩasya: Ngai nĩwendaa andũ matangĩĩwe, ĩndĩ we ndamalasimĩthasya metĩkĩle mũvango ũla weekie nĩ kana matangĩĩwe. Yĩla “mũthenya wa sila” wake ũkavika, ‘akaananga andũ ala matamũkĩaa Ngai.’—2 Vetelo 3:7.
a Mbivilia nĩwetaa kana mũndũ nĩ ‘mũtangĩĩe’ o na kau ndethĩawa e mũtangĩĩe vyũ kuma ũkombonĩ wa naĩ na kĩkwʼũ. Tũkatangĩĩwa vyũ kuma ũkombonĩ ũsu ĩvinda yũkĩte.—Aeveso 2:5; Alomi 13:11.
b Maandĩko asu maumĩĩwʼe, vandũ va ndeto “mũtangĩĩi” Mbivilia imwe itũmĩĩte ndeto “mũndũ wĩ vinya,” “mwovosya,” “mũsindi,” “mũtongoi,” kana “mũndũ.” Ĩndĩ o na ũu wĩ o vo, ndeto ya tene ya Kĩevelania ĩla ĩtũmĩĩtwe Mbivilianĩ ĩiweta andũ ala metĩtwe atangĩĩi, nĩtũmĩĩtwe kũndũ kũngĩ Mbivilianĩ kwonanyʼa Yeova Ngai ta Mũtangĩĩi.—Savuli 7:10.
c Ĩsyĩtwa Yesũ yumanĩte na ĩsyĩtwa ya Kĩevelania Yehoh·shuʹaʽ, yĩla yonanasya “Yeova Nĩ Ũtangĩĩo.”
d Sisya Vine’s Complete Expository Dictionary of Old and New Testament Words. Ndeto o ĩsu ya Kĩkiliki nĩyonekaa ĩandĩkonĩ ya Mathayo 5:11, yĩla yĩwetete kana Yesũ aisye andũ makaneenea aatĩĩi make ndeto nthũku “sya kĩla mũthemba.”—The Holy Bible in Current Kikamba Language.
No Wendeewʼe Nĩ Ii
MOSŨNGĨO MA MAKŨLYO MA MBIVILIA
Nĩ kwa Nzĩa Yĩva Nthembo ya Yesũ Nĩ “Wovosyo Kwondũ wa Aingĩ”?
Nthembo ya Yesũ yovoasya andũ kuma naĩnĩ ata?
ESSENTIAL BIBLE TEACHINGS
Yesũ Akwie Nĩkĩ?
Mbivilia nĩyonanĩtye kana kĩkw’ũ kya Yesũ nĩ kya vata vyũ. Ve ũndũ waĩ wĩanĩw’e nĩ kĩkw’ũ kyake?
MĨSOA YA MBIVILIA ĨELEETWʼE
Ĩandĩko ya Alomi 10:13 Yĩeleetwʼe—“Ũla Wĩkaĩlaa Ĩsyĩtwa ya Mwĩaĩi”
Ngai nũnengete andũ onthe mwanya wa kwĩsa kũtangĩĩwa na maikwata thayũ wa tene na tene, methĩwe maumĩte mbaĩnĩ yĩva, ũko wĩva, kana me na ũkwati ũilye ata.
MOMANYĨSYO MA MBIVILIA
Ambĩĩa Kwĩmanyĩsya Mbivilia Naitũ
Ambĩĩa kwĩmanyĩsya Mbivilia na mwalimũ waku vate ndĩvi.