Ntoto kele kisika mosi ya mbote sambu na kuzinga. Yo kele ti bamasa mingi mpi masa yango kele mfunu sambu na luzingu. Kutengama ya ntoto, kubaluka ya ntoto na aksi na yo mosi, mpi kubaluka na yo na lweka ya ntangu ke salaka nde masa ya banzadi kukuma ve ba glase mpi yo yuma ve. Mupepe yina ke vandaka na ntoto (atmosphère) mpi ngolo yina ntoto ke vandaka ti yo ya kubenda bima (champ magnétique) ke taninaka ntoto na ngolo yina lenda bebisa yo. Kuwakana na kati ya banti mpi bambisi yina ke zingaka na ntoto ke yitukisaka mingi kibeni. Yo yina, bantu mingi me bakisaka nde Nzambi salaka ntoto ti kikuma.—Tanga Yezaya 45:18.

Nge lenda kudiyula nde: ‘Keti lukanu ya Nzambi vandaka nde bantu kumona mpasi mpi kukutana ti kukonda lunungu?’—Tanga Kulonga 32:4, 5.

Ngangi gangaka ntoto sambu bantu yina ke zitisaka bankaka mpi ya ke zolaka yandi kuzinga na kiese. Yo yina, luzingu ya bantu kele mfunu mingi kuluta ya banti mpi ya bambisi sambu beto lenda bakisa Ngangi kele nani, mpi kusepela na kulanda mbandu ya zola mpi ya lunungu na yandi.—Tanga Longi 12:13; Mishe 6:8.

Ngangi na beto lenda lungisa balukanu na yandi yonso. Yo yina, beto lenda ndima nde yandi ta katula bampasi ti kukonda lunungu mpi yandi ta kumisa ntoto kisika mosi ya kukuka mpi ya kiese sambu na bantu.—Tanga Nkunga 37:11, 29; Yezaya 55:10, 11.