Yindula mambote yina bantu ta baka kana luyalu mosi mpamba kuyala ntoto ya mvimba. Bubu yai, bantu mingi ke mona mpasi sambu bantu ya nkaka kele bansukami mpi bankaka kele bamvwama. Luyalu mosi mpamba ta bakisa bampusa ya bantu yonso mpi ta lungisa yo. Keti nge ke yindula nde bantu lenda sala luyalu ya mutindu yai?—Tanga Yeremia 10:23.

Na disolo ya luzingu ya bantu, baluyalu me kukaka ve kulungisa bampusa yonso ya bantu, mingi-mingi bampusa ya bansukami. Baluyalu ya nkaka kele nku. (Longi 4:1; 8:9) Nzambi Nkwa-Ngolo Yonso me silaka na kutula luyalu mosi ya ta yinga baluyalu yonso ya bantu. Mfumu ya luyalu ya Nzambi ta tudila mpenza bantu dikebi.—Tanga Yezaya 11:4; Daniele 2:44.

Yehowa Nzambi me ponaka Mfumu ya me fwana sambu na kuyala nsi-ntoto ya mvimba, Yezu, Mwana na yandi. (Luka 1:31-33) Ntangu Yezu vandaka na ntoto, yandi vandaka kusadisa bantu. Sambu yandi kele Ntotila, yandi ta vukisa bantu ya makanda yonso mpi ta katula bo na bampasi.—Tanga Nkunga 72:8, 12-14.

Keti bantu yonso ke ndimaka nde Yezu kele Mfumu? Ve. Kansi Yehowa kele ntima-nda. (2 Piere 3:9) Yandi me pesaka bantu dibaku ya kundima nde Yezu kele Mfumu. Ntama mingi ve, Yezu ta fwa bantu ya mbi mpi ta tula ngemba na ntoto ya mvimba.—Tanga Mishe 4:3, 4.