KYONGO KYA ĨTHANGŨ YA MBEE | ŨNDŨ ŨTONYA KŨTETHEKA ĨLA ŨŨSOMA MBIVILIA
Nĩ Kyaũ Kĩtonya Kũtuma Nĩtanĩa Kũsoma Mbivilia?
We wĩw’aa ata ĩla ũũsoma Mbivilia? Wĩw’aa ũinoa kana nũtanĩaa kũmĩsoma? Nzĩa ila ũkũatĩĩa ĩla ũũsoma Mbivilia no itume ũtanĩa kana ũkanoa. Eka tũneenee maũndũ ala ũtonya kwĩka nĩ kana wendeew’e na ũitanĩa kũsoma Mbivilia.
Soma Mbivilia ĩla ĩtũmĩĩte kĩthyomo kya ĩvinda yĩĩ, na ĩalyũlĩtwe nesa. Ethĩwa ũvoo ũla ũũsoma ũtũmĩĩte ndeto syavĩtiwe nĩ ĩvinda kana syĩ vinya kũeleeka, ti laisi ũtanĩe kũsoma ũvoo ũsu. Kwoou nũseo ũkasomaa Mbivilia ĩandĩkĩtwe kwa kĩthyomo kĩ laisi kũeleeka na kĩtonya kũkiita ngoo yaku. O na ĩngĩ, Mbivilia ĩsu yaĩle kwĩthĩwa ĩalyũlĩtwe nesa. *
No ũsomee Mbivilia simũnĩ, kombiũtanĩ, kana tambuletinĩ. Ũmũnthĩ Mbivilia no ĩkwatĩkane simũnĩ kana kombiũtanĩ. No ũsomee Mbivilia imwe Indanetinĩ kana ũkasyumya nĩ kana ũkaisomeaa kombiũtanĩ, tambuletinĩ, kana simũnĩ. Ve Mbivilia ingĩ syĩthĩawa na syĩndũ itonya ũkũtetheesya kũkwata na mĩtũkĩ mĩsoa ĩngĩ ĩeleetye ũndũ o ũla ũũsoma kana kũsianĩsya ũndũ kĩla ũũsoma kĩeleetw’e Mbivilianĩ ingĩ. Ethĩwa wendete mũno kwĩthukĩĩsya vandũ va kũsoma, no wĩthukĩĩsye Mbivilia ĩla ĩlekotiĩtwe. Andũ aingĩ nĩmatanĩaa kwĩthukĩĩsya Mbivilia ĩla ĩlekotiĩtwe ĩla me savalĩnĩ, ĩla mekũvũa ngũa, kana ĩla mekwĩka maũndũ angĩ matonya kũmetĩkĩlya methukĩĩsye. No ũtate kũtũmĩa nzĩa ĩla ĩkũkwendeesya mũno.
Tũmĩa syĩndũ ingĩ itonya kũũtetheesya kũelewa Mbivilia. Syĩndũ ila iseũvĩtw’e kwondũ wa kũũtetheesya kũelewa Mbivilia no iũtetheesye mũno ĩla ũũsoma. Ve mevu syĩthĩawa syonanĩtye nthĩ ila iwetetwe Mbivilianĩ, na no iũtetheesye ũkamanya kũndũ kũla kũwetetwe ĩla ũũsoma Mbivilia na ũyĩthĩwa ũtonya kũelewa nesanga maũndũ ala ũũsoma. Ilungu imwe ta ila syĩ ĩkasetinĩ yĩĩ kana ila syĩ Kĩsesenĩ kya jw.org/kam syĩ na kyongo “Momanyĩsyo ma Mbivilia,” no iũtetheesye ũkaelewa maũndũ maingĩ ala me Mbivilianĩ.
No ũtũmĩe nzĩa syĩ kĩvathũkany’o. Ethĩwa wĩĩw’a wĩ ũndũ wĩ vinya kũsoma Mbivilia kuma mwambĩĩo nginya mũthya, no ũvange kwambĩĩa kũsoma ilungu sya Mbivilia ila wĩw’aa iikwendeesya mũno. Na ethĩwa wĩenda kũmanya ĩũlũ wa andũ me nguma ala mawetetwe Mbivilianĩ, no ũvange kũsomaa ĩũlũ wa kĩla ũmwe e weka. Ve ngelekany’o yonanĩtye ũndũ tũtonya kwambĩĩa kũsoma Mbivilia, na ngelekany’o ĩsu yĩ kasandũkũnĩ kala ke na kyongo “ Kũmanya Nesa Andũ Ala Mawetetwe Mbivilianĩ no Kũtume Ũmĩmanya Mũnango.” Kana no ũvange kũsomaa Mbivilia ũatĩĩe syongo ila syonanĩtw’e kana ũkasoma kwosana na ũndũ maũndũ meekĩkie maatĩanĩe. No ũtate kũatĩĩa ĩmwe ya nzĩa isu.
^ kal. 4 Andũ aingĩ nĩmesĩte kũmanya kana Biblia Takatifu—Tafsiri ya Ulimwengu Mpya ĩalyũlĩtwe nesa na yĩ laisi kũsomeka. Mbivilia ĩsu yumĩthĩtw’e nĩ Ngũsĩ sya Yeova, nĩkwatĩkanaa kwa ithyomo mbee wa 130. No umye Mbivilia ĩsu kuma Kĩsesenĩ kya jw.org kana nthĩnĩ wa JW Library app. Kana ethĩwa nũkwenda, Ngũsĩ sya Yeova no ikũetee Mbivilia ĩsu mũsyĩ kwaku.
