‘Óras ki nhos ta faze orason ka nhos ripiti kes mésmu kuza’. — Mateus 6:7.

Jeová ka krê pa nu faze orason dikoradu i nen pa nu uza un livru di orason. Má el krê pa nu pâpia ku el di korason. Imajina modi ki bu ta xintiba si un amigu ta ripitiba kes mésmu palavra tudu bês ki nhos ta papiaba. Bons amigu ta pâpia di korason sobri kuzê ki es ta xinti. Óras ki nu ta uza nos própi palavra pa pâpia ku nos Pai na Séu, kel-li ta mostra ma nu ta odja-l sima un amigu.

‘Óras ki nhos ta pidi, nhos ka ta resebe, pamodi nhos ta pidi ku obijetivu mariadu’. — Tiago 4:3.

Di sertéza nu ka ta speraba pa Deus responde nos orason si nu pidiba un kuza ki el ka krê pa nu faze ô pa nu ten. Pur izénplu, si un algen faze orason pa Deus ta pidi pa da-l sórti i ganha dinheru, Deus ta responde kel orason? El ta fla-nu klaru pa nu ka ser ganansiozu i nen pa nu ka kridita na kuzas ki é ka verdadi, sima sórti. (Isaías 65:11; Lucas 12:15 ) É klaru ki nu ka ta spéra ma Deus ta obi kes tipu di orason li! Pa Deus responde nos orason, nu meste ten sertéza ma kel ki nu ta pidi sta di akordu ku kel ki el ta fla-nu na Bíblia.

 ‘Kenha ki ka ta krê obi ku lei, ti mésmu se orason ka ta gostadu di el.’ — Provérbios 28:9.

Na ténpu ki Bíblia skrebedu, Deus ka ta respondeba orason di kes algen ki ka ta obiba ku se leis justu. (Isaías 1:15, 16 ) Deus ka muda. (Malaquias 3:6 ) Si nu krê pa Deus responde nos orason, nu debe faze kel ki nu ta pode pa nu vive di akordu ku se leis. Má, i si nu fazeba kuzas mariadu antis? Kel-li krê fla ma Jeová nunka ka ta obi nos orason? Klaru ki nau! Deus ta purdua-nu si nu rapende di kes kuza mariadu ki nu faze i nu sforsa pa agrada-l. — Atos 3:19.