Sambu na Nki Nzambi Ke Ndimaka Ve Bisambu Yonso?
Yehowa Nzambi Tata na beto ya zulu, kele ya kuyilama mpi na kiese ya kuwa bisambu na beto ya masonga. Kansi kele ti mambu yina lenda sala nde yandi pesa ve mvutu na bisambu na beto. Inki kele mambu yango mpi nki beto fwete zaba ntangu beto ke samba? Tala mwa bandongisila ya Biblia.
“Ntangu nge ke samba, kuvutukila ve mambu ya mutindu mosi mbala na mbala.”—Matayo 6:7.
Yehowa ke zolaka ve nde beto vutukila mbala na mbala bisambu yina beto me kangaka na ntu to kutanga yo na mukanda ya bisambu. Kansi yandi ke zolaka nde beto tuba mambu yina ke katuka na ntima. Yindula fioti: Nge ta kudiwa nki mutindu kana nduku na nge ke tubila nge bangogo ya mutindu mosi konso kilumbu. Banduku ya mbote ke kudibumbilaka ve mambu mpi ke solulaka na masonga. Kana beto ke sadila bangogo na beto mosi ntangu beto ke samba Tata na beto ya zulu, yo ta monisa nde beto ke baka yandi bonso nduku na beto.
“Ntangu beno ke lomba, beno ke baka ve, sambu beno ke lomba ti lukanu ya mbi.”—Yakobo 4:3.
Beto ke bakisa nde Nzambi ta pesa ve mvutu na bisambu na beto kana beto ke lomba yandi mambu yina yandi ke zolaka ve nde beto sala to bima yina yandi ke zolaka ve nde beto vanda ti yo. Mu mbandu, kana muntu mosi bulaka nsaka ya mbongo mpi sambaka sambu Nzambi kusadisa yandi na kununga, keti Yehowa ta pesa mvutu na kisambu na yandi? Ya kieleka, Nzambi ke songaka beto nde beto fwete vanda ve lukasi mpi beto fwete ndima ve mambu yina kele ve ya masonga, mu mbandu menga ya mbote (Chance). (Yezaya 65:11; Luka 12:15) Beto lenda yindula ve ata fioti nde Yehowa ta wa bisambu ya mutindu yina. Sambu Nzambi kuwa bisambu na beto, beto fwete ndima nde mambu ya beto ke lomba yandi ke wakana ti yina yandi ke songa beto na Biblia.
“Muntu yina ke buya kuwa nsiku—ata kisambu na yandi kele kima ya nzanzi.”—Bingana 28:9.
Na ntangu ya ntama, Nzambi pesaka ve mvutu na bisambu ya bantu yina vandaka kubuya kulemfuka na bansiku na yandi ya lunungu. (Yezaya 1:15, 16) Nzambi me sobaka ve. (Malaki 3:6) Kana beto ke zola nde Nzambi kuwa bisambu na beto, beto fwete sala yonso na kulemfuka na bansiku na yandi. Ebuna kana beto me salaka mambu ya mbi na bamvula ya me luta? Keti yo ke tendula nde Yehowa ta wa ve bisambu na beto? Ve. Nzambi ta lolula beto na zola yonso kana beto me wa mawa na diambu ya mbi yina beto salaka mpi kana beto ke sala yonso sambu na kusepedisa yandi.—Bisalu 3:19.
