Di akordu ku un rilatóriu di un séntru ki ta kontrola duénsas na Mérka, kuazi metadi di tudu kes algen ki entrivistadu di 15 ti 19 anu dja faze séksu pa bóka. Sharlene Azam skrebe un livru a ki ta fla: “Si bu pâpia ku jóvens sobri séksu pa bóka es ta fla ma kel-la é ka nada. Na verdadi, es ka ta atxa ma kel-la é faze séksu.”

•  Kuzê ki bu ta atxa?

•  Kal ki é respósta sértu?

•  Pamodi ki nu debe preokupa ku kel-li?

 Responde sin ô nau pa kes pergunta ki sta dibaxu.

1.   Un minina pode fika grávida si el faze séksu pa bóka?

   1.   Sin

   2.   Nau

2.   Bu pode panha algun duénsa si bu faze séksu pa bóka?

   1.   Sin

   2.   Nau

3.   Séksu pa bóka é sima faze séksu?

   1.   Sin

   2.   Nau

 Konpara bus respósta ku kes ki sta dibaxu.

1.   Un minina pode fika grávida si el faze séksu pa bóka?

    Respósta: Nau. É pur isu ki txeu algen ta atxa ma é ka mariadu faze séksu pa bóka. Má es sta nganadu.

2.   Bu pode panha algun duénsa si bu faze séksu pa bóka?

    Respósta: Sin. Un algen ki ta faze séksu pa bóka pode panha epatiti (A ô B), gonoreia, erpis, SIDA, sífilis i otus duénsa sima kes-li.

3.   Séksu pa bóka é sima faze séksu?

    Respósta: Sin. Kalker kuza ki ta nvolve órgon seksual di otu algen, sima relason seksual, faze séksu pa bóka, pa pólpa i poi otu algen ta masturba é faze séksu tanbê.

 Odja alguns testu di Bíblia ki ta pâpia sobri kel asuntu li.

 Bíblia ta fla: ‘Kel-li ki é vontadi di Deus: nhos debe ivita ten konportamentu seksual mariadu.’ — 1 Tessalonicenses 4:3.

 Óras ki Bíblia ta pâpia di ‘konportamentu seksual mariadu’ el sta inklui relason seksual entri dôs algen ki é ka kazadu ku kunpanheru, poi mô na órgon seksual di otu algen ki é ka bu maridu ô bu mudjer, séksu pa bóka, pa pólpa i poi otu algen ta masturba. Ken ki ta faze konportamentu seksual mariadu ta prujudika se amizadi ku Deus i el pode ten maus rezultadu. — 1 Pedro 3:12.

 Bíblia ta fla: ‘Ken ki ta ten konportamentu seksual mariadu sta ta peka kóntra se própi korpu.’ — 1 Coríntios 6:18.

 Faze séksu pa bóka pode poi un algen ta fika duenti i prujudika se amizadi ku Deus. Tanbê, el pode poi kel algen ta ten sentimentus negativu. Ten un livru b ki ta fla ma kes algen ki ta faze séksu antis di kaza, alvês ta rapende ô es ta xinti ma kel algen ka ta preokupa ku es di verdadi. Mésmu kuza ta kontise ku kes otu manera di faze séksu. Kalker tipu di séksu pode ten kes rezultadu li.

 Bíblia ta fla: ‘Ami, Jeová, mi é bu Deus, kel ki ta inxina-u kuzê ki é midjór pa bo’. — Isaías 48:17.

 Bu ta kridita ma kes lei di Deus sobri séksu ta proteje-u? Ô bu ta atxa ma es é duru dimás? Pa djuda-u atxa respósta pa kes pergunta li, pensa na un strada ki ten txeu movimentu. Na el bu ta odja sinal di tránzitu ki ta mostra limiti di velosidadi i na undi ki bu debe para. Bu ta atxa ma kes sinal ta tra-u bu liberdadi ô es ta proteje-u? Si bo ku kes otu kondutor, nhos ka liga kes sinal, kuzê ki pode kontise?

 É kel mê ki ta kontise ku kes lei di Deus. Si bu ka obi ku es, bu pode ten sertéza ma bu ta kodje kel ki bu símia. (Gálatas 6:7) Ten un otu livru c ki ta fla ma ‘kantu más bu bandona bus prinsípiu i bus krénsa pa faze kes kuza ki ta prujudika-u, ménus ruspetu bu ta ten pa bu kabésa.’ Má, si bu sigi kes lei di Deus, bu ta mostra ma bu ten un bon manera di ser. I más inportanti inda, bu ta ten un konsénsia linpu. — 1 Pedro 3:16.