Minganga yina ke sansaka maladi ya ntu ke tubaka nde bantu kele ti mfunu ya mambu ya kimpeve sambu bo vanda mpenza na kiese. Beto ke monaka diambu yai ntangu bantu ke sosaka kuzwa kiese na kusadilaka kimvuka mosi buna to muntu mosi ya me luta bo na kiyeka. Sambu na kulungisa nzala yina, bantu ya nkaka ke kudipesaka na bansaka ya kulutisila ntangu, kusala art, kubula miziki, mpi buna na buna. Ata mpidina, bantu mingi ke zwaka ve kiese ya kieleka.

Bantu yina ke tangaka Biblia ke yitukaka ve sambu bantu ke butukaka ti mpusa ya ngolo ya mambu ya kimpeve. Bakapu ya ntete ya mukanda ya Kuyantika ke monisa nde, na nima ya kuganga bankwelani ya ntete, Nzambi vandaka kusolula ti bo mbala na mbala, mpidina yandi pesaka bo dibaku ya kusala bangwisana ya kimpeve ti yandi. (Kuyantika 3:8-10) Nzambi gangaka ve bantu sambu bo zinga kukonda lutwadisu na yandi; bo ke vandaka na nzala ya kusolula ti Ngangi na bo. Biblia ke tubilaka nzala yai mbala na mbala.

Mu mbandu, Yezu tubaka nde: “Kiese na bantu yina kele na nzala ya mambu ya kimpeve.” (Matayo 5:3) Na bunkufi, kulungisa nzala na beto ya mambu ya kimpeve yina beto ke butukaka ti yo kele diambu ya kuluta mfunu sambu na kuvanda ti luzingu ya kiese. Inki mutindu beto lenda lungisa yo? Yezu pesaka mvutu ntangu yandi tubaka nde: “Muntu fwete zinga na mampa mpamba ve, kansi na mambu yonso ya ke basikaka na munoko ya Yehowa.” (Matayo 4:4) Na nki mitindu mambu ya Nzambi ke tubaka, disongidila mabanza mpi malongi ya Nzambi yina kele na Biblia lenda sadisa beto na kuvanda ti luzingu mosi ya kiese mpi ya mbote? Bika beto tadila mitindu tatu ya mfunu.

Bubu yai, bantu mingi ya mayele ti bantu ya me longukaka mingi ke pesaka bandongisila na yina me tala bangwisana, zola, luzingu ya dibuta, mutindu ya kumanisa mavwanga, kuvanda na kiese, mpi nkutu ntendula ya luzingu. Kansi, Yehowa mpamba, Ngangi ya bantu, me fwana na kupesa lutwadisu ya mbote mpi ya bukati-kati na mambu yai yonso.

Mu mbandu: Ntangu nge ke sumba apareyi mosi ya mpa, bonso apareyi ya foto to ordinatere, nge ta zola nde yo vanda ti mukanda yina  ke tendula mutindu ya kusadila yo mbote-mbote. Beto lenda fwanisa Biblia ti mukanda yango. Yo kele mukanda yina, Nzambi me pesaka bantu sambu yo sadisa bo na luzingu. “Mukanda” yina ke tendula kikuma yina bo salaka apareyi yango mpi mutindu beto fwete sadila yo mbote-mbote.

Bonso mikanda yina kele ti malongi ya bo me sonikaka mbote, Biblia ke kebisaka beto na bikalulu yina lenda bebisa “apareyi yango,” disongidila, luzingu na beto. Bantu lenda pesa bandongisila yina ke monana mpasi ve na kusadila, keti yo me fwana ve na kuyindula nde beto ta baka mbutu ya kuluta mbote mpi ta tina makambu kana beto sadila balutwadisu ya Ngangi na beto?

Ata Yehowa Nzambi ke pesaka balutwadisu mpi malongi, yandi ke pusaka beto ve na ngolo na kundima yo. Kansi, sambu yandi ke zolaka beto mpi ke zolaka kusadisa beto, yandi ke benda dikebi na beto na zola yonso nde: “Mono Mfumu Nzambi na nge, mono muntu ke longa nge sambu na mambote na nge, mono muntu ke nata nge na nzila ya nge fweti landa. Kana nge landaka bansiku na mono mbote-mbote, nge zolaka kuvanda na ngemba kimakulu, nge zolaka kununga mpenza; yo zolaka kuvanda bonso masa ke luta mingi, yo ke yuma ve.” (Yezaya 48:17, 18) Na bunkufi, kana beto ke landa lutwadisu ya Nzambi, beto ta zinga mbote. Na bangogo ya nkaka, sambu na kuzinga mbote mpi kuvanda na kiese, beto kele ti mfunu ya Nzambi.

Bantu ya nkaka ke yindulaka nde bo kele ve ti mfunu ya Nzambi sambu bo ke kutanaka ti bampasi mingi na luzingu, yina ke wakana ve ti dilongi ya ke tuba nde Nzambi kele zola. Mu mbandu, bo lenda yula nde: ‘Sambu na nki bantu ya mbote ke monaka mpasi?’ ‘Sambu na nki babebe ya nkaka yina me sala mbi ve ke butukaka ti bifu?’ ‘Sambu na nki luzingu me fuluka ti mambu ya kukonda lunungu?’ Ya kieleka, bangiufula yai kele mfunu mpi kuzwa bamvutu ya mbote na bangiufula yai, lenda vanda ti bupusi ya mbote na luzingu na beto. Kansi, na kisika ya kupesa Nzambi foti nswalu sambu na bampasi yai, bika beto tala mutindu Ndinga ya Nzambi, Biblia ke tendula disolo yai.

Na kapu ya tatu ya mukanda ya Kuyantika, beto ke kuta disolo ya Satana, yina sadilaka mayele ya mbi na nzila ya nioka sambu na kukusa bankwelani ya ntete na kufwa nsiku ya Yehowa. Nzambi buyisaka bo na kudia mbuma ya nti ya kuzaba mambu ya mbote ti ya mbi. Satana tubilaka Eva nde: “Luvunu! Beno ta fwa ve. Nzambi tubaka mpidina sambu yandi zaba nde kilumbu ya beno ta dia yo, meso na beno ta kanguka, beno ta vanda bonso yandi Nzambi, beno ta zaba mambu ya mbote ti mambu ya mbi bonso yandi.”​—Kuyantika 2:16, 17; 3:4, 5.

Na bangogo yai, Satana tubaka nde Nzambi kele luvunu mpi nde mutindu na yandi ya kuyala me konda lunungu. Diabulu tubaka nde kana bantu widikila yandi, mambu ta vanda mbote sambu na bo. Bantembe yina zolaka kumana inki mutindu? Yehowa bikaka ntangu sambu na kusadisa bantu yonso na kumona kana mambu yina bo kusilaka yandi vandaka ya kieleka to ya luvunu. Ebuna, Nzambi bikilaka Satana ti bantu yina landaka yandi ntangu ya kumonisa kana bantu lenda zinga mbote kukonda Nzambi.

 Inki mvutu nge lenda pesa na mambu yina Satana tubaka? Keti bantu lenda zinga mbote mpi kuditwadisa mbote-mbote kukonda Nzambi? Bampasi, kukonda lunungu, lufwa, nku, kubeba ya bikalulu ya mbote, bamvita, lufwa ya bantu mingi na mbala mosi mpi mambu ya nkaka ya mpasi yina ke niokulaka bantu banda bamvu-nkama mingi kele banzikisa ya ke monisa pwelele nde bikesa yina bantu ke sala sambu na kuditwadisa kukonda lusadisu ya Nzambi kele mpamba. Na kisika ya kumonisa nde Nzambi kele na kisina ya bampasi ya bantu, Biblia ke monisa kikuma ya kieleka ya bampasi yango nde: “Kisika bantu ya nkaka kele bamfumu ebuna bankaka ke mona mpasi na maboko na bo.”​—Longi 8:9.

Na kutadila mambu yai, keti yo kele ve pwelele nde beto kele ti mfunu ya kusosa Nzambi sambu na kuzwa bamvutu na bampasi yina ke yangisaka bantu mpi mutindu ya kumanisa yo? Inki Nzambi ta sala?

Banda ntama bantu ke zolaka kukatuka na kimpika ya maladi, ya kinunu mpi ya lufwa. Bo me lutisaka ntangu mingi, me salaka bikesa mingi mpi me bebisaka mbongo mingi sambu na mambu yai, kansi yo me natilaka bo mambote ve. Bantu ya nkaka me kwikilaka nde, kana bo nwa bankisi ya banti, kusadila kindoki, bo ta bikala kaka batoko. Bikesa yai yonso me nungaka ve.

Nzambi ke zolaka nde bantu kuzinga mbote mpi kuvanda na kiese. Yo vandaka lukanu na yandi ntangu yandi gangaka bantu, mpi yandi me vilaka yo ve. (Kuyantika 1:27, 28; Yezaya 45:18) Yehowa Nzambi ke ndimisa beto nde balukanu na yandi yonso ta lungana. (Yezaya 55:10, 11) Biblia ke tubila lusilu ya Nzambi ya kuvutula Paladisu yina bankwelani ya ntete vidisaka. Na mukanda ya nsuka ya Biblia, beto ke kuta bangogo yai: “Yandi [Yehowa Nzambi] ta kusula mansanga yonso na meso na bo, lufwa ta vandaka diaka ve; mawa, bidilu, mpi mpasi ta vandaka diaka ve. Mambu ya ntama me vila.” (Kusonga 21:4) Inki mutindu Nzambi ta lungisa mambu yai ya kitoko mpi nki mutindu beto lenda baka mambote ya lusilu yai?

Yezu Kristu, Mwana ya Nzambi zabisaka balongoki na yandi na kusamba sambu luzolo ya Nzambi kusalama. Bantu mingi me yikanaka ti kisambu yango mpi ke vutukilaka yo mbala na mbala, bankaka ke bingaka yo Kisambu ya Mfumu. Yo ke tuba mutindu yai: “Tata na beto yina kele na zulu, bika nde zina na nge kusantisama. Bika nde Kimfumu na nge kukwisa. Bika nde luzolo na nge kusalama na ntoto, bonso na zulu.” (Matayo 6:9, 10) Ya kieleka, Kimfumu ya Nzambi kele nzila yina Yehowa Nzambi ta katula bampasi yina luyalu ya bantu me nataka mpi ta nata nsi-ntoto ya mpa yina yandi me silaka. * (Daniele 2:44; 2 Piere 3:13) Inki beto fwete sala sambu na kubaka mambote yina Nzambi me silaka beto?

 Yezu Kristu ke monisa kitambi ya pete yina beto fwete sala: “Yai ke tendula luzingu ya mvula na mvula, bo longuka na kuzaba nge, Nzambi mosi kaka ya kieleka, mpi muntu yina nge tindaka, Yezu Kristu.” (Yoane 17:3) Ya kieleka, ti lusadisu ya Nzambi, beto lenda baka luzingu ya kukonda nsuka na nsi-ntoto ya mpa yina Nzambi me silaka. Keti kivuvu yai kele ve kikuma ya nkaka yina lenda ndimisa nge nde beto kele ti mfunu ya Nzambi?

Bamvula mafunda zole me luta, na Areopage to na Ngumba ya Marsi, na Atene, ntumwa Polo tubilaka bantu yina vandaka kundima kaka mabanza na bo mosi diambu ya me tala Nzambi nde: “Yandi muntu ke pesaka bantu yonso luzingu, mpema mpi bima yonso. Sambu, na nzila na yandi beto kele na luzingu, ke tambulaka, mpi ke zingaka, kaka mutindu bapoete na beno ya nkaka tubaka, ‘Sambu beto kele mpi bana na yandi.’”​—Bisalu 17:25, 28.

Mambu yina Polo tubaka na bantu ya Atene kele kaka kieleka. Ngangi na beto ke pesaka beto mupepe ya beto ke pemaka, madia ya beto ke diaka, mpi masa ya beto ke nwaka. Beto lenda zinga ve kukonda bima yai ya mbote yina Yehowa ke pesaka sambu na luzingu na beto. Kansi, sambu na nki Nzambi ke landaka kupesa bima yai na bantu yonso, yo vanda bo ke tudilaka yandi dikebi to ve? Polo tubaka nde, “na mpila nde bo sosa Nzambi, kana bo sosa yandi mpenza mpi bo mona yandi kibeni, sambu ya kieleka, yandi kele ntama ve ti konso muntu na kati na beto.”​—Bisalu 17:27.

Keti nge ta zola kuzaba Nzambi mbote-mbote, disongidila kulonguka mambu mingi ya me tala balukanu na yandi mpi ndongisila na yandi ya kuzinga mbote ntangu yai mpi kimakulu? Kana mpidina, beto ke siamisa nge na kuzabisa muntu yina natilaka nge zulunalu yai to kusonikila bambasisi na yo. Bo ta vanda na kiese ya kusadisa nge.