KITESO ya bamvula tanu me luta, Choong Keon ti Julie, bankwelani yina kele ti bamvula 30 ti ndambu, vandaka bapasudi-nzila na Sydney, na insi Australie. Choong Keon ke tuba nde: “Beto vandaka kusala kisalu ya kinsuni ya ntangu fioti mpi beto vandaka kuzinga mbote. Na kisika yina beto vandaka, luzingu vandaka mbote. Beto vandaka na kiese ya kuzinga kumosi ti bantu ya dibuta mpi banduku na beto.” Kansi, kansansa ya Choong Keon ti Julie kumaka kuyangisa bo. Bo zabaka nde luzingu na bo vandaka kupesa bo nzila ya kusala mingi na kisalu ya Yehowa, kansi bo vandaka ti baketi-keti sambu na kusala bansoba ya mfunu.

Na lukutakanu ya distrike ya 2009, bo landaka diskure mosi yina simbaka ntima na bo. Mutubi tubilaka bampangi yina vandaka ti makuki ya kusala mingi na kisalu ya kusamuna. Yandi tubaka nde: “Beno simba diambu yai: Shofere lenda balula kamio na diboko ya kitata to ya kimama kaka kana kamio ke tambula. Mutindu mosi mpi, Yezu lenda sadisa beto na kusala mingi na kisalu ya kusamuna, kaka kana beto ke tambula, disongidila kana beto ke sala bikesa sambu na kulungisa balukanu na beto.” * Bankwelani yina kudiwaka bonso nde mutubi vandaka kutubila bo kibeni. Kaka na lukutakanu yina, bankwelani ya bamisionere yina vandaka kusamuna na Taïwan salaka interview. Bo tubilaka kiese yina kisalu ya kusamuna me natilaka bo mpi monisaka nde na Taïwan mpusa ya bansamuni vandaka kaka mingi. Na mbala yai diaka, Choong Keon ti Julie kudiwaka bonso nde bangogo yina vandaka kutadila bo.

Julie ke tuba nde: “Na nima ya lukutakanu yina, beto sambaka Yehowa na kupesa beto kikesa ya kukwenda na Taïwan.” Yandi ke yika nde: “Beto vandaka kuwa boma. Yo vandaka bonso nde beto ke zola kudilosa na masa mosi ya mudindu na mbala ya ntete. Longi 11:4 yina ke tuba nde: ‘Muntu yina ke tala mupepe ta kuna kima ve, muntu yina ke tala matuti ta katula kima ve,’ manisaka boma na beto.” Choong Keon ke tuba nde: “Beto yidikaka mabanza na beto na ‘kuyantika kukatula’ mbuma na kisika ya kulanda ‘kutala’.” Bo sambaka mbala mingi mpi tangaka masolo ya luzingu ya bamisionere, bo solulaka na nzila ya Internet ti bampangi ya nkaka yina me kwendaka dezia kusamuna na Taïwan. Bo tekaka bakamio mpi bima na bo ya nkaka, mpi na nima ya bangonda tatu, bo kwendaka na Taïwan.

Bampangi-babakala mpi bankento kuluta 100 yina katukaka na Australie, na Grande-Bretagne, na Canada, na France, na Japon, na Corée, na Espagne, mpi na États-Unis, yina vandaka na bamvula 21 tii na 73, me kwendaka kusamuna na Taïwan, na babwala yina mpusa ya bansamuni vandaka mingi. Na kati na bo vandaka ti bampangi-bankento 50 yina vandaka bampumpa. Inki sadisaka bampangi yina ya kikesa na kukwenda kusamuna na insi ya nkaka? Bika beto tadila diambu yango.

Laura, mpangi-nkento mosi ya mpumpa yina katukaka na Canada, kele mupasudi-nzila na westi ya Taïwan. Kansi bamvula kiteso ya 10 na ntwala, yandi vandaka mpenza ve kuzola kisalu ya kusamuna. Laura ke tuba nde: “Mono vandaka kusamuna kansi, sambu mono vandaka mpenza ve ti eksperiansi, mono vandaka kusepela ve ti kisalu yango.” Banduku na yandi ya Canada lombaka yandi na kukwenda kusamuna ti bo na nsungi ya ngonda mosi na Mexique. Laura ke tuba nde: “Yo vandaka mbala ya ntete yina mono lutisaka bangunga mingi na kisalu ya kusamuna, mpi mono yitukaka na kumona nde kisalu yango vandaka kitoko kibeni!”

Dibaku yina ya kitoko pusaka Laura na kukwenda na dibundu mosi ya ndinga ya nzenza na Canada. Yandi kumaka kulonguka Kishinwa, kumaka kusamuna kumosi ti kimvuka mosi ya Kishinwa, mpi bakaka lukanu ya kukwenda na Taïwan. Na Septembri 2008, yandi lungisaka lukanu na yandi yina. Laura ke tuba nde: “Mono lutisaka mvula ya mvimba na ntwala nde mono kuma kusepela ti kisika yina mono vandaka kuzinga, kansi bubu yai, mono ke yindulaka ata fioti ve kuvutuka na Canada.” Inki mutindu yandi ke tadilaka kisalu ya kusamuna? Yandi ke pesa mvutu nde: “Bubu yai, mono ke sepelaka na yo kibeni. Kumona mutindu balongoki ya Biblia ke soba luzingu na bo ntangu bo ke zaba Yehowa ke pesaka kiese kibeni. Kusamuna na Taïwan ke pesaka mono mabaku ya kuwa kiese ya mingi mbala na mbala.”

Kiteso ya bamvula nana me luta banda Brian ti Michelle, bankwelani yina kele ti bamvula 30 ti ndambu, katukaka na États-Unis mpi kwendaka na Taïwan. Na luyantiku, bo vandaka kumona nde bo vandaka ve kusamuna mbote-mbote. Kansi, misionere mosi yina me salaka kisalu yina bamvula mingi zabisaka bo nde: “Ata nge me pesa muntu kaka trakiti, kuvila ve nde, ziku yo kele mbala ya ntete yina muntu yango me wa nsangu ya me tala Yehowa. Yo yina, zaba nde nge me sala dezia diambu ya mfunu na kisalu ya kusamuna!” Bangogo yina ya kikesa sadisaka kibeni Brian ti Michelle na kulanda kaka kusamuna. Mpangi-bakala ya nkaka zabisaka bo nde: “Sambu na kulemba ve, kusosa ve kutadila konso kilumbu mutindu nge ke yela na kulonguka na nge ya Kishinwa, kansi tadila yo na konso lukutakanu ya nene.” Ya kieleka, bo me kumaka kutuba Kishinwa mpi bubu yai, bo kele bapasudi-nzila ya kikesa.

Inki lenda pesa nge mpusa ya kulonguka ndinga ya nzenza? Meka na kukwenda kutala insi yina nge ta zola kusamuna. Kwenda na balukutakanu mpi samuna kumosi ti bampangi ya insi yina. Brian ke tuba nde: “Kumona mutindu bantu mingi ke sepela ti nsangu ya Kimfumu mpi kumona zola ya mingi yina bampangi kele na yo ke pesaka mpusa ya kukwenda kusamuna na insi ya nzenza.”

Bapasudi-nzila mingi yina me kwendaka kusamuna na Taïwan, insi yina mpusa vandaka mingi, vandaka mpi kulonga Kingelesi sambu na kulungisa bampusa na bo ya kinsuni. Kristin ti Michelle ke tekaka bambisi mpi bima ya nkaka ya kudia. Kristin ke tuba nde: “Mono me salaka ntete ve kisalu yina, kansi yo ke sadisaka mono na kulungisa bampusa na mono mpi na kulanda kusamuna na insi yai.” Na nima ya ntangu, yandi zwaka bantu yina vandaka kusumba bima yina mbala na mbala. Sambu kisalu yina vandaka ya ntangu fioti, yo vandaka kubikila bo ntangu mingi ya kusala kisalu na bo ya kimupasudi-nzila, to kisalu ya kuloba bantu.

William ti Jennifer, bankwelani yina katukaka na États-Unis, me kwendaka na Taïwan bamvula kiteso ya 7 me luta. William ke tuba nde: “Bantangu ya nkaka, kulonguka ndinga ya mpa, kusala kisalu ya kimupasudi-nzila, kulungisa mukumba na dibundu, mpi kulungisa bampusa ya kinsuni ya dibuta, vandaka kulembisa mono.” Inki sadisaka bo na kulanda kusala kisalu yina mpi na kuvanda na kiese? Bo bakaka balukanu na kutadila bandilu na bo. Mu mbandu, bo vandaka kuvingila ve kaka nde bo zaba Kishinwa nswalu mpi kutuba yo mbote, bo vandaka mpi ve kudiyangisa mingi na mutindu bo vandaka kulonguka yo malembe-malembe.

William ke yibuka mambu yina nkengi mosi ya nziunga tubilaka yandi: “Sepela ti nzietelo kansi kaka ve ti kisika yina nge ke kwenda.” Na bangogo ya nkaka, na nima ya kubaka lukanu mosi ya kimpeve, beto fwete sepela na bitambi yina beto ke sala sambu na kulungisa yo. William ke tuba nde ndongisila yina sadisaka bo na kuyikana ti luzingu ya mpa, kuwidikila bandongisila ya bampangi-babakala yina vandaka ti mikumba na dibundu na insi yina, mpi kubongisa mutindu na bo ya kusala mambu sambu na kulungisa mbote kisalu na bo ya kusamuna na insi ya nzenza. Yandi ke yika nde: “Yo sadisaka beto na kubaka ntangu ya kutalaka bima ya kitoko ya lugangu ya insi yango, yina vandaka kunatila beto kiese mingi.”

Bonso William ti Jennifer, Megan, mpangi-nkento mosi ya mupasudi-nzila ya mpumpa yina katukaka na États-Unis ‘sepelaka ti nzietelo na yandi,’ na mutindu yandi vandaka kusala bikesa sambu na kulungisa lukanu na yandi ya kutuba Kishinwa mbote-mbote. Na konso wikendi, yandi vandaka kukwenda kusamuna ti bansamuni yina vandaka kukwenda na teritware mosi ya mbote—na Kaohsiung, dibungu ya kuluta nene na Taïwan. Megan vandaka kusamuna nsangu ya mbote na konso masuwa, mpi na balobi-mbisi yina vandaka kukatuka na Bangladesh, na Inde, na Indonésie, na Philippines, na Thaïlande, mpi na Vanuatu. Megan ke tuba nde: “Sambu balobi-mbisi ke lutisaka ve ntangu mingi na dibungu, beto ke yantikaka mbala mosi kulonguka Biblia ti bo pana. Sambu na kusolula ti bo yonso, mbala mingi mono ke longukaka ti balobi-mbisi 4 to 5 na mbala mosi.” Inki mutindu yandi ke tadilaka kulonguka na yandi ya Kishinwa? Yandi ke tuba nde: “Mono vandaka na mfunu ya kuzaba yo nswalu, kansi mono yibukaka mambu yai ya mpangi-bakala mosi  zabisaka mono: ‘Sala bikesa yina nge lenda sala, mpi Yehowa ta lungisa yina me bikala.’”

Na ntwala nde Cathy yina katukaka na Angleterre kukwenda na insi ya nzenza, yandi salaka bansosa sambu na kuzaba kisalu yina mpangi-nkento ya mpumpa lendaka kulungisa na insi ya nzenza kukonda kigonsa. Yandi zabisaka Yehowa mpusa na yandi na kisambu mpi yandi sonikilaka bafiliale mingi sambu na kuzabisa yandi bigonsa yina bampangi-bankento ya bampumpa lenda kutana ti yo. Na nima, yandi vandaka kutanga na dikebi yonso bamvutu yina bo vandaka kutindila yandi mpi yandi ponaka kukwenda na Taïwan.

Na 2004, ntangu yandi lungisaka bamvula 31, Cathy kwendaka na Taïwan, kisika yandi ke zingaka kukonda mindondo. Yandi ke tuba nde: “Mono lombaka bampangi na kuzabisa mono kisika yina mono lendaka kuzwa bambuma mpi ndunda ya mbote na ntalu fioti. Bandongisila na bo ya mbote sadisaka mono na kusadila mbongo na mutindu ya mbote.” Inki sadisaka yandi na kuzinga kukonda mindondo? Cathy ke tuba nde: “Mbala mingi mono ke sambaka Yehowa na kusadisa mono na kusepela ti madia mpi bilele yina mono kele na yo. Mono ke monaka nde Yehowa ke pesaka mvutu na bisambu na mono sambu yandi me sadisaka mono na kubakisa bampusa na mono ya kieleka mpi na kuvanda na kiese ata mono kele ve ti bima yonso yina mono ke zolaka.” Yandi ke yika nde: “Mono ke sepelaka ti luzingu na mono ya kukonda mindondo, sambu yo ke sadisaka mono na kutula dikebi na mambu ya kimpeve.”

Luzingu ya Cathy ke vandaka kaka ve ya kukonda mindondo, kansi mpi ya kiese. Yandi ke tuba nde: “Mono ke samunaka na kisika yina bantu mingi ke ndimaka nsangu ya mbote. Yo ke pesaka mono kiese kibeni!” Ntangu yandi kumaka na Taïwan, mabundu ya Kishinwa vandaka zole na mbanza yina yandi yantikaka kusala kisalu ya kimupasudi-nzila, kansi bubu yai, yo me kumaka 7. Cathy ke tuba nde: “Ntangu mono ke monaka mutindu mabundu ke kuma mingi, yo ke pusaka mono na kulanda kupesa maboko na kisalu ya kukatula bambuma, ebuna konso kilumbu mono ke vandaka na kiese kibeni!”

Mambu ya Choong Keon ti Julie yina beto tubilaka na luyantiku sukaka nki mutindu? Na luyantiku, Choong Keon vandaka kuyindula nde sambu yandi zabaka ve mbote Kishinwa, bo ta pesa yandi ve mikumba na dibundu yina. Kansi, bampangi ya dibundu tadilaka mambu mutindu ya nkaka. Choong Keon ke tuba nde: “Ntangu dibundu na beto butaka dibundu ya nkaka, bo pesaka mono mikumba mingi ya nkaka, sambu mono kumaka nsadi ya kisalu. Na ntangu yina mono bakisaka kibeni nde mono vandaka kusamuna kisika yina mpusa vandaka mingi kibeni.” Yandi ke yika ti kuseka nde: “Bo vandaka mpi na mfunu na mono!” Bubu yai, yandi kele nkuluntu. Julie ke yika nde: “Beto ke kudiwaka nde beto ke sala mambu yina lombaka nde beto sala, yo me natilaka beto kiese yina beto me waka ntete ve. Beto kwisaka awa sambu na kupesa lusadisu, kansi, kuzinga awa me sadisaka beto mingi. Beto ke pesaka Yehowa matondo mingi mutindu yandi sadisaka beto na kukwisa awa!”

Na bansi mingi, mpusa ya bansamuni kele kaka mingi. Keti nge me katuka kumanisa nzo-nkanda mpi ke yindula mutindu nge ta sadila luzingu na nge? Keti nge kele mpumpa mpi kele na mpusa nde organizasio ya Yehowa kusadila nge? Keti nge ta zola nde dibuta na nge kuvanda ti mambu ya mbote ya kuyindula na kisalu ya Yehowa? Keti nge me bakaka pansio mpi kele ti ntangu ya kuzabisa bantu ya nkaka mambu yina nge me kutanaka ti yo na luzingu? Zaba nde balusakumunu mingi ke vingila nge kana nge me baka lukanu ya kukwenda kusamuna kisika mpusa ya bansamuni kele mingi sambu na kuyedisa kisalu na nge ya kusamuna.