Na anu di 2011, un ómi muda di Eritreia pa fika rafujiadu na Noruega. Kantu ki Tistimunhas di Jeová nkontra ku el i es pâpia ku el, el fla-s ma dja el konxeba Tistimunhas di Jeová la na se país. El fla ma kantu el ta staba na trópa la, el odja ma kes Tistimunha di Jeová ki staba prézu pamodi ses fé, aguenta preson ki es fazedu pa es ba trópa, mésmu óras ki es ta sérba tratadu di manera txeu duru.

 Di rapenti algun kuza kontise na vida di kel ómi i el podu na kadia. La el ta staba djuntu ku três Tistimunha di Jeová ki txoma Paulos Eyasu, Negede Teklemariam i Isaac Mogos. Es staba prézu désdi 1994 pamodi ses fé.

 Timenti el staba prézu, kel ómi li odja ku se odju ma Tistimunhas di Jeová ta sigi kes prinsípiu di Bíblia ki es ta inxina otus algen. El repara ma kes Tistimunha di Jeová éra onéstu i ti es ta dividiba ses kumida ku kes otu prézu. El repara tanbê ma tudu kes prézu ki é Tistimunha di Jeová ta studaba Bíblia djuntu tudu dia i ma es ta konvidaba otus algen pa studa ku es. Es podia sai di kadia si es sinaba un papel ki ta fla ma es ta paraba di sirbi Jeová, má es nega faze kel-la.

 Tudu kel-li toka kel ómi sinseru li txeu i dipôs ki el muda pa Noruega, el kria diskubri pamodi ki Tistimunhas di Jeová ten un fé fórti si. Nton, kantu ki kes Tistimunha di Jeová nkontra ku el, el kumesa lógu ta studa Bíblia ku es i ta sisti runion.

 Na setenbru di 2018, el batiza i el bira un Tistimunha di Jeová. Gósi el ta pruveta tudu xansi ki el ten pa pâpia ku pesoas di Eritreia ku Sudon i el ta insentiva-s pa studa Bíblia i dizenvolve un fé fórti.