Luka 20:1-47
20 Mũthenya ũmwe aimanyĩsya andũ ĩkalũnĩ na kũtavany’a ũvoo mũseo, anene ma athembi na aandĩki vamwe na atumĩa nĩmookie,
2 na mamwĩa: “Tũtavye wĩkaa maũndũ aa na ũkũmũ mwaũ? Kana nũũ ũkũnengete ũkũmũ ũsu?”
3 Nake Yesũ amasũngĩa, amea: “O nakwa nĩngũmũkũlya ĩkũlyo, nenyu mũnzũngĩe:
4 Ũvatiso wa Yoana waumĩte ĩtunĩ kana waumĩte kwa andũ?”*
5 Na maneenany’a ene kwa ene, makyasya: “Twasya, ‘Waumĩte ĩtunĩ,’ etũkũlya, ‘Nĩkĩ mũtaamũĩkĩĩa?’
6 Ĩndĩ twasya, ‘Waumĩte kwa andũ,’ andũ onthe nĩmeũtũkimanga na mavia, nũndũ nĩmaĩkĩĩaa kana Yoana aĩ mwathani.”
7 Kwoou masya mayĩsĩ waumĩte va.
8 Nake Yesũ amea: “O nakwa ndimũtavya nĩkaa maũndũ aa na ũkũmũ mwaũ.”
9 Nĩvo ĩndĩ wambĩĩe kũtavya andũ ngelekany’o ĩno: “Kwaĩ mũndũ wavandie mũũnda wa mĩsavivũ, na aũkomboethya aĩmi na athi nthĩ ĩngĩ na ekala ĩvinda yĩasa.
10 Na ĩvinda ya ngetha yavika, nĩwatũmie ngombo kũla kwĩ aĩmi asu nĩ kana makamĩnenge matunda amwe ma mũũnda ũsu wa mĩsavivũ. Ĩndĩ aĩmi asu mamĩlũngya ĩte na kĩndũ ĩtina wa kũmĩvũa.
11 Nake atũma ngombo ĩngĩ. Ĩsu nayo mamĩvũa na mamĩkĩĩthya nthoni na mamĩlũngya ĩte na kĩndũ.
12 Na asyoka atũma ya katatũ; ĩsu nayo mamĩũmĩsya na mamĩkya nza.
13 Nĩvo ĩndĩ mwene mũũnda wa mĩsavivũ waisye, ‘Yu nĩĩka ata? Nĩtũma mwana wakwa mwendwa. Nĩvatonyeka ũsu makamũnenga ndaĩa.’
14 Yĩla aĩmi asu mamwonie, mambĩĩa kũsũanĩa ene kwa ene, makyasya, ‘Ũũ nĩwe ũkatiĩwa mũũnda. Ekai tũmũae nĩ kana ũtiĩwa ũtw’ĩke witũ.’
15 Kwoou mamwĩkya nza wa mũũnda wa mĩsavivũ na mamũaa. Yĩla ĩndĩ mwene mũũnda wa mĩsavivũ wĩũka akeekana namo ata?
16 Akooka na kũmoaa aĩmi asu na ainenga aĩmi angĩ mũũnda ũsu wa mĩsavivũ.”
Namo meew’a ũu, masya: “Ũndũ ũsu ndũkaaĩkĩke!”
17 Ĩndĩ amaketeea, na amakũlya: “Nĩ kyaũ kyonanĩtw’e nĩ ĩandĩko yĩĩ yĩkwasya: ‘Ĩvia yĩla aki maleile, nĩyo yĩtw’ĩkĩte ĩvia ĩnene ya kĩkotonĩ’?
18 Kĩla mũndũ ũkavalũkĩla ĩvia yĩu akaanangwa. Na mũndũ o na wĩva ũla yĩkamũvalũkĩla, yĩkamũtumbatumba.”
19 Nĩvo ĩndĩ aandĩki na anene ma athembi mambĩĩe kũmantha ũndũ matonya kũmũkwata saanĩ o ũsu, ĩndĩ nĩmakĩaa andũ nũndũ nĩmamanyie kana aneenaa ĩũlũ woo ngelekany’onĩ ĩsu.
20 Ĩtina wa kũmũsyaĩĩsya nesa, nĩmatũmie andũ na kĩmbithĩ mamaĩvĩte mathi maketw’ĩkĩthye nĩ alũngalu nĩ kana mamũkwatye kwĩsĩla ũneeni wake, na ĩndĩ maimũnengane silikalĩnĩ na kwa ngavana.*
21 Na ĩndĩ mambĩĩa kũneena nake, makĩmwĩa: “Mũmanyĩsya, nĩtwĩsĩ ũneenaa na ũmanyĩasya ũla w’o, na ndwendeeasya mũndũ, ĩndĩ ũmanyĩasya nzĩa ya Ngai kwosana na ũla w’o:
22 Nĩ ũndũ wosanĩte na mĩao* kwitũ kũĩva Kaisali koti, kana ũndũ ũsu ndwaĩle?”
23 Ĩndĩ amanya ũseleke woo, na amea:
24 “Mbony’ei ndinalĩ. Visa na ũandĩko ũla wĩ vo nĩ syaũ?” Namo masya: “Nĩ sya Kaisali.”
25 Nake amea: “No nginya mũnenge Kaisali syĩndũ sya Kaisali, na Ngai syĩndũ sya Ngai.”
26 Na mayaatonya kũmũkwatya kwĩsĩla ũneeni wake mbee wa andũ, ĩndĩ maseng’a nũndũ wa ũsũngĩo wake na makilya.
27 Na Asatukai amwe, ala maasya kana kũi ũthayũũkyo, mooka, na mamwĩa:
28 “Mũmanyĩsya, Mose atũandĩkĩie, ‘Ethĩwa mũndũ nĩwakw’a na aitia mũka, na ndanatia kana, mwana-a-inyia wa mũndũ ũsu aĩle kũtwaa kĩveti kĩu kyatiwa, na aisyaa syana kwondũ wa mwana-a-inyia.’
29 Kwaĩ aũme mũonza masyaanĩw’e. Na wa mbee atwaa kĩveti, ĩndĩ akw’a ate kana.
30 Na wa kelĩ nake eeka oou
31 na wa katatũ o nake nĩwakĩtwaie. Na onthe me mũonza nĩmakĩtwaie; ĩndĩ makw’a, na mayaatia syana.
32 Na ĩndĩ ĩtina ũla mũndũ mũka akw’a.
33 Kwoou ĩvinda ya ũthayũũkyo, mũndũ mũka ũsu akeethĩwa e kĩveti kya wĩva? Nũndũ onthe me mũonza nĩmamũtwaĩte.”
34 Yesũ amea: “Andũ* ma ĩvinda yĩĩ nĩmatwaanaa na maitwawa,
35 ĩndĩ ala matalĩtwe kana nĩmaĩlĩte kwĩthĩwa vo ĩvinda yĩla yũkĩte na kana nĩmaĩlĩte kũthayũũkw’a, maitwaanaa kana kũtwawa.
36 Kwa w’o, o na maitonya kũkw’a ĩngĩ, nũndũ mailye alaĩka, na nĩ syana sya Ngai nũndũ wa kwĩthĩwa mo nĩ syana sya ũthayũũkyo.
37 Ĩndĩ ĩũlũ wa ũthayũũkyo wa akw’ũ, o na Mose nĩwawetie ũndũ ũsu nthĩnĩ wa ũvoo ĩũlũ wa kala kakuthu ke mĩw’a, yĩla wamwĩtie Yeova ‘Ngai wa Avalaamu, na Ngai wa Isaka, na Ngai wa Yakovo.’
38 We ti Ngai wa ala akw’ũ, ĩndĩ wa ala me thayũ, nũndũ onthe kwake me thayũ.”
39 Na amwe ma aandĩki mamũsũngĩa, mamwĩa: “Mũmanyĩsya, waneena nesa.”
40 Nũndũ ĩtina wa vau mayaĩ na ũkũmbaũ wa kũmũkũlya ĩkũlyo o na yĩmwe.
41 Nake amakũlya: “Nĩkĩ andũ maasya kana Klĩsto nĩ mwana wa Ndaviti?
42 Nũndũ ĩvukunĩ ya Savuli, Ndaviti mwene aĩtye, ‘Yeova eeie Mwĩaĩi wakwa atĩĩ: “Ĩkala kw’okonĩ kwakwa kwa aũme
43 nginya yĩla ngamatw’a amaitha maku kavĩla ka nyaaĩ syaku.”’
44 Ndaviti amwĩtĩte Mwĩaĩi, kwoou nĩ mwana wake ata?”
45 Na ĩndĩ andũ onthe methukĩĩsye, amea amanyĩw’a make:
46 “Ĩsũvĩanei na aandĩki ala mendete kũthi kũũ na kũũ mekĩĩte kanzũ, na mendete kũkethw’a masokonĩ na kwĩkala ivĩlanĩ sya mbee* masinakokenĩ na kũndũ kũla kwa ndaĩa mbokanĩ,
47 na ala mavenaa aka ndiwa syĩndũ* syoo, na mavoyaa mboya ndaasa sya kwĩyonany’a. Asu makakwata ũsilĩlo mũthũku* mũno.”
Maelesyo ma kwongeleela
^ Kana “waumanĩte na andũ?”
^ Ndeto kwa ndeto, “ũkũmũnĩ wa ngavana.”
^ Kana “nĩ ũndũ waĩle.”
^ Ndeto kwa ndeto, “Syana.”
^ Kana “ila nzeo.”
^ Kana “malĩ.”
^ Kana “mũnene.”
