Aka asu nĩ nguthu nene ya atavany’a ma Ũvoo Mũseo wa Ũsumbĩ wa Ngai. Ĩandĩko ya Savuli 68:11 yĩiweta ĩũlũ wa aka asu mamanyĩasya yaĩtye: “Mwĩaĩi nũnenganae ĩla ndeto: Aka ala manyaĩĩkasya ũvoo nĩ nguthu nene.”

Ĩndĩ o na ũu wĩ o vo, kũmanyĩsya kũla aka ma Ngũsĩ sya Yeova mamanyĩasya kwĩ kĩvathũkany’o na kwa aka ma ndĩni ila ingĩ. Ve maũndũ mana matumaa methĩwa me kĩvathũkany’o. Maũndũ asu nĩ ta meva?

Mamanyĩasya andũ me kĩvathũkany’o. Aka ma ndĩni ila ingĩ nĩmethĩawa me atongoi nthĩnĩ wa makanisa moo, na mamanyĩasya andũ onthe nthĩnĩ wa ũthaithi woo. Ĩndĩ aka ma Ngũsĩ sya Yeova, mamanyĩasya ala makomana namo yĩla meũtavany’a nyũmba na nyũmba, na kũndũ kũngĩ kĩsionĩ ĩndĩ ti nthĩnĩ wa kĩkundi.

Ũndũ ũngĩ ũtumaa aka ma Ngũsĩ sya Yeova methĩwa me kĩvathũkany’o na aka ma ndĩni ila ingĩ nĩ mawĩa ala matwaĩĩasya nthĩnĩ wa kĩkundi kyoo. Aka ma ndĩni ingĩ nĩmanyuvawa nĩ kana methĩwe me atongoi na maimanyĩsya andũ ala angĩ nthĩnĩ wa makanisa moo syĩthĩo syosanĩte na mũĩkĩĩo woo. Ĩndĩ aka ma Ngũsĩ sya Yeova maimanyĩasya nthĩnĩ wa ũthaithi woo ethĩwa aũme ala avatise me vo. Aũme ala manyuvĩtwe methĩwe matonya kũmanyĩsya nĩmo mamanyĩasya.—1 Timotheo 3:2; Yakovo 3:1.

Mbivilia yonanĩtye kana aũme me oka nĩmo manengetwe kĩanda kya kũtongosya nthĩnĩ wa kĩkundi. Sisya wone kĩla mũtũmwa Vaulo wawetie yĩla waandĩkĩaa Tito, ũla waĩ mũsyaĩĩsya o take. Amwĩie: ‘Nakũtiie Kilete nĩ kana . . . ũnyuve atumĩa kĩla ndũa.’ Vaulo ongeleeile kwasya kana mũndũũme w’onthe ũla wanyuvwa aaĩle kwĩthĩwa ‘ataweteka ũthũku, mũũme wa kĩveti kĩmwe.’ (Tito 1:5, 6) Vaulo nĩwasyokie amũnenga Timotheo ũtao o ta ũsu yĩla wamũandĩkĩie amũtavĩtye ũndũ maũndũ maĩle kwĩkwa kĩkundinĩ. Amwĩie: “Ethĩwa mũndũ nĩwĩkĩĩte kĩthito atw’ĩke mũsyaĩĩsya, endaa wĩa mũseo. Mũsyaĩĩsya aĩle kwĩthĩwa ataweteka ũthũku, mũũme wa kĩveti kĩmwe, . . . wĩ na ũtonyi wa kũmanyĩsya.”—1 Timotheo 3:1, 2.

Nĩkĩ no aũme me oka manyuvĩtwe matongosye nthĩnĩ wa kĩkundi? Vaulo aisye atĩĩ: “Ndiũmwĩtĩkĩlya mũndũ mũka kũmanyĩsya kana kwĩthĩwa na ũkũmũ ĩũlũ wa mũndũũme, ĩndĩ aĩlĩte kwĩkala avindĩtye. Nũndũ Atamu nĩwe woombiwe mbee, na ĩtina Eva oombwa.” (1 Timotheo 2:12, 13) Kwoou, kwĩthĩwa Ngai oombie mũndũũme mbee, nĩ kwonany’a kana kĩeleelo kyake kyaĩ aũme methĩwe na kĩanda kya kũmanyĩsya na kwĩthĩwa asyaĩĩsya.

Athũkũmi ma Yeova maatĩĩaa ngelekany’o ya Mũtongoi woo, Yesũ Klĩsto. Luka ũla waĩ mũmanyĩw’a wa Yesũ aandĩkie ĩũlũ wa ũtavany’a wa Yesũ asya atĩĩ: “Nĩwalikile ndũanĩ na motũinĩ aitavany’a na kũnyaĩĩkya ũvoo mũseo wa Ũsumbĩ wa Ngai.” Ĩtina, Yesũ nĩwatũmie aatĩĩi make makatethye o wĩa ũsu. Mbivilia yaĩtye: “Na ĩndĩ mathi mesĩla kĩsionĩ na motũinĩ, maitavany’a ũvoo mũseo.”—Luka 8:1; 9:2-6.

Ũmũnthĩ, athũkũmi ma Yeova, aũme o vamwe na aka, nĩmethĩawa na kĩanda kya mwanya kya kwĩanĩsya kĩla Yesũ wawetie. Aisye: “Ũvoo ũũ mũseo wa Ũsumbĩ ũkatavanw’a nthĩ yonthe wĩthĩwe ũkũsĩ kwa mbaĩ syonthe, na ĩndĩ mũthya ũivika.”—Mathayo 24:14.