Mukanda ya Kusonga: Inki Kele Ntendula na Yo?
Mvutu ya Biblia
Zina ya Kigreki ya mukanda ya Kusonga, A·po·kaʹly·psis (apocalypse), Ke tendula “Kukangula” to “Kumonisa.” Zina yai ke pesa ntendula ya Kusonga—yo ke kangula mambu yina vandaka ya kubumbana mpi yo ke monisa mambu yina ta salama bamvula mingi na nima ya ntangu yina bo sonikaka yo. Bambikudulu na yo mingi me lungana ntete ve.
Bangindu ya bunkufi ya mukanda ya Kusonga
Bangogo ya luyantiku.—Kusonga 1:1-9.
Bansangu yina Yezu tindilaka mabundu nsambwadi.—Kusonga 1:10–3:22.
Mbona-meso ya ke monisa Nzambi me vanda na kiti na yandi ya kimfumu na zulu.—Kusonga 4:1-11.
Bambona-meso mingi, konso mbona-meso ke nata na yina me landa:
Bidimbu nsambwadi.—Kusonga 5:1–8:6.
Bampungi nsambwadi; bampungi tatu ya nsuka ke nata bampasi tatu.—Kusonga 8:7–14:20.
Babolo nsambwadi, konso bolo kele ti mpasi mosi yina ke monisa lusambisu ya Nzambi yina bo fwete tiamuna na ntoto.—Kusonga 15:1–16:21.
Bambona-meso ya lufwa ya bambeni ya Nzambi.—Kusonga 17:1–20:10.
Bambona-meso ya ke monisa mutindu Nzambi ta sakumuna zulu mpi ntoto.—Kusonga 20:11–22:5.
Bangogo ya nsuka.—Kusonga 22:6-21.
Mambu ya ke sadisa na kubakisa mukanda ya Kusonga
Ntendula na yo kele mbote, yo ke pesa ve boma mpi ke titisa ve bantu yina ke sadilaka Nzambi. Bantu mingi ke wakanisaka ngogo “apocalypse” ti mpasi ya nene, kansi mukanda ya Kusonga ke yantikaka mpi ke sukaka na bangogo yai, muntu yina ke tangaka, ke bakisaka, mpi ke sadilaka mambu yina yo ke tubaka, ta vanda na kiese sambu yandi ke sala mutindu yina.—Kusonga 1:3; 22:7.
Mukanda ya Kusonga ke sadilaka “bidimbu” mingi to bizuzi yina bantu lenda bakisa ve kaka mutindu yo kele.—Kusonga 1:1.
Bima mpi bidimbu ya nene yina kele na mukanda ya Kusonga, bo me tubilaka dezia na mikanda ya nkaka ya Biblia:
Yehowa—“Nzambi ya kieleka na zulu” mpi Ngangi ya bima yonso.—Kulonga 4:39; Nkunga 103:19; Kusonga 4:11; 15:3.
Yezu Kristu—“Mwana-Dimeme ya Nzambi.”—Yoane 1:29; Kusonga 5:6; 14:1.
Satana Diabulu—mbeni ya Nzambi.—Kuyantika 3:14, 15; Yoane 8:44; Kusonga 12:9.
Babilone ya Nene—bonso Babilone ya ntama (Babele), mbeni ya Yehowa Nzambi mpi ya bansadi na yandi mpi kisina ya mabundu ya luvunu.—Kuyantika 11:2-9; Yezaya 13:1, 11; Kusonga 17:4-6; 18:4, 20.
“Nzadi-mungwa”—bantu ya mbi yina ke lemfukilaka ve Nzambi.—Yezaya 57:20; Kusonga 13:1; 21:1.
Bima ya me fwanana ti nzo-tenta ya ntama yina bo vandaka kusadila sambu na kusambila Nzambi—tanga mpi sanduku ya kuwakana, nzadi-mungwa ya tala-tala (dilonga ya masa ya kuyobila), minda, makabu ya ndumbu, mpi mesa-kimenga.—Kubasika 25:10, 17, 18; 40:24-32; Kusonga 4:5, 6; 5:8; 8:3; 11:19.
Bambisi ya makasi—ke tendula bimfumu ya bantu.—Daniele 7:1-8, 17-26; Kusonga 13:2, 11; 17:3.
Yo ke sadilaka bantalu na mutindu ya kifwani.—Kusonga 1:20; 8:13; 13:18; 21:16.
Bambona-meso na yo ke tubila “kilumbu ya Mfumu,” yina yantikaka ntangu bo tulaka Kimfumu ya Nzambi na 1914 mpi ntangu Yezu yantikaka kuyala. (Kusonga 1:10) Yo yina, beto lenda vingila nde kulungana ya Kusonga kusalama na bilumbu na beto.
Sambu na kubakisa mukanda ya Kusonga, beto kele ti mfunu ya mambu mosi yina ke sadisaka beto na kubakisa mikanda ya nkaka ya Biblia, tanga mpi mayele yina ke katukaka na Nzambi mpi lusadisu ya bantu yina me bakisaka yo dezia.—Bisalu 8:26-39; Yakobo 1:5.