Ee, na ntoto ya mvimba Bambangi ya Yehowa mingi kibeni ya bankento ke longaka nsangu ya mbote. Bankento yango ke longaka nsangu ya mbote ya Kimfumu ya Nzambi. Nkunga 68:11 tubilaka mambu yai sambu na bo: “Yehowa ke pesa nsiku; bankento yina ke samunaka nsangu ya mbote kele kimvuka ya nene ya basoda.”

Kansi, kisalu ya kulonga yina Bambangi ya Yehowa ya bankento ke salaka kele ve mpila mosi ti yina bankento mingi ya kele ti kiyeka na mabundu ke salaka. Mambu mingi ke salaka nde kisalu ya bo ke salaka kuswaswana. Inki kele mambu yango?

Bantu yina bo ke longaka ke vandaka ve mpila mosi. Bankento yina ke vandaka ti kiyeka na mabundu, mingi-mingi na mabundu ya Kikristu, ke longaka kaka na kati ya mabundu na bo mpi bantu yina bo ke longaka kele kaka bandimi na bo. Kansi Bambangi ya Yehowa ya bankento ke longaka bantu yina ke vandaka na nganda ya dibundu, disongidila bantu yina bo ke kutanaka ti bo na kisalu ya kulonga nsangu ya mbote, yo vanda nzo na nzo mpi na bisika ya nkaka.

Kima ya nkaka ya ke salaka nde Bambangi ya Yehowa ya bankento yina ke longaka nsangu ya mbote kuswaswana ti bankento yina kele ti kiyeka na mabundu ya nkaka kele mambu ya bo ke salaka na kati ya dibundu. Bankento yina kele ti kiyeka na mabundu ya Kikristu mpi na mabundu ya nkaka ke twadisaka mpi ke longaka bandimi na bo malongi ya mabundu na bo. Kansi, Bambangi ya Yehowa ya bankento ke longaka ve na dibundu kana bampangi-babakala ya me bakaka mbotika kele pana. Bo ke ponaka kaka babakala na kuvanda balongi na kati ya dibundu.—1 Timoteo 3:2; Yakobo 3:1.

Biblia ke monisaka nde babakala mpamba bantu fwete vanda bankengi na dibundu. Mu mbandu tala mambu yai ya ntumwa Polo sonikilaka mpangi Tito yina vandaka mpi nkengi bonso yandi: “Mono bikisaka nge na Kreta sambu nge . . . tula bankuluntu na konso mbanza.” Polo yikaka nde konso bakala yina bo me pona na kuvanda nkengi fwete vanda bakala “yina kele ve ti kima ya bo lenda fundila yandi, bakala ya nkento mosi mpamba.” (Tito 1:5, 6) Polo songaka mpi Timoteo mambu ya mutindu mosi na mukanda yina yandi tindilaka yandi sambu na kutwadisa dibundu. Yandi tubaka nde: “Kana muntu ke zola kuvanda nkengi, yandi ke zola kisalu mosi ya mbote. Yo yina, nkengi fwete vanda muntu ya bo lenda funda ve ata na kima mosi, bakala ya nkento mosi mpamba, . . . muntu ya me fwana na kulonga.”—1 Timoteo 3:1, 2.

Sambu na nki bo ke pesaka mukumba ya kuvanda bankengi kaka na babakala? Polo ke tuba nde: “Mono ke pesa ve nkento nzila ya kulonga, to ya kuyala bakala, kansi yandi fwete vanda kaka pima. Sambu bo salaka ntete Adami, na nima Eva.” (1 Timoteo 2:12, 13) Yo yina, Nzambi me pesaka bakala mukumba ya kulonga mpi ya kutwadisa mambu na dibundu sambu yandi salaka ntete bakala.

Bambangi ya Yehowa ke landaka mbandu ya mfumu na bo Yezu Kristu. Luka, longoki ya Yezu, tubaka mambu yai sambu na kisalu ya kulonga yina Yezu vandaka kusala: “Yandi kwendaka na bambanza mpi na babwala sambu na kusamuna mpi kuzabisa nsangu ya mbote ya Kimfumu ya Nzambi.” Na nima, Yezu tindaka balongoki na yandi sambu bo kwenda kusala kisalu yina mosi: “Bo kwendaka, mpi bo lutaka na teritware yina, bwala na bwala, bo vandaka kuzabisa nsangu ya mbote mpi kubelula bantu na bisika yonso.”—Luka 8:1; 9:2-6.

Bubu yai mpi, Bambangi ya Yehowa yonso, yo vanda ya babakala to ya bankento ke kudipesaka mpenza sambu na kulungisa mambu yai ya Yezu tubaka: “Bo ta [longa] nsangu yai ya mbote ya Kimfumu na ntoto ya mvimba sambu na kuta kimbangi na makanda yonso, ebuna nsuka ta kwisa.”—Matayo 24:14.